Thu hma theh
Kum 50/60 kalta khán Hyundai chu Korean company lian a ni ngai lo a, an car siam pawh rin tlâk loh, nalh lo leh thing, ‘mi rethei car’ tia sawi a ni thin. ‘I car-ah petrol thun khat la, Hyundai hlutna lêt nèn a inhen ang!’ tiin fiamthu thawh nán leh elsèn nán an lo hmang hial thin. Mahse, vawiinah chuan, tumruhna, beidawn duh lohna leh thawhrimna avàngin Hyundai motors chu khawvêla car company lian—Ford, Honda te leh General Motors te ûm phâk rual loha company lian leh rin tlâk niin, khawvêla car company lian ber pathumna a ni thei ta! A zin kawng erawh a awlsam lo a, a kawng pawh a ngíl hek lo!

Bul tanna tláwm
Mi pakhat a awm: a hming chu Chung Ju-yung a ni. Chhúngkaw rethei tak, lo neia ei zawng chhúngkua atanga lo zi chhuak ni mah se, March 21, 2001-a a thih khán, South Korea rama mi hausa ber a ni thei tlat! Kum 1915, November 25-a tùna North Korea huam chhúnga thingtlang khaw te tak tê, T'ongch'on-a lo piang, Hyundai dintu Chung Ju-yung hian zirna lamah chhuan tùr a nei lo—páwl ruk pass mai a ni. A puitlin hunah zirtirtu nih tum ve tlat mah se, unau pasarih zínga a upa ber a nih miau avàng leh a pâ puia ram lam hna a thawh a tûl miau avàngin, kum 14 mi a nihin sikul a chawlhsan a ngai tlat a ni.

Ni tin, kum tluana vàrtian atanga ni tlâk thleng, lo lama hna thawk chung pawha rethei taka khawsak reng chu hrehawm a tiin a rilru pawh a na thin hle. ‘Hetianga retheia ram lam hna thawk reng tùr leh, ni khat chaw kaw puar ei tùr pawh nei zo lo hian maw ka dam reng ang?’ tiin a inzâwt fo.

Fapa Tlàn bo!
Rethei rêng rênga a dam chhúng hun hman ral a tum miau loh avàng chuan, kum 16 mi a nihin a thianpa nèn retheihna tlàn bosan tumin in a chhuahsan ta tawp mai! Mél 15-a thui kè-in an kal a. Korea rama hmun hlauhawm lai ber tia an sawi thin, Paechun valley pèl rakin khaw pakhat Kogen (Kowon) an thleng a. Chutah chuan in sakna hmunah hnà an hmu hlauh. A hlawh chu tlêm hlê mah se Chung erawh a hlim tlat! A chhan chu, ama thawh chhuah ngei sum, a kuta a dawn theih vàng a ni. Mahse, a hlimna chuan thla hnih bâk a daih lo—a pa chuan rawn zawng chhuakin an in lamah a hruai hãw leh!

Mahse, Chung Ju-yung rilruah chuan ram lama hlo thlawh chu a lang thei tawh tlat si lo. April 1933-ah a thian pahnihte nèn Keijo  (tûna Seoul) lam panin an tlàn bo leh ngat. Mahse, a pa chuan a rawn zawng chhuak leh zêl si! ‘Páwl ruk bâk zir chhuak lo hi loa ei zawng tùr i ni tih intheihnghilh ngai suh!’ tih chu a pa hnên atanga zilhna anká a dawn a ni.

A pâ puia hna a’n thawh leh tauh tauh hnuah a pa bâwng hralh rù-in a vawi thum nán in a chhuahsan leh ngat! A bâwng hralhnain rél ticket a la a, Seoul a thleng. Account lam zirnaah inziak lût ve râwihin accountant hna pawh a thawk ve zuai. Mahse, thla hnih hnuah a pa’n a rawn zawng chhuak leh!

Buhfai semtu Chung-a

Chumi kum vêk, kum 18 mi a nih laiin a tum lì nán leh a tàwp nán in atang chuan a tlàn bo leh ngat a. A hmaa hna thawh tùr awm apiang thawkin a inhlawh thin. A kum lehah chuan hna tha deuh a hmu ta—buhfai zawrhna dàwr lian, “Bokheung Rice Store”-a buhfai semtu hna a ni. Chu hna chu a nghet ta deuh. Châw pawh mumalin a ei ve thei ta. A thawhrimna leh a rinawmna avàngin dàwr neitute rin a kai chho chak hle a. Thla ruk chauh a la thawk hman tihah an dàwr sum vawngtu, Store Accountant hna an chelhtír dèr mai!

Kum 1937-ah dàwr neitupa ber hrisèlna lohna avàngin a sumdàwnna chu kum 22 mi Chung Ju-yung-a hnênah chuan a hralh ta hial a. Dàwr hming pawh “Kyungil Rice Store” tiin a thlâk nghâl. Mi dang aia buhfai a hralh tlàwm bîk avàngin hlâwkna pawh a tél chak hle. Mahse, hlawhtlinna hmaah hian harsatna a ding thìn si a …

Car repair-na dàwr neitu
An ram awptu Japanese-ho chuan ration buhfai an rawn sem ta tlat mai! An sumdàwnna pawh tih tàwp a ngai ta hial! In lama hàw mai loh chu Chung Ju-yung chuan tih theih a nei ta lo! Kum 1940-ah khawpui lam a pan leh a. Japanese sawrkarin thawh an phal chin, a thawh theih záwng chu a ziak chhuak a; car repair hmanga sumdàwnna bul tan tumin loan, Won 3,000 a là a, “The A-Do Service Garage” dàwr a hawng ta a.

Hetih hun lai hian an ramah car repair mamawhna a sáng hle; mahse, dàwr a tlém hle thung. A awmchhun lahin rate sáng tak tak an inchhiar thin. Chung lah chuan car lam thil hriat a nei dèr si lo; mechanic thiam tak ruaiin khawpuia rate hniam berin a sumdàwnna chu a kalpui ta a. Amah dàwrtute a ngaih pawimawh thinna leh a duhsak thinnate chuan a sumdàwnna chu a ti hlâwk zual a. Mahse, buaina namén lo an tâwk leh ta! Vawi leh khatah kàng meiin a dàwr zawng zawng chu a kàng ral vek! An bungrua mai ni lo an customer-te motor an kawlsak lai zawng zawng pawh chu meivâpah an chang zo ta!

Chutianga chhiatna a tawrh lai pawh chuan, beidawnga indawm kun mai a tum lo. Loan a la leh a, car repair dàwr thar a hawng leh ngat a. Kum hnih chhúng lekin thawktu mi 70 lai a nei tling hman a; a dàwr pawh chu Seoul-a motor repair dàwr tha ber leh lian ber a ni ta hial mai!

Hlawhtlinna a chang chho tan chauh tihin buaina rál a lian leh ta—indopui hma chhawn lai Japan rál lian chuan kum 1942 khân Chung-a dàwr chu an bungraw siam nán an chhuhsak hmak! Tih theih dang nei lo Chung chuan an khaw lam panin a hãw leh ta a ni.

Beidawn duh lohna hrin chhuah Hyundai
Indopui pahnihna a lo tàwpa Japan an tlàwm khán, Korea paw’n zalènna an hmu zui ve nghâl a. Kum 1946-ah Chung Ju-yung paw’n garage chu hawng thar lehin a hmingah “The Hyundai Auto Service Centre” a vuah a. (“Hyundai” tih hi sap tawng chuan “Modern” tihna a ni.) Hna thawktu mi 30 ruaia bul tan khân, kum tàwpah chuan mi 80 a ruai thei ta hial! Sumdàwnna huang a zauh zêl a. Indopui avànga an ram din thar leh tùrin Hyundai Civil Industries te,  Hyundai Heavy Industries te a din bawk a. South Korea din thar lehna tùr atána sawrkar hna lian ber ber chu an chang ta zêl mai a. Chûng zínga sawi hmaih uiawm deuh chu, Hyundai Heavy Industries hminga khawvêla lawng siamna lian ber Ulsan-a a din leh Busan-a Kori Nuclear Power Plant a din hi a ni.

US-in Korea din thar leh nána project a siamte pawh a unaupa, English thiam nèn an thawk chho zêl a. Hlawhtling taka hna an thawh mék laiin kum 1950-ah buaina an tâwk leh ta! North Korea rál an rawn hráng ve leh thung! An sumdàwnna chawlhsan tùra tih luihna an dawng leh ta a—kut béngin an awm ta leng mai!