Chu nula, thâ la za tha zek zawk tih hriat tak chuan mak ti tak mai hian min en chho há a. Mak ti leh lãwm chawhpawlh mit menga min melh chungin, ‘Sir, engati nge kei ber kher hi min thlan le?’ a ti ta mai a!

Heimah Sikul Vice Principal!: Hmãn deuh tawh, ka thianpa sikul (private sikul)-a Vice Principal ka nih ve laiin kan zirtirtu pathum lai mai chuan sawrkar hnà hmu-in min chawlhsan thut mai a. Duhsakna nèna hlim taka kan thlah ní chuan ka thianpa nèn chuan kan hlimna a famkim tlat lo—a zîktluak lo! ‘An aiawhtu tùr tunge ni ang?’ tiin mitmeng hmangin, ri loin kan inzâwt tawn niléng zak!

Chanchinbu-a arang lama zirtirtu mamawh thu kan chhuah chhángtu, mi 30 rual chu kan interview ta hlawm a. Zirtírtu chhuakate aiawh tùr mihring chu kan hmù; mahse, an aiawh zo tùr kan hmù ang em … kan hre lo!

Kan zirtírtu lâk tum mi pathum zínga hmeichhe awm chhun, High School-a Science subject zirtir thei ni bawk chu KG–II zirtirtu-a dah ka rawt ta tlat a. Ka thianpa chuan min hnial; kei ka tang lui. Ni hnih ka thianpa be duh loa ka awm hnuah kan dah thei ta hrãm a.

Naupangte Nû … Nula Si Chu!: B.Sc Chemistry Honours  nula tán chuan KG–II zirtirtu nih chu a tuiawm àwm loh mang e! Mahse, kár khat hnu lekah a zirlaite chu an hming mai ni lo, an nu leh paten an koh duat dàn, an chawhmeh duhzáwng leh an ‘zawng zawng’ chu a hre fai vek … mai ni loin an pual liau liauin ni tina an khawsak dàn leh an thil tih te, an rilru leh an zirna lama an than dan chhinchhiahin diary a vawn/ziahsak ni tin thin. A thawhpuite rual paw’n a hãw ve hman ngai lo; an ngei nih pawh a hlau hek lo!

Rei lo te hnuah a zirlai; ani’n, ‘Ka fate,’ tia a koh mai thin chuan an ngaina ta êm êm mai a; an ngaih êm avànga sikul atanga hàw hreha an tap a thlèm tum pawh a tam mai!

Tum khat chu Principal-in min ko a; kan KG–II Miss chu koh luh ve nghâl a tum a. ‘Engah ani kher?’ ka ti hú a. Ani chu a ngawi ngal thung!

‘Engah Kei Kher!?’: ‘Zawhna pakhat chiah zawh duh che ka nei. High School Science teacher nih i tlin zân a. Mahse hei, kan Vice Principal hian KG-II zirtirtu-ah a dah thla che a. Nuam i ti ta hlauh thung si a. Hei hi eng nge a chhan min hrilh thei em?’ tiin Principal chuan a zâwt ta a.

Chu nula chuan, ‘Sir, he hna thawk tùra lâk ka nih rual khan kei aia thiamna sáng nei; trained teacher neite hial pawh hnãwl an ni tih ka hria. Tûna ka thawh ang thawk châk hi Mizoram dung leh vãngah mi tam tak an awm ang tih pawh ka ring. Kei ber kher min thlang leh, ka subject ni miah lo leh tawn hriat ka neih lohna lam tak, KG-II zirtirtu ni tùra min thlang hi ka làwm a; chona mak tak niin ka hre bawk. Chûng zawng zawng avàng chuan, keimaha awm—“a tha ber” thawh hi bá-a ka inhriat tlat vàng a ni ber e,’ a ti ta a.

Principal chuan, ‘Bá a!? Eng bá maw?’ a ti leh kher a.

‘Sir, i zawhna chu kual deuha ka chháng che a nih paw’n min hre thiam la. Sum khâwl nán emaw hlawh lâk nán emaw chauha zirtirtu hna hi thawh chi niah ka ngai lo a. Sawrkar office-a thawkte angin kan file hi lehkha a ni ve lo a; mihring an ni tlat a. Min hre chiangtu, ka fa (zirlai)-te hnênah hian ka chanchin leh ka hmel chhe lam ka hmuh duh ngai lo ang. Ka hmel tha lam, ka chanchin ngaihnawm lam, ka thinchhiatna aia ka dawhtheihna lam, lungngai hmél aia hlim hmél—a der pawh ni se—hmuhtír ka tum ni tin tlat thin a. Ka hriat loh kárin an hnên atang hian zir lai tam tak ka zir tawh reng asin!

‘Tin, ka sawi tawh ang khán, kei aia tling leh fel zâwk, thiam zâwk, inzir chawp ngai miah loa trained thlap, tawnhriat ngah zâwkte thlang loa kei ber kher min thlang hian zelthel taka he hna thawh hi, thiang lo angah min ngaihtir tlat a. Chuvâng chuan, i sawi—‘Bá’ kha chu—min thlan chhan ti hlawhtling tùra naupangte hmasâwnna kawng zawhpui hi niin ka hria,’ a ti ta a.

Vawiina sawrkar hna thawkte u, kan sawi tâk, khi nula thu sawi khi chhiar ula, chhiar nawn leh teh u. In thawh ai thawk duh, in thiamna aia thiamna sáng nei leh tling zâwk leh fit zâwk leh zei zâwk thalaite hi en teh u—an tamzia hi! Chuta tang chuan zir lai thar zir tum ve lul tawh teh u. Zelthel taka in thawh, in hnâ ang chiah, tlin leh hneh taka thawk châk thalai tamzia hi thlìr nacháng hre ve tawh teh u khai!     Nang ber kher an lo thlang che kha lãwm ta che—púte rél reng lo khan! Hmasâwn tumin hna thawk la, hlawh hmuh nán mai ni lo, zirlai bung thar zir nán, lungawi takin, nuam ti takin thawk mawlh mawlh zâwk tawh ang che.