Zawhna: Ka hnar lehlam hi kumtluanin a tui reng mai a. A chang chuan hnap fim hi inrin hman loh lekin a rawn dir baw leh zuai thin. Khawvawt thlasik lai hian a zual thin a, Doctor ka rawn tawh te chuan ui leh zawhte in­chhung a kan vulh vang, Allergy chi khat anih hi tiin damdawi te min chawh a, mahse a reh thei lo a, hei kum engemaw zat ka nei tawh. Phai Doctor pakhat chuan sinus tiin zai a ngai a ti a. Mahse Sinus zai­tir ho hi an dam hlen bik lo in ka hria a, chuvang chuan zai ka duh lo. Engtia enkawl tur nge tih min hrilh theih chuan ka lawm ngawt ang.

Chhanna: I insawiselna hi hnar leh sinus lam a ni ber a, chuvangin kan hnar leh sinus awm dan hi tlem han sawi hmasa ta ila. Kan hnar chhungah hian kan hmai ruh chhung si ah hian kaw te reuh te te a awm hlawm a, chung chu sinus kan tih chu a ni a. Hnar zawn ah te, biang zawn leh chal ah te heng sinus hi an awm neuh neuh a ni. Heng sinus te hi kan boruak thawk luh lo filter tu leh lo ti hnawmtu an ni a. Tuihnang an lo khawl ve a, boruak kan thawk luh kha an lo ti hnawng thin a ni.

Sinus tia kan sawi mai thin hi sinuses vung vanga lo thleng sinusitis ani zawk a. Kan sinuses te hi tuihnang a tam lutuk emaw, a vun vang te in boruak hi a filter thei lo thin a. Chu chuan hnarping a thlen ta thin a, chu bakah chuan hnap tuihnang a siam tam a, a nasa zualah chuan khawsik te, hnar a thawk harsat te a thlen ve fo bawk thin a ni.  Chutiang ah chuan sinuses kua lai clear nan steam inhalation (tuilum hu hip) te leh hnaptui ti fim thei nose drop thlawr te kan chawh thin a ni.

Sinus harsatna hi a chhan hrang hrang a awm thei a, chung zingah chuan tuna i sawi allergy (thil huat neih) hi a common ber pawl chu a ni awm e. Mihring tu pawh mai hian eng thil huat (allergic) zawng emaw hi chu kan nei deuh fur awm e. Allergy thlentu (allergens) hi a tam khawp a, chung zingah chuan a common zual te pawh a awm a. Hmuar lam chi reng reng (thawmhnaw hmuar, hmunhma hmuar, room hnawng leh ro lo) te hi allergy an thlen duh hle. Heng bakah hian i rawn sawi ran kan kawl – ui leh zawhte te hi an hmul ah hian allergy thlen theitu a awm nual niin an sawi bawk a, enkawl rau rau chuan uluk an ngai hle a ni.

Seasonal allergy an tih mai hi a awm common leh hle bawk a. Sik leh sa inthlak apianga sinus problem nei hi an thahnem phian bawk. A then chu ei leh in lam huat nei te, damdawi huat bik nei te an awm thei bawk. Allergy hi kawng hrang hrangin a lang chhuak thei a, vun vual te, thawhah te, pum lam nuam lo te thlengin a thlen thei a, chung zing­ah chuan hnaptui insiam tam hi a common pawl tak a ni leh bawk awm e.

I insawisel dan atang hian allergic rhinitis kan tih i nei anih duh hmel hle mai a. Chutih rual chuan hnar chhung fel lo (entirnan hnar kua daidangtu bang kawi – deviated nasa septum) te pawh hi a awm thei bawk a. Sinuses lam fel lo, in block te pawh a awm fo thei bawk. Chutiang avang chuan ENT Specialist te inentir thei la a tha hle mai. X-Ray emaw CT Scan tih te pawh a tul thei a. Tin, allergy test te pawh a tih theih tawh a. Han inentir nawn leh thei la, uluk deuhin i harsatna te pawh sawi chiang la, an puih theih ngei che ka beisei.

A enkawl dan chung­chang ah chuan damdawi han inchawh ngawt kha a chi hmel loh a. Nangmah ngei khan huat zawng i neih leh neih loh hriat han tum la. Kan sawi tak hmun hnawng awm thei tih ro te, thawmhnaw ro tha lo hak loh te, ran in vulh anih pawhin a enkawl thiam leh tihfai dan thiam zawk te rawn thei la. Mahni thu in damdawi, a bikin allergy damdawi te ei mai mai lo bawk la. Hetianga hma i lak chuan engemaw ti zawng talin a puih ngei che ka beisei bawk.