Zawhna: Ka pu, hmeichhia kum 21 mi zirlai ka ni a, kumin March ni 4 atang khan nitin deuh thaw ka hnar hi a thi ziah mai a. A chang chuan ni 1 te a reh ve a, a chang chuan ni 1 ah vawi 3 te a thi thin a. April thla erawh kha chuan tlemin a reh deuhin ka hria a mahse tun hnai ah hian a rawn thi leh ta zeuh zeuh mai a. Ruihtheihthil engmah ka ti lova, ka hrisel tha pangngai a, engmah natna benvawn han sawi em em tur ka nei bawk silova. Khawngaih takin min pui thei ang em?

Chhanna:  Mihring hnar chhung hi vