Zawhna: Covid 19 hlir a ri chuah chuah a, media-ah nen, social media-ah nen. Ei tur inchan lohte kan hlau a, min lockdown bawk si a. Inchhungah puitlingin kan sawi lo thei si lo, ka fate ka tiralti vekin ka hria, a hnua an rilru a nghawng dan tur ka ngaihtuah phei chuan ka tap thei. Puitling hian kan titi-ah engchin nge kan sawi dawn? Naupang mawlh hi. - Rintluangi, Luangmual.

Chhanna: I zawhna atang hian i fate i ngaihtuah a, an hmakhua i ngai hle a ni tih a hriat a, a lawmawm ka ti hle mai. Ni e, tun lai kan khawvel chu he hri leng bak news dang ngaihthlak emaw chhiara en tur a awm thei meuh lo a ni ber e. Local, national leh international news thlengin a luah fai a ni ber a. Chuta karah social media chak em em mai hian kan inven sen rual lohin he chanchin hi ni tin zan tin min fah chu a ni a, titi dang han sawi tur pawh a vâng hle mai.

Kar thum dawn lai mai kan lo inkhung (lockdown) dawn ta a, chhungkua zawng zawng deuhthaw hian hunbi mumal kan nei hlei thei lo a ni. Zan kan mengrei a, zing kan tho har a, chaw ei hunbi a inthlak a, zelthel sa tan phei chuan min tithatchhe belh ngeiin a rinawm. Mihring hriselna pawh a nghawng ngei ngei dawn a, kan taksa hriselna lam kan vawn uluk a pawimawh hle mai. Ei leh inah te, hunbi hman dan chungchang hrim hrim pawh a buai a, taksa insawizawi nachang hre sa tan lo phei chuan thau belh bakah zunthlum, thisen sang natna neih belh pawh kan pun a hlauhawm hle.

Taksa hriselna a tlakhniam a, activity a tlem chuan rilru lam hriselna (mental health) pawh a nghawng ngei ngei ang. Indian Medical Association (IMA)-in Helpline kan siamahte hian zawhna kan dawn zinga tam tak chu mental lam kaihhnawih – Anxiety, Paranoia, Panic Disorder lam a ni fo mai. Chu chuan chhungkaw hriselna a khawih buai ngeiin a rinawm bawk.

Naupang pawh zirna in kan khar hian thui tak chu a nghawng dawn a, private school thenkhat chuan social media hmang tangkaiin an zirlaite tan lesson an buatsaih thin a, hei hi a pawimawhin a tangkai hle. DDK Doordarshan pawhin SCERT/School Education nen tangkawpin zirlaite tan learning session TV lamah an buatsaih dawn niin ka lo hria a, hengte hi kan naupang/zirlaite mamawh tak a ni.

Naupang hian an rilru lam thanna (mental development) atan socialize (mi dang kawm) an mamawh hle mai a. Hei chen kan inkhungpui tawh avang hian chu an mamawh chu an tlachham ngei dawn a. Khawthlang lam ram changkang pawhin an buaipui hle mai a, video game chi khat, interactive game Roblox an tih mai pawh tun lai hian an hmang lar nasa hle. TV, Mobile, Computer khawih lova awm tir ngawt a theih loh a, an khawih rau rau a nih pawhin an tana tangkai thei tur kan ngaihtuahpui a tul hle mai. Learning Apps thenkhat BYJU’s an tihte hi hmang tangkai thei ila a tha hle.

Tun hri leng chungchangah hian chhungkaw tam tak chuan i rawn zawh ang hian information chi hrang hrang lakah kan fate kan veng seng hauh dawn lo va; tin, naupang hi kan lo en liam mai thin a, an lo hre thui thei hle a ni tih kan hriat a tha. Ka fapa pawl ruk zirlai ngei pawh hian chhung inkhawm kan neih a, a tawngtainaah virus leng hi scientist-ten a cure an hmuhchhuah thuai theih nan (a chham dan ngai ngaiin) a tawngtaisak ve ziah a ni. Kan tê ber, pre-school zirlai pawh hi kan thenawmten leng tura an sawm pawhin “min lockdown sia, ka lo leng thei hrih lo” te a ti mai bawk.

Pawimawh ta em em chu nu leh pa kan chiai loh a, thu thar apiang naupang hriata kan sawi chhuah vek loh te, khawvel dinhmun te, kan ram dinhmunte pawh an hriatthiam theih tura uluk taka puitling anga kan hrilh fiah a pawimawh hle. Kan in-lockdown chhan te, a pawimawhna te, sorkar hmalakna pawimawh tak a nih dan te, heng hmang hian hri leng lakah kan inveng a ni tih te, engtikah emaw chuan nunphung pangngai kan la nei leh dawn a ni ti zawnga a êng zawnga kan hrilh fiah fo hi a pawimawh hle mai.

Lehlam zawnga chhut chuan chhungkaw tam takin kan neih hleih theih loh, chhungkuaa hun tha hmanho (quality time)-na hun kan tawngah ngai ila. Kan fate kawm tam te, an tui zawng hriatpui tum nan te hmang thei ila. Khawvel thil thleng pawimawh zirho nan te, natna leh thihna awmzia hrilhfiah nan te, Pathian thu an hriat dan a him leh him loh hriat nan te hman tum ta hlauh ila, kan tangkaipui zawk ngei a rinawm.

Kan sawi tak angin kan fate hian kan rin aiin thil an man a, an hrethiam a ni tih hriat a tha hle. A saptawng takin underestimate lo vang u. Personal hygiene pawimawhzia te, social distancing kan tih fo lo pawimawhzia te, ina kan tawm hian kan thenawm leh khawtlang tan thil tha, khawtlang hriselnaah tha kan thawh ve (contribution) a ni tihte hrilhhriat tum ila. Khawvel history-a chuang reng tawh tur kan paltlangpui a, a hlau zawng leh intihthaih emaw chiai zawng ni lovin, engnge kan zir chhuah theih tih zawngin hmachhawn tum ila, hlawkna eng emaw tak chhar chhuah theuh i tum zawk ang u.