Zawhna: Kum 46 a upa, zunthlum nei ka ni a, pumpui ulcer ka nei bawk. Zan ka mu nghet lova, ka mu tha thei lo fo thin. Theithur ka châk huam huam vangin zanah sunhlu ei vak ka ching thin. Ka mut theih lahin ka harh mai thei tawh thin lova, ka duh hunah ka harh thei lo fo a ni. Tuna ka awm dan hi ka hre thiam lo hle; pumpui ulcer vang nge ni anga zunthlum nghawng thazam fel lo vang ni zawk ang? Khawngaihin min pui thei em? Chhanna: I kum ngaihtuah chuan zunthlum nei bawk, pum lam fel lo nei bawk nen, i insawiselna hi a âwm viau mai...ti phawt ang. Zan mut that theih loh “Sleep Disturbance” hi nei an tam hlein a rinawm. Ram dangah pawh a ni thova, changkannain a ken tel te pawh a ni thei bawk. Nunphung leh khawsak dan lo danglam hian zan mut a tibuai duh em em a, TV leh computer en nasa ah te a awm duh zual. Stress induced an tih, taksa hah lutuk vang te hian mut buai a awm thei a, exercise lak over te pawh hian a awm fo mai bawk. Zunthlum hian harsatna chi hrang hrang a thlen thei a, blood sugar control that leh that lohin a hril viau mai. Mut chhuak hma lutuk te, harh tha hlei thei lo ang chi te a thlen duh zual. Pum lam fel lo Gastritis leh Ulcer ang chi te hian thawk a tihbuai fo vangin mut harsatna a thlen fo bawk a ni. Stress ngah hrim hrim - hnathawhna lama buai fâl te, chhungkaw dinhmun rilru kaptu awm reng te, nupa inkar buai te leh hun awl nei lo lutuk te hi zan mut harsa an ni fo mai. Tin, thau lutuk overweight hian mut buai a awm duh hle bawk. Engpawh nise, i blood sugar control kawngah enge i an tih hriat a tha a, tun laiah mahni a in test na hmanrua tha tak tak a awm tawh a, in check ngun la, taksa sawizawi regular a pawimawh hle bawk. Tin, pum lam fel lohna i neih chungchangah ei leh in te, zuk leh hmuam te insum theih a pawimawh bawk ang. Mut buai tam tak hi damdawi ngai lovin Sleep Therapy an tih hmangin an enkawl thin bawk a, chung zinga a pawimawh zual te chu: 1. Khum hi muthilh nan leh sex hman nan chauh hman ni thei se. 2. Mut hunbi insiam a, chumi hunah chuan mut a chhuah loh pawhin mut hrim hrim. 3. Mut dawn hnaih darkar khat chhungin thingpui emaw coffee in te, meizial zuk te, TV hmuhnawm tih zawng en te, lehkhabu ngaihnawm tih zawng tak chhiar te hi tih loh theih hram nise. 4. Zingah thawh hunbi mumal insiam a, mut kham loh pawhin thawh luih hrim hrim. 5. Chhun lama mut insum. Heng te hi han tum chhin la, i mut buai chu a puih theih che ka beisei. Pum lam fel lo erawh gastritis/ulcer nasa i neih leh neih loh hriat nan endoscopy tih te pawh a tul a rinawm bawk.