Zawhna: Ka pu, hmeichhia kum 19 mi ka ni a, pasal ka la nei lo. Thla thum vel kalta atang khan ka hmai a rawn bawl nasa thut mai a, skin doctor pawh ka inentir tawh a, a ziaawm thei reng reng lo. Engtia tih chi nge ni ang? A hrehawm ka ti khawp mai a, thiante bulah pawh awm a nuam thei lo, min puih theih chuan ka lawm hle ang.

Chhanna: I kum ang zatah hian hmaibawl awm duh hun lai a ni hrim hrim a, tun hnaiah hian nangmah anga insawisel, investigation rawn ti hi kan lo dawngsawng fo mai. A hrehawm duh hle ang tih a rin theih a, a na emaw nuam lo ai mahin hmel a tisawrbawl te hi nang ang rual tan phei chuan confi a tihniam sawt ngei ang. Skin doctor te i lo inentir tawh a, an damdawi chawh che i hmang ngei anga, i hmanhmawh deuh te pawh a ni mahna. Engpawhnise, hemi chungchang hi mi dang te lo chhiar atan pawh kan ziak ve hrim hrim ang e.

Hmaibawl “Acne” hi tleirawl hun lai hian a awm duh zual a, hmeichhia ai mahin mipa hian an nei duh zawk a. Hmaibawl nasa zual hi chu 20% chauhin an nei niin an sawi. Taksa a hormones-in a rawn thlen a ni a, heng hormones te hi tleirawl hun lai hian taksa peng hrang hrang insiam puitlin nan a level a inthlak nasa a, chu chuan a rawn thlen duh zual a ni. Hmeichhia ah phei chuan an thi neih dawn ah a awm duh zual hle. Thi neih fel lo vangin a awm thei a, a bik takin chibawm lam fel lo Polycystic Ovaries natna nei te hian an nei duh zual hle. Mipa tleirawl body building ti nasa leh chumi atana steroid ei te hian an nei duh viau bawk.

Acne hian hmai bakah hnungzang leh awm (chest) a khawih tel ve fo a. A nasa zual ah hian a sawrbawl (Nodulo-cystic Acne) ang chi a awm thei bawk. Hmaibawl deh sual vang te, hmai enkawl fai tawk loh vang te, thlan ngah lutuk vang te pawhin chutiang ang chi chu a awm duh zual a ni. Hei bakah hian ei leh ina thil mawm lam chi ei hnem vang te, zan mut tlem vang te leh. stress nasa avang te in a awm thei bawk.

Hmeichhiain heng harsatna an neih chuan hmeichhe lam fel lohna a awm tel nge tel lo hriat nan ultrasound a chhul leh chi bawm enchian te a tul fo va. Blood sugar sang nei ah te hian a awm duh avangin check a tha viau. Zu in nasa ho hian an nei duh a, tui in tam a pawimawh hle bawk a ni.

A enkawl danah chuan hmai enkawl uluk a pawimawh hle a. Hmai phih pawhin sahbawn pangngai aiah facewash nem chi deuh hman te a tha a. Hmai hruk hul pawhin towel a hru vak vak lovin a deh a deh ro tur a ni. Pawn nisa hnuaia chhuah dawn chuan sunscreen tha ve deuhte pawh hman a tha ang a, zan mut hmaa uluk taka phihfai thin pawh a tangkai thei viau. Hmaibawl reng reng chu deh loh a tha ber a, a zual deuh anga a lan pawhin deh aiah silfai hnua antibiotic ointment pan taka hnawihte hi a tangkai zawk thin. Skin Doctor te inentir ngei nise, an damdawi chawh ang apiang kim leh hunbi thlapa ei/hnawih hi a tangkai ber ani tih hriat a tha. Ngeih lo nia inhriat pawhin midang thurawn la mai lovin in doctor ngai bawk chu pan leh ula, hma i sawnpui zawk ngei ang.