Natna tam tak hi ven theih a ni a, mahni hriselna ngaih pawimawh nachang hriat hi tunlai khawvelah a changkang a, company liante phei chuan a thawktute hriselna hi ngai pawimawhin kum tin Annual Check-up a buatsaih thin a ni. Mahni mi mal private ang pawh hian ngaih pawimawh a tha khawp mai a, insawiselna nei hranpa lova in-check up hi ka lo dawngsawng ve ta zauh zauh bawk. Mi tam zawkin ching ila, inentawnna tha leh changkang ani tih i hre zel teh ang u. He column-ah hian kan lo tarlang fo tawh a. Natna kai theih loh Non-Communicable Disease (NCD) te hi tun modern khawvelah chuan mihring nunna suattu tam ber a ni titih ta. Chung zingah chuan Zunthlum (Diabetes), Thisen sang (Hypertension), Lung that lohna (Cardio-vascular disease) te leh Cancer te hi kan thih chhan tam tak chu a ni ta der mai. Kan sawi tak natnate hi a tam zawkah chuan a ven theih a; tin, tam tak chu nunphungin a thlen (Lifestyle Disease) anih vangin nun dan phung hrisel neih a pawimawh hle a, chumi zingah chuan ei leh in uluk leh taksa sawizawi te hi a pawimawh ber pahnih an ni bawk. Duhthusamah chuan kum 35 pel tawhte hi chuan kum tinin he Annual Health Check up hi neih tum ila, chu chuan natna tam tak lakah min veng thei a ni. A nih chuan health check up ah chuan engte nge kan tih tur ni ta ang? A dan pangngaiah chuan a hnuaia test te hi a pawimawh zual chu a ni: 1. Thisen test - Hemogram (Blood count, Hemoglobin), Blood Sugar (Fasting leh PP), Kidney Function Test te hi a tul zual chu a ni a. Thau lampang i nih emaw zu in thin i nih chuan Liver Function test leh Lipid Profile te hi ti tel thei la duhthusam a ni. 2. Urine leh Stool Routine Examination. 3. ECG (lung enna). BP sang nei leh damdawi ei lai i nih phei chuan ECHO hi ti tel thei la a tha zual. 4. Upper GI Endoscopy. Hei hian chaw kawng leh pumpui a en a. Chawkawng leh pumpui cancer te a tam em avangin hei hi tih ngei theih a tha hle. 5. Mei zu nasa i nih chuan Chest X-Ray ti tel ngei thei la. 6. Ultrasound hi a him avangin ti tel ngei thei bawk la. Mit leh kala lung awmte a hmu thei a, lung te pai tam tak hi an insawisel kher lo. 7. Hmeichhia i nih chuan Pap Smear tih ngei a tha hle. Chhul hmawr cancer hi a hriat hma theih a, zai hma chuan a dam hlauh thei bawk. 8. Hmeichhia i nih chuan mahnia hnute in-check dan ‘Self Breast Examination’ hi doctor te zawt la. Hnute bawk, cancer intan tir tam tak hi a hriat theih a ni. 9. Hmeichhia pasal nei lo, fa nei lo te hi chi bawm natna, a bikin cancer lakah te an derthawng zual a, Ultrasound tih fo theih a tha hle. Health check-up kan neih hian kan report te chu doctor te entir leh kher thei ila, fel lo a lo awm pawhin enkawlna dawn hma a tha fo. Internet kan khawih nasa tial tial a, tam tak chuan natna an neih te hi Google-ah an zawng a, information tha tak tak an dawng mai thei ani. Mahse chutih rual chuan practical a doctor experience nen a inang lo fo thin. Chuvangin google atanga information kan dawn hi a dik leh dik loh emaw, a him leh him loh te hre turin doctor zawh fiah nachang hre thin ila a tha hle.