Harsatna kârah hna lian dang
Ni khat chu Chung chuan chanchinbuah US Army-in construction lama sumdáwng mi rinawm an mamawh tih a chhiar fuh hlauh mai a. Chu chu chhángin US Army quarters eng emaw zat a sa a; Chung leh a team te chu US lakah chuan an hming tha hle mai a. Hetih laia an rama project lian ber, Goryeong Bridge siam that hna pawh an hmu hlauh. Hna thawh nán loan lâk belhin an in leh lo te an hralh bawk a. An chhúngkua paw’n an retheihpui ngang mai. An elpuite nuihzat leh elsèn an tâwk chàmchí bawk. A chhúngte riltám leh chènna in leh lo pangngai nei loa an awm a hmuh chuan a rilru a ná a; mahse, a hna erawh puitlin ngei a tum tlat thung.

An hna thawh chuan South Korean Ministry of Interior mit a tlung tlat a; loan tam zâwk pûktír phalsak an ni a. Chumi zárah chuan Hyundai company chu South Korea-a company thang duang ber a ni chho ta hial. Mahse, chutah chuan Chung chuan lungawina famkim a la hmu lo. Arab ram lamah tuialhthei leh oil lam project lian tak tak a thawk tel a; hlawhtlin pawh a hlawhtlinpui viau. Kum 1960 a lo inher meuh chuan South Korea-a firm lian ber an ni pha ta hial.

An ram sawrkar chuan industry leh infrastructure-a an ram than nán Hyundai company chu an kut leh ke pawimawh tak an ni tih hriain tanpuina tam tak an pe bawk a. Hetih rual hian, sawrkar hian a tawng-páwng-paw duhsak ngawt lo tih hriat a tha. Chung Ju-yung-a taimâkna leh inpêkna te, a rinawm tlatnate hi sawrkarin a hmuh hmaih loh vàng a ni.

Sawrkar project lian tak tak thawk tel mah se Chung-a rilrua thi ngai lo, a hmaa a lo din tawh, ram buai avànga a lo chàn tawh—automobile industry din thar leh mawlh chuan a rilru a kap tàwp thei si lo a … 

Hei le, Hyundai Motors chu le!
1960s chho khán Korean sawrkar chuan ram páwn atanga motor lâk luh a khap a. Chutih rualin, ram dang company nèna thawk dùna car siam erawh a remti thung. Hetih lai hian South Korea ram chuan motor siam lama thiamna nei a nei mang lo a; a siamna tùr kháwl leh hmanrua lamah pawh a pachhe hle. Chu chu remchángah là-in kum 1967 khán Chung Ju-yung chuan motor company hlun, Ford Motor company thawhpuiin Hyundai Motors Company chu a din ta rup mai.

Thla ruk chhúng lekin Ulsan khawpuiah Hyundai factory chu an din fel dèr a. An car siam chhuah hmasak ber chu Ford Cortina mila an siam, Hyundai Cortina a ni. Great Britain ramah hralh tha hle mah se, Korea ram chhúng kawng chhe lutuk nèn chuan a inmil ve tlat lo. Hlawhtlinpui ai mahin an tlâk chhiatpui mah zâwk.

Buaina leh sèlna ànka kárah pawh …
An car siam chhuah hmasak ber a ‘flop’ mék laiin Hyundai chuan harsatna lian tak an tâwk leh ta! September 1969 khán an factory chu tui lianin a la hlauh! An hmanrua leh an kháwl tam zâwk chu tuipui mawng lamah an pil zo deuh vek a. Chu a kárah, ‘Hyundai chuan tuia pil tawh bungrua hmangin motor an siam,’ tih dâwt thuthang a la léng zui! Hei hian nasa takin company hming a ti chhia a, company chuan tlâk chhiat lam a pan a ni ber e.

Hetih lai hian mipui lam atangin Chung Ju-yung chuan a company ti tàwp mai tùra nawrna nasa tak a tâwk a. Mahse, Chung chuan, ‘Ka sumdàwnna pakhat a buai a, engkim beiseina nei lo ang maiin lang mah ila, ka kut hmang hian Hyundai sign pakhat mah ka la thla ngai lo ang; a hlawhtlin dàn tùr ka zawng lui tlat ang. Bul ka tan tawh chuan, a tàwp ka thlenpui tùr a ni,’ tiin a chháng tlat thin.

