Zawhna 1: Kum 43 mi ka ni a, IBS i nei doctor in min ti a, puitlin hnuah a neih theih em ni? Enge a natna awmzia, taksa tan a hlauhawm em? Chhanna: IBS (Irritable Bowel Syndrome) kan tih hi a chhan tak hriat si loh, ril lam natna, ninawm tak, pumna benvawn, awm ti nuam lo ul, pum hnawh, kaw puar anga awm bakah, ek mumal lo (kawthalo leh ek khal in awm chhawk) angin a awm thin. A chhan tak hriat ani lova, mithiamte sawi dan chuan thluak leh ril inkar signal kal buai vangah an puh deuh ber. Ril infection engemaw ber awm hnuah a awm duh niin an sawi a, rilru hahna lian tham engemaw ber thlen hnuah te a awm duh an ti bawk (chhiat tawh ang te). A confirm dan ber chu investigation hrang hrang hmanga an en hnuah pawha a chhan awm an hriat loh hnuah chauh IBS hi an puh thin a ni. Naupan laia awm bik ani chuang lova, eng kumah pawh a awm thei nia sawi ani; naupang lamin an nei vak lo zawk mah niin an sawi. Kum 50 hnu lama hetiang ang insawiselna an neih erawh chuan a chhan engemaw ber a awm fo zawk. An insawisel dan hi natna dang hrang hrang vangin a awm thei bawk a, chung zingah chuan inflammatory bowel disease an tih hi a common viau. Engpawhnise, IBS i nei anga ngaih anih dawn chuan endoscopy, colonoscopy, ultrasound, liver function test, bood sugar (zunthlum nei hian hetiang insawiselna hi an nei duh phian), ek exam te tih hmasak a tul ngei ang. Chung zawng zawng i tih hnuah pawha a chhan an hmuh theih loh a, i la insawisel reng (kan tarlan tak ang insawiselna te) anih chuan IBS hi i nei angah a ngaih theih ang. Natna hlauhawm han tih tur chu a ni lova, mahse a ninawm em em thung a ni. Tihdamna hranpa a awm lova, amaherawhchu a harsatna thlen te hi a tihnep theih thung a ni. Chumi a enkawlna zingah chuan ei leh in hunbi leh a material thlak danglam te (a bikin Fiber tam chawhmeh ei tam te an inchawh thin), mut that te, exercise leh tui in tam te, fast food insum te hi a pawimawh hle. A bak damdawi hmanga enkawlna chu doctor chawh ngei ei ni thei se, mahni thua damdawi ei mai mai loh ni bawk se.