Gas a rawn thleng dâwn a, in khatin gas card pakhat bâk hman theih a ni lo…’ tia nichina Local Council tlângau au thâwm khan kan vêng chhûnga chhûngkaw tinte min den dân a inan loh tûrzia leh ram ri buai avanga ni tin châkkhai phur motor an tân thup laia gas rawn thleng chu, chhûng tinten kan mamawh dân a inchen loh tûrzia ka lo dâwn pha reng reng lo mai—he nû, kan in piah deuha awm, gas châng ve ringawt ka hmuh hmâ hi chuan.

Gas card hi pathum kan nei a; gas bûr ruak pawh kan nei ve ta nual. Mahse, card khatah bûr khat bâk a lâk theih loh a, card pakhat bâk kan hmang thei lo bawk—bûr khat chauh kan la thei tihna a nih chu. ‘Ho ting tang ve aw!’ ti rilru nuah nuah chungin, tlângau au zawh rual chuan kan lâk khât ber kan gas card leh gas man tûr pawisa nawi kengin gas bûr ruak chu ka pu chhuak thuai a. Gas semna point ka va thlen chuan ka hmaah mi pahnih chiah an lo la awm.

Intlar pawh kan thui fê hnû chuan gas phur motor pawh chu a rawn thleng a. Kan Local Council hruaituten an rawn zui. Kan card leh thil dang dang min ziah felsak a, gas chu a indawtin kan la ta zêl a. Ka gas lâk, in ka thlen hnu chuan an semnaah chuan ka va tei hawi leh mai mai a. Nu pakhat, gas châng ve tho, mahni buaia lo buai ve êm êm mai hi ka va hmû a. A buaina chhan bera pawh chu ka hre chuang lo. A gas bûr ruak chu mi tawlh rual chuan a tawlhpui ve zêl tho a.

Ka en thla reng a. A hun a thleng hnai tial tial a, a hmêlah a buai tual tual tih hai rual a ni ta lo. A hnû deuh chuan a hnunga mite chu amah aia la hmasa tûrin a ti ta hial mai. Eng teh vakah ka la ngaihsak chuang lo; dâwrah kuhva ka leisan daih.

‘Aw… an thu puante kha ngaithla chiang ve thin ula. “In khat atangin gas card pakhat bâk a hman theih loh,” an tih mawlh mawlh kha… A mak thin e…’ ti rî hi, dâwr atanga ka lêt leh hnu chuan ka hria a.

Thenawm nû ni ngeia ka hriat chu, a kianga intlar ve, mi dangho chuan an lo hauh rawn ti tih a. Ani chuan a hnunga intlarte chu a lâk hmasaktîr ta zêl mai. Beidawng tih hriat tak hian min rawn pan teh tlat—ka thû loh vei nên.

Kei chuan, pâwr fein, ‘A! Teh ngawt a! Tûn ang hun, lockdown lai lai a! Ram ri-ah kawng an dang a, a rawn thleng chhun pawh kan vêng min daih…’ ka tih lai chuan, ‘Keini chuan kan mamawh êm alâwm!’ tiin ka thu sawi chu min pawh chahsak a.

‘Eng a!? Tûn ang hunah tunge gas mamawh lo awm ang a? A rawn thlen khât êm hi!’ tiin ka ân khum leh a.

Ani chuan, ‘Ni e, gas card tel loa lâk tum ngawt chu a dik lo alâwm. Mahse, gas card ngaihtuah thei loa in lockdown hnan te, hna pawh thawk thei loa lockdown-na hnuaia inkhawsaktîr reng te leh dam loh rengte hi a dik bîk dâwn em maw ni?’ a ti ta niah niah a. ‘Mi dang mamawhna aiin kan mamawhna hi a sâng mai thei a nia… Gas card hman loh in neih chuan min hmantîr lawk i phal mai em? Tûna kan lâk chuan tûkinah chaw kan ei ve thei dawn a…’ a ti ta mai!

Ka ding ngîl awt a. An chhûngkaw chanchin pawh ka zâwt thui lo. Inah ka tlân lût a, kan gas card dang chu ka va la. Local Council hruaitute phalna ka dîl (rûk)-sak a. Ka hmantîr ta. An in thleng ka put hâwsak zui bawk a. \

Kan thenawma hman ni lawka rawn insawn an lo ni a, ka lo hre lo pawh chu ka inthiam leh hnuhnawh. An choka kan luh rual chuan an sitting room kan thleng a ni mai. Ding lam hawi phei leh chuan an pa ni ngei tûr, khuma lo mu bâm leh naupang pahnih, khum bula lo infiamte chu ka va hmu leh nghal mai a. Chu in te tak têa chhûngkaw member pali an khawsa leng thei chu mak ka ti zâwk hle.

An pa chu, thla hmasa khan a hna thawhna, in an sakna chhâwng sâng atangin a tla a, a mal ruh tliak zai ngai pawh chu pawisa an neih loh avangin an la zaitîr thei lo a lo ni. Hna thawktu ber a dam loh achinah ani, thenawm nû chuan thlai hnah a khâr chhâwng ta a. Kan vêng kâwna mi dâwr kawtah a inpho ve thin. A sawi dân chuan, ‘A nihna takah chuan, mi lei bâng, tawih mai tûr kan ei hi kan lo hlêp ve a…’ a ti mai a. A fanu lian zâwk chu daily-in mi thingpui dâwrah a inhlawh ve thin. Mahse, kâr khat chuang an lockdown ta a, hna thawh tûr an nei thei ta lo. An pawisa lo khâwl ve tâng tâng chu, tûkin khan gas lâk nân a hmang zo ta si!

Nizânah chaw an chhum laiin an gas a zo a; chaw hel an ei tawh. A fanu naupang zâwk chuan a hre thiam lo hle hi a ni âwm e, ‘Â nu, ’ngati nge vawk châw kan hmeh a!?’ a tih chuan nu ber mittui a ko chhuak lo thei lo hi a lo ni a. Zâna mu reng chunga tui taka muthilh ve chu an harsatna a rei tawh. An tawngtai tawp zêl a. Tûkinah Local Council tlângau hmangin Pathian chhânna âw an dawng chawpchilh a; mahse, gas card an nei si lo! Mi hauh leh hrâwk pawh pawi sa zo loin an gas bûr ruak neih zawng zawng, an gas stove nêna la inthlun zawm reng chu phawiin a rawn chawi chhuak ve hi a lo ni a. Chuvang chuan a hnunga intlarte chu la hmasa tûrin a lo kian zêl zâwk a lo ni.

Retheite retheih êm êm dân hre thiam tûr chuan retheih ve phawt a ngai a; riltàm hrehawmzia hre tûr pawn tàm ve phawt a ngai. Mi tu pawh hi, eng dinhmunah nge an din a, eng hrehawm leh eng harsatna nge an tawh mêk tih hriatpui miah loa an pâwn lam lan dân avang ringawta dem a, hauh chiama thiam loh chantîr mai hi a awl thin ngawt mai. Mahse, Pathian malsâwmna an dawn ve tûr lo dâltu kan ni palh hlauh thei a nih dâwn hi maw le…