Kawrlum lukhum nei vs Jumper: Hmãnah chuan kawrlum chi hnih kan nei thin—kawrlum tawp leh jacket. LT Jacket, a bán lâk thlâk theih ang chi kha chu mi neinung deuh fate hâk tùrah kan ngai deuh. LT Jacket bán bùl kha ‘Bomber jacket’ a nih kan hre chuang lo; LT Jacket bán bùl a ni tawp mai.

A hnu deuhah kawrlum lukhum nei a rawn chhuak leh. Kan ngai sáng leh êm êm mai. Hâk khat kha `150-ten a man a intan em maw kha le… ? Ka chiang ta lo. Chuti chuan, kawrlum chu chi thum kan lo nei ta a. Mahse, chutiang kawrlum, ‘kawrlum lukhum nei’ chu kan ngai sáng reng lo thuai a—‘Jumper’ an tih chuan a rawn luahlàn ta daih! Kawrlum lukhum nei `200/- man vêl a nih laiin jumper man chu ` 500/- chuang a ni daih. Mi hausa faten an ha nasa a, awh bâk chan kan nei ngai lo!

‘Jumper’ pawh kan ti ‘jumper’ reng ta lo zêl a, ‘Hoodie’ a ni leh daih tawh! Nge, second hand a nih chuan ‘Jumper’; showroom-a mi chu ‘Hoodie’ tih zâwk tùr tih pawh ka bo ta! 

Tûn hnu, chhúngten bazara min tirh chánga pocket money tùr ei rûk dàn ngaihtuah rân chunga ka thil lei man tihsàn (der) dàn ka thiam tâk hnu hian, kawrlum lukhum nei te, jumper te leh hoodie te hi thil thuhmun vek an ni tih ka hre thiam ta! Ka fing sawt a, jumper leh hoodie ka ngaih sànna a hniam sawt! Jumper leh hoodie te ai chuan kei chuan, kawrlum lukhum nei kha lum fé zâwk hian ka hria a; hâk leh ka châk thin ngawt mai. Khatiang kawrlum lukhum nei ha chunga jumper leh hoodie ka ngaih sàn hun lai kha ka ngai riau thìn. Tùna ka fin ve tâk deuh hnu hian ka rilru hi a hah zing ta fo zâwk si a!

Kekawrtê vs Underpant: Hmãnah chuan ‘underpant’ hi ‘kekawrtê’ a ni vek thìn; tùna plastic barrel zawng zawng ‘Sintex’ a nih vek ang deuh hian! Han ti ve khanglang ila, kan naupan lai khán, hmai kan phih khàt ang chiahin kekawrtê kan ha khát! Tarra kekawrtê a trendy hma-in Burma kekawrte tial a lãr. Inkhâwm ní, Pathianni-ah kan ha ve thìn. Sikulah chuan hâk tel kha a hnawk tlat. Hmeichhe lam chuan an ha hmá deuh.

Sikul pheikhawk pawh naughty boy shoe vek a ni. A chi dang a awm lo. Chumi chhîpah chuan dárthlalang them kan táwn thìn; hmeichhe kekawrte hâk rawng en rûk nán tiin. An hriat lohin an pawnfèn hnuaiah kan ke kan va rawlh a. Dárthlalang atangin an kekawrte hâk rawng kan hre thei thìn. Rawng ropui an ha ngai meuh chuang lo—Burma kekawrte tial tih loh chu!
 

Kan inkhualtelem leh inbailem-chhuan chángin, nu lem leh pa lemah te kan insiam thìn. Chûngah chuan ‘in-eng-lo-lem’ te pawh kan chíng thìn nia! A tak takin kan ti ngai chuang lo. Kan tih tùrah pawh kan ngai ngai lo … tak tak.

Vawiinah chuan kekawrtê-te chu ‘underpant’ an lo ni ta! Hmeichheho phei chuan ‘panty’ te an ha leh zêl tawh! Chu mai chu duhtâwk loin ‘thongs,’ ‘bikini’  leh ‘G string’ te an nei hran leh ta zêl! Kekawrtê kan hâk that peih loh lai aiin kap lam thawmhnaw kan inbel uluk tâk hnu hian inpáwngsual a tam daih zâwk a; hri tha lo vei kan pung nasa zâwk bawk!

Very vs Period: Hmeichhe lam kan sawi ta sâ sâ, tawp leh tenawm lamah ngai lo ila, hmãnah chuan hmeichhiate hi thla tin an ‘Very’ thìn. A awmzia chu kan hre vek mah ila, ‘Very’ tih awmzia hi kan dictionary-a inziak nèn a inang lo—a lam tàwi nèn chiah a inmil! An ‘Very’ lai chuan an dam lo ti tih thìn. An thin pawh a chhia. Dàwrah Comfit an lei thìn. Company hrang hrang product pawh hmang mah se, a vãi khán ‘Comfit’ an ni vek! Ka sawi awmzia chu, Stayfree emaw Whisper emaw pawh hmang se, ‘Comfit’ an ni, ka tihna a nih chu!

Vawiinah chuan hmeichheho hi an ‘Very’ peih ta lo—an ‘Period’ zêl tawh! A tuamna pawh an nei changkãng tawh. Eng liner-ner te pawh an hmang tel tawh. An ‘that loh lai’ a ni tih pawh an hriat theih tawh loh. Mahse, hmãna thla tin an ‘Very’ ziah thin lai ai khán vawiinah chuan ‘Period lo tluan’ an pung ta zâwk a. Nau pai theih lohna damdawi hralh a kal tawh zâwk mai bâkah Biak in hawnga innei an tlém daih tawh zâwk bawk!

Simco/Simax hair fixer vs Wax: Hmãnah chuan mipahoin sam set nán hair fixer kan nei—Simco hair fixer leh Simax hair fixer—a búr hring ngei mai chu! Sam set-na chi chu—chu zawng chu! Sam tih mawm nán tel tak, a nei deuh fá tán Keokerpin leh Almond drops hair oil a awm leh. A hnu fé-ah Promina te, Ace haircream te a rawn chhuak leh. Ace hi a mawm êm êm mai a, hmai a ti bawl vek thei! Mahse, a rimtui a, scents rimtui dang hman a ngai hran tawh lo.

Hair fixer hmanga sam kan design khán lu tina vek thei khawpin sam a vawng khawng thìn. Tin, sûk loh chuan (Inrinni inbual bâk lú su ngai hek lo!) kár khat chhúng a daih thei hial! A hek loh avàngin kan inhman tâwm nasa thìn hle. Lu sûk nán shampoo a la chhuak lo a (kan hre lo a ni zâwk ang!), inbual nána kan sahbon hman thin, sahbon sen (Lifebuoy) emaw Liril sahbon emaw kha lu sûkna a ni leh nghâl tawp mai.

Vawiinah chuan sam design-a duh duha set-na kan nei kim tawh e! Hollywood-a an hman thin ang Wax te pawh kan hmang pha ve ta. Mahse, mipa lu phut kan tam telh telh thung!

(Kár lehah chhunzawm tùr…)