JF Laldailova chuan a English–Lushai Dictionary bû-ah “fix” hi transitive verb a ti a; Mizo tawnga a lehlin dàn chu: “vuah, ti nghet, kêng lût, ruat nghet, siam tha, siam rem” ti te’n a dah. Mahse, hêng zawng zawng ai hian, nang hian min “fix” nghet daih zâwk! “Fix” tih hian ka dàwn leh ngaih dàn che hi a puang zo lo nasa! Min “glue” a nih ber hi a! 

I laka ka nih dàn hi, “fix” tih ’ngawt hi niin ka hre lo; ka awm dàn leh ka rilru put hmang pawh sawi fiaha hrilh fiah zoin ka hre lo a—“stuck” tih awmzia ka’n en leh a. JF-a chuan, “bei, bet, chàr, táng” tiin a dah leh tih ka hmù—‘Ka nih chiah chu!’ ka ti. Mahse, chu aia nasa chuan nang hian min chàr a; a sap tawng leh a Zo tawng paw’n sawi fiah ngaihna ka hre lo a nih ber hi!  

Lionel Richie hla ka ngaihthlâk thin, thûk leh ril tak—rilrua ril raiha ka feel phâk ngai loh kha min hriat thiamtír ta a—a “Stuck on You” hla hmang khán…

“Stuck on you; I've got this feeling down deep in my soul that I just can't lose” a lo tih kha i ni chaih mai!

Hmaichhana inhmuha induhna aia thûk daih—khûtah, ril raihah i riak a; ka thlarau hi zu ti che pha che chuan! Hmãna i riah kha duhtâwk ve mai la chuan, nikhua deuh tùr hi ka niua; mahse, hei leh chen hi riah i tum si a; min chàm hlena, min chàmchilh hi i tum tlat a. Ngawi teh, ka sawi sual—i chám tlat a—ka tih luih vàng zâwk a ni ang e!

Keimahah hian nang hi—ka sàwm ni miah loa i beh tlatna chhan leh i bei tlatna chhan hi eng nge ni ang aw … ka ti thin. Khi laiah khian, kan kawmchhak nulá ni tùrin in in rawn sà thin a nih kha. I hna thawh form te kha inhmeh ka ti êm êm thin che a. A ni dang lehah, zirtirtu i nih anga i sikul kal tùr, zirtirtu uniform i ha lai ka hmu leh che a; inhmeh ka ti leh zual êm êm che a. I inkhâwm tùr, Sunday dress te hi, i tán liau liau leh i tã tùr ngau ngaua duana máwiin i màwipui a. Mi dang inhmeh miah loh tùr kawr te hi màwipui ka ti thin tak zet chu  a sin—a rûkin!

Kei hi, ka sual ta viau nge ka lêrh thar thut tih pawh ka inhre lo. A nihna tak takah chuan vawi sàwm a la chuang lo ang—ka hmuh tanna che  kha! Mumang lam chu chhiar tel lo ila! Mahse, i nih ang tùrin i ni nghâl tawp mai a; duhawm tum loin ka hmu duhawm nghâl che a; ngainatawm i nih leh nih loh ka hriat hma hauh chein ka ngaina nghâl mai thei che kha … Isua thil mak tih tluk hiala mak a ni asin! 

Chûng thil chu tum luih, chei luih, màwi luiha ti pawh i ni rêng rêng lo a; tih palh pawh a ni nahek lo! I awm dàn kha, i nih ang kha, nang chuan i màwipui mai a—chei hran i ngai chuang miah lo a, siam chawp màwina i ûm miah lo kha máwi ka ti che asin!

Eng nge i chawhmeh duhzáwng pawh ka dáwn lo a, thak i ngam leh ngam loh pawh ka hre lo. Vawk sa nge i duha bawng sa zawk tih leh, Wai Wai chhum nge i ngainata Rumpum chhum zâwk tih phei chu, hre lo fál fa ka ni ang! Mahse, ka duhzáwng êm êm, ka duat châk … ka’n zêp lo te’ng—khuma ka ka ninhleipui châk i ni tih hi, hria la ka tihna leh hre lo law law la ka tihna hi a inzah hial ta ve ang!

Ka ni-khua-lo ngawt mai tiraw? Khaw lo tak zet ka ni … i ti ve thin em? Chuti teh thut thuta han “duh” nghâl huam huam che chu! Mak ti záwnga i la dáwn a nih phei chuan, “mak ngawih ngawih” tùr thil a ni. 

Mahse, ka heti tlat che a. Tleirãwl tawngkam takin, ka hmuh tirh che khan, a vawi khatna, dàwra i pa kuhva i leisak tum khán, ka  star nghâl tawp che a. Sâpin “Love at first sight” an tih min tawntírtu i ni a. Mahse, “Kan ni” tihna em ni? tih chhànna hi chu ka hre chuang lo!

Chuti teh huama ngaia ngainaa ngaizáwnga duhtu che chu min duh lêt ve mai la, ti ila … i lo duh lo thei si a … ka zâwt ngam lo che alãwm! Lo chuti teh hlauh la, ka zah dàn tùrzia chu! Dárthlalang hmaah pawh ka ding ngam tawh nang! 

A chhan chu, ka fapa pa ka ni tawh miau si a!