“I thih hnuah khawnge I kal dawn?” tih hi zawhna tlanglawn zet mai a ni. Kan thih hmaa kan kal zelna lam tur lam pawh ngaihtuah chiang thiam lo tan chuan chhan a har viau ta ve ang! %%%%%%%%% KHAWIAH NGE KAN AWM DAWN? Sipai Pastor pakhat hi an awmna hmun atanga mel 20 vela hlaah thusawi turin an sawm a. An chhungkuain an kal a, a fanu kum ruk mi chu an kalna tur hmun a lo hrilh chiangkuang ve lo pek a. An tlan fe hnu chuan a fanu te chuan, “Pa, kan kalna tur hmun kan thlen hunah hian khawi hmunah nge kan awm dawn?” a ti ta reuh a. Heti hian kan nung ve naw naw a, kan tei ve lawp lawp a, kan kal ve mai mai a, kan tlan ve zel a, kan kalna tur hmun kan thlen hun hian khawiah nge maw kan awm dawn tak chu le? Kan nun kan hman mek theuh hi han inbih chiang ta hlawm ila. Tuna kan awm dan te, kan thawh mek te, kan tih mekte, kan nun kan hman mek dante hi han ngaihtuah thui ta ila. Tun atanga kum 5-ah, kum 10-ah kum 20 hnuah hian khawnge maw kan awm dawn tak chu aw? Khawi nge maw kan thlen ve tawh tak ang le? Eng emaw kan la nih ve dawn tak le? Eng hna nge kan thawh ve tawh ang? Thla khatah eng zat nge kan lakluh ve tawh ang? Pasal zu ngawl veiin min vaw zan tin tawh mai ang em? Nge nupui fanau nen hlim takin chhung inkhawm kan hmang zan tin ve tawh dawn? Zu ka in nasat tawh em avangin ka thin a sawng tawh hial ang em? Centre hrang hrang ka luah kim tawh zawk hial mai ang a? Nge Sawrkar hotuten thil pawimawha an rawn leh an koh ber ka ni ve tawh zawk ang a, khawtlang leh kohhran tan ‘pa rawn’ ka ni ve tawh zawk dawn? Tunah hain nu leh pa thlazar hnuaiah ka la inham puar a ni thei e. Mahse ka nu leh pate hi an la thi dawn. Chutih hunah chuan engtin nge ka nun zui ve ang le? Eng ang mihring nge ka lo nih tawh ang? Thenawm khawvengte’n an thlamuan pui nge ka nih ang a, an huat rawn? Mi dang tana tangkai nge ka nih ang hnawksak? Miin eng angin nge min sawi thin ang? Tunge hre lawk thei ang tiin min hnial maw? A dik. Tuman kan hre lawk hauh lo. Mahse, “Pathian thu thu a niang chu,” tia kan inchhan mawl leh tawp phenah hian kan kawng zawh lai mil zel hian Pathianin min chhang dawn tih hi ka pawm dan a ni. Chhipphir kawng zawha ka tlan thin lai khan Rih Dil min hruai thleng lo tlat thin. Champhaia thu ka han sawi ve tum ngei khan Rih Dil chu min hruai thleng zawk. MBBS zirlai ni lo pui hi Pathianin doctor hna thawk turin a koh ka ring lo. Kan kawng zawh lai mil zel hian kan tawpna tur pawh Pathianin a ruahman ang tih ka ring tlat. Rilru lo ruahman lawkna hi kan chanpual a ni a, Lei chhanna erawh chu Lalpa chan a ni thung. Kan ruahman lawk leh kan nun hman mek milin kan hmalam hun tur atan hian min chhan hi a rinawm zawk daih! Henry David Thoreau-a chuan, “A tawpa tawpah chuan kan tum tak hi kan vawm fuh nge nge thin,” a ti. Tum mumal nei loa tei mai mai hi nunna hlu tak khawhralna ho tak a ni. Tum neiin hun hmang ila, nun hlawhtling a lo chhuak chauh thin. Pheichham man hi an tlem khawp a nia, beisei duh ting suh! Khawnge kan kal zel dawn tih hi kan thlan a ngai a, a hlawhtlinna erawh chu Lalpa chan a ni. Kan kawng thlan chu han zawh tan ve phawt la, chumi mil chuan ‘Kan kalna tur kan thlen hunah khawi hmunah nge kan awm dawn?’ tih chhanna chu min pe mai dawn a ni.