Khaw pakhatah chuan ramhuai hi an tam khawpa an tia lawm! Luang buk hi han keu ila, pahnih khat hi chu an awm ngei ngei e an ti!! %%%%%%%%% KA ‘RAMHUAI’ HRIAT CHU Ramhuai hi kan buaipui nasa. Kan hriatthiam loh thil eng emaw deuh a awm apiang hian ramhuai ti pawl hi kan awm thuai zel. Hnawtchhuak thei apuite hi kan ngah khawp a. Ramhuai specialist deuhte pawh hi an awm niawmin an sawi! Thilpek dawng ropui tak tak, Pathian mi hman tak tak an tam khawp mai. Ramhuai chanchin hi ka hriat loh zawng tak a ni. Ka rilruah mak tih leh zawhna ka ngah mai. Mak ka tih mai mai chu, ramhuai hnawtchhuak thei hi Pastor ni loin mi dang an ni fo! Pastor-ho hi hnawtchhuak thei awm ber an ni asin maw le! Nge ni Pastor ho hian thil hriatfuh tak an neih zawk avangin ramhuai hi an tithlazen lo zawk? Hman deuh khan ramhuai hnawhchhuahsak an tum nula pakhat chanchin an sawi ka hria. A pumah an nem vak vak a, a dula thi tling duk rui khawpin tute emawni chuan an lo nem ngheng ngheng mai a ni awm e. Damdawiinah enkawlzui a ngaih phah hrep an ti. Ramhuai hi pum atanga nem chhuah chi a ni tehreng emaw ni? Tu ten emaw ramhuai paia an lo puh, an hnawhchhuahsak theih chuan si loh avanga mahni inten a, ramhuai paia inngaia inkiltawih ta em emte pawh an awm thin an ti. Ramhuai an pai a nih chuan Lal Isua hminga hnawhchhuah theih ngei tur a ni dawn lawm ni? Nge ramhuai pai lo kha ramhuai pai emaw kan ti zawk? Nge hnawhchhuah tumtu rinna kha a chak tawk lo zawk? Zawhna ka va ngah em! Ramhuai paia inpuh hma lutuk hi a awm ve thei ang em? Ramhuai pai intih hi ramhuai luhchilh tawk vela chak lo leh derthawng, ramhuai zuam tawk vela inpuhna a ni thei em? Ka hnawtchhuak e pawh ti se a lawmawm ang em? Ramhuai paia puh nih kan duh ang em? Hmanlai chuan khawhring paia inpuhna kha inthikna lam a ni an ti em kha? Ramhuai nia an sawi thin thil pakhat erawh hriat chian ka nei. Naupang te kan nih laia ka pa min hrilh, Pastor a nih avanga zu nghei buaiin an rawn pan chungchang sawi a, “Kan inkawm laite hian, ‘Khi te, lei min rawn chhuah khum zeuh zeuh mai, kan beng ang e aw,’ te hi an tia, kan hmu ve thei si lo a, an tho a, an han um ang dawt dawt a” a tih kha ka hre reng a. Khatih lai khan zu nghei ho hi ramhuaiin a tibuai thin ni maiah ka ngai. Chutiang chu engtin nge a tih thin kha ka zawt ta hauh lo. Ka pa khan tihdan a hria a niang tih kha ka ring mawl ve tawp! (Pa ngaihsanna khan engkim an titheiin kan rin thin kha tiraw!) Tun hnu hian chutiang chu zu nghei thut nghawng (Alcohol withdrawl syndrome) rilru buaiin thil an hmuh sual leh an hriat sual, a sap tawng takin ‘hallucination’ a ni tih ka hre hnuhnawh ta chauh a nih hi. Ramhuai dang chanchin chu ka hre lem lo a, mahse he ‘ramhuai’ hi ramhuai a ni lo tih erawh ka chiang. “Ramhuaiin a tibuai a, biak inah kan hruai a, hnawtchhuak thei kan pan a, mahse a reh hleithei lo a,” tia daktawr hnena pilh pheng phunga an hruai hnuhnawhte hi ruihhloin an thluak a khawih buai avanga rilru buai thut te, ruihhlo leh zu an nghei thut avanga an thluak buai thutte an ni fo. Ni hnih khat damdawi nena han enkawla reh mai thei a ni thin. “Ramhuai pasarih ka pai a, panga min hnawhchhuahsak a, pahnih an chhuak duh lo, ka ke zungpui atangin min rawn be zawt zawt reng mai,” tia mangang taka daktawr pan a, damdawia ni thum an enkawla dam ta daih chanchin an sawi ka hria. Daktawr ho hian ‘anti-ramhuai’ te pawh an lo nei tehreng emaw ni!! Tawngtaina hian engkim a tithei tehmeuh mai a, mahse Pathian hian hmanraw hman duh a nei fo. Thu vek hian tihdam tur ni ta se Jordan luiah vawi sarih inhnim kher a ngai lo ang a, Siloam dilah va insil kher a ngai lo ang. He ‘ramhuai’ kher kher hi chu hnawhchhuah tum aiin daktawr hnena hruai a, daktawrin tha taka a enkawl theihna tur leh damlo chu tha taka a dam chhuah theih nana tawngtai mai hi a tha ber. Tawngtaia hnawhchhuah chi ramhuai leh damdawia enkawl chi ‘ramhuai’ hre hrang lo tan chuan ramhuai hi buaipui loh law law a fin thlak. Sawi ramhuaia hnawtchhuak leh thei si lo, ramhuai paia inpuh khawtlaia inveng hneh ta si lo, mahni intihhlum tum leh intihlum ta te, tlanboa zawn chiam ngai te, an tlanbona lama va tlu hlum tate hi an awm palh ang e! Pastor leh Speaker ho hi an fing riau a, anmahni pantu thenkhat hi an lo tawngtaisak baka, “Damdawia enkawl tel i ngai,” tih nachang hria an tam mai. Ruihtheih thil tih nasat avanga ‘ramhuai’ lo awm hi ramhuai tak tak a ni lo e. Ruihtheihin thluak a khawih buai avanga hriatna buai, damdawia enkawl ngai, damlo, natna nei an ni e. Damdawia enkawl kher loh pawha reh leh mai theite pawh an awm laiin risk lak chi a ni vak lo, daktawr panpui thuai a tha ber. Damdawia thah tawk vel ramhuai ruhno deuhte hi an awm ve a nia!