Zawhna: Nu kum 50 vel ka ni a, ka thi hul hi kum 10 vel a ni tawh. Mahse tun thleng hian lum tih phut a la reh lo va, hriselna magazine ah Hormone Replacement Therapy a awm an ti a, a damdawi hming chu min hrilh thei em? Chhanna: Hmeichhia hi Pathian siam dan angin mumal taka thi nei tur an ni a, chutiang anga an awm theih nan chuan an chi bawm atang te leh, thluak atangtein Hormones, an thi neih dan, hunbi leh chi insiam dan zawng zawng control tu a insiam a. Chu chuan thi an neih chhung zawng an taksa a control a, naupai thei tura chhul leh chi kawng buatsaih te, hmeichhia an nih anga an rilru kalphung leh taksa buatsaih te ah mawhphurhna a nei a ni. Chutiang avang chuan he control system hi a buai chuan thi neih mumal lo te, naupai harsat te a awm fo reng a ni. Hmeichhia chu an thi a lo hul hian an chi insiam a lo tawp a. chu chuan heng kan sawi hormones insiam hi a ti tawp/tlem tial tial a. Chumi buai chuan taksa a organ dang hnathawh te pawh a ti buai fo thin; a bik takin thyroid function te leh thluak lam thlengin. Chutiang avang chuan thi hul hnu, a bikin a hul tirh chhoh lai hian insawiselna hrang hrang an nei thin a, a nasa zualah phei chuan Depression te pawh an nei nasa a, enkawl viau a ngai thin a ni. Calcium tlakchham te a siam bawk a, chu chuan ruh mawih “Osteoporosis” te a thlen thei bawk. Hmeichhe serh chhung hul te a siam fo a, chu chuan nupa nun hman kawngah pawh insawiselna leh harsatna a siam duh viau bawk. Hormones pahnih Oestrogen leh Progesterone te hi hmeichhe chi in a siam te chu an ni a. Thi a lo hul a a lo tlem khan heng hormones hmang hian enkawlna an pe a, chu chu Hormone Replacement Therapy (HRT) an tih chu a ni. Hmeichhia an thi hul hmaa an chhul an paih hian Oestrogen hi low dose in an pe bawk thin. HRT hi thenkhat chuan Oestrogen chauh an lak laiin chhul la nei ah chuan cancer insiam theihna chance a awm nia an sawi avangin Progesterone tel hian a then chu an enkawl bawk thin. HRT hi an ngeih viau rualin risks kel tel a nei nual mai a. Hnute cancer, lung lam tha lo, Stroke (thluak a thisen zam chat), thisen khang insiam te a awm fo a, chuvang chuan hman chi anih leh nih loh ah inhnialna lian tak a awm bawk a ni. Side effect hrim hrim pawh hi a nei nual a, thau/rih belh te, hnute tang leh na te, lu na, mood inthlak thut thut (a changa thinrim, lungchhia, lawm thut thut te), luak chhuak hlei hlui reng leh, serh atanga thi chhuak te hi an nei fo bawk a ni. Chutiang avang chuan harsatna an neih dan azira enkawlna (symptomatic treatment) hi a him zawk tih te pawhin an sawi thin. Thi hul hnu ah chuan calcium ei belh hi a pawimawh khawp mai a, calcium tamna ei leh in bakah, calcium supplement te pawh regular a ei theih nise a tha hle.