Zawhna: Kum 25 ka ni a, pasal ka la nei lo, kumin kum tir atangin ka ban ruh leh ka tha a na thin a. Ka rin thuin ka in zuttir a, a tha deuhin ka hria a, mahse tunah a rawn na tan leh a, pawisa sengin doctor ka rawn kual a, mahse that lam ai mah hian a hma ami aiin a na zualin a sa ut ut a. Ka lu te a na a, ka luak te a chuak tel nghal bawk a. Ka mangang tak zet a ni. Khawngaihin min lo pui thei em? BSI Chhanna: Kum la tam lo, a bikin hmeichhia ah hian ruh leh tha na sawi an awm fo thin. A chhan ni thei pakhat chu tleirawl chhoh laia thau hlauh luat vanga ei leh in insum vak vanga taksa mamawh chaw tha hmuh mumal loh vang a ni thei. Hetiang hi an awm fo a, a bikin hostel a awm, high school zirlai te zingah a awm duh zual. Ruh leh tha na lam chi hi a chhan tam tak chu taksa chet tlem vang, exercise lak tlem vang a ni duh hle. A dang leh ah chuan ruhseh engemaw ber vang a ni thei bawk. Hmeichhia bikah chuan thi neih buai nei te hian heng ang harsatna hi an nei duh viau bawk. Ei leh in uluk a pawimawh thu kan sawi fo thin a, chaw pangngai aia junk food (chow, rice, roll etc) ei nasa te hian nutrition buai (malnutrition) an nei duh khawp mai a, chu chuan ruh leh tha na lam thlengin a thlen thei a ni. Ruhseh kan han tih hi thenkhat chu inthlahchhawn theih chi a awm ve bawk a. Ruhseh pui thenkhat phei chu thisen lama fel lo engemaw a awm tel duh viau bawk. Kan sawi tak angin taksa chet tlem vang ani duh a, hnathawhna hmuna thu ngut ngut te, lirthei chuang/khalh nasa te, mut tam lutuk vang te, TV en, computer khawih nasat lutuk vang te in a awm duh viau bawk. Ei leh in lamah chuan calcium tlakchham vang te hian a awm duh viau a, calcium tamna - cheese, bawnghnute, sangha, thlai hring duk, orange juice, soyabean etc te hi ei tam a tha hle. Thazam (nerve) lam fel loh vangin a awm thei bawk a. Mahse tam zawk chuan kut ke mu chuah chuah ang te an sawi tel bawk thin. Engpawhnise, ruh lam doctor (Orthopedic Surgeon) lo inentir leh chhin la, i harsatna hi chu an puih theih ngei che ka beisei.