Mitsubishi nèn

Hun a liam a, ram chhúng kawng a tha chho a. Hyundai Cortina hralh pawh a ziaawm chho leh deuh ta. Mahse, an thawhpui US car company Ford lam chuan Cortina chu South Korea ram páwna thawn chhuah an remti ta tlat lo. Tin, Ford lam chuan Hyundai Cortina an hralhna atanga hlâwkna an hmuh chu a inzâta insem an remti lo zui bawk. Hêng avàng hian kum 1974 khán an inthen ta a ni.

Hemi hnu hian Mitsubishi nèn an inzawm leh a. Hyundai hian Mitsubishi engine leh kháwlte hmangin European engineer thiam tak tak an ruai a. Hyundai Pony chu kum 1975-ah an siam chhuak a; an hralh tha nghâl hle. South Korea-a car 10 an hralh zínga pakhat chu Pony anga chhût a ni. Foreign lamah pawh an hralh tha hle a; Canada-ah phei chuan hetih hun laia car hralh tam ber a ni pha hial. Hetih lai hian US-a hralh tùrin a ‘standard’-in a pha lo a, an hralh thei lo thung. Kum 1985-ah Hyundai Excel an siam chhuak leh a; hei hi chu US-ah pawh hralh phal niin a hlawhtling hle. A that mai bâkah a man a tláwm a, a kum khatnaah US-ah ringawt pawh Excel car hi 168,000 an hralh tling nghâl a ni.

Sèlna anká bawk!
Hlawhtlinna an chan mék lai hian sawisèlna an dawng zui reng tho! Hyundai car chu car man tláwm, rin tlâk loh, repair ngai zing … tiin mipuiin an sêl leh. Mahse, hêng sèlna anká hian Chung Ju-yun leh a hote chu ti hnual ngawt loin a ti tang sauh zâwk a. ’90s chhoah chuan car model hlawhtling tak tak—Hyundai Accent te, Sonata te leh Elantra te an siam chhuak a. Tin, 1998-ah Kia motors nèn thawh dunna thuthlung ziakin sum tam zâwk invest-in car changkãng zâwk siam chhuah hna an buaipui chho ta mup mup a ni.

Kum 2004 a lo thlen meuh chuan, ‘tih theih loh’ nia an ngaih thin, car company lian Honda pawh an el pha ta hial. Toyota tih lohah chuan Honda leh Hyundai chu car hralh tam ber an ni ta. Hei bâkah hian Hyundai chuan an car siam chhuah chu rin tlâk a nihzia fiah ngamin US-ah, mél 1,00,000 hnuai lam tlàn chin tán kum 10 chhúng warranty an pe thei tih an puang ta dum mai a. An car hralh chhuah a pung thúr thúr a, kum zabi 21-a car hralh tam ber zínga mi an ni pha ta hial a ni. Ram hrang hrangah an inzár pharh a; kum 1996 khán Hyundai Motor India Limited chu din niin Chennai kiang Irungattukottai-ah car siamna an rawn bun ve ta a ni.

Chung-a hun tàwp lam
Car siam bâkah Chung Ju-yung chuan kum 1977 khán the Asan Foundation a din a. Service hrang hrang: medical support, social welfare, research and development te leh scholarship fund te an buaipui thin. Tin, Hyundai Group hnuaiah hian motors bâkah Hyundai Elevator, Movex, Asan, Research Institute, Investment Partners, Global, Able Hyundai Hotel & Resort te leh Bloomvista te an awm bawk a ni.

1999 khán Chung chuan a fapa upa ber, Chung Mong-koo hnênah Hyundai Motor Company Chairman nihna a hlàn chhàwng a. Tûnah hian Chung Eui-sun chu Chairman niin Won Hee Lee chu president leh CEO a ni tawh a ni.

Hlawhtlinna ai chuan hlawhchhamna hian thil min zirtir nasa zâwk a. Miin a hlawhtlinna hi a hre reng tùr a ni lo; mi dangin hriatsak zâwk rawh se. A hlawhchhamna theihnghilha inzir tum ngai lo mi chu, a hlawhchham nawn leh thin ang,’ titu Chung ju-Yung chu March 21, 2001 khán kum 85 mi niin Seoul-a a inah a thi a ni. Vawiinah chuan Hyundai Motor Group hian khawvêl puma car hralh tam lamah Toyota leh Volgswagen Group chiah an chungah an awm tawh a ni.

Retheihna te leh harsatnate hi hlawhtlinna dàltu atána chhuanlam tling a ni ngai lo a. Tumruhna, beidawn duh lohna hi hlawhtlinna bul a ni tih a takin Chung Ju-yung-a nunah hian hmuh theihin a awm a ni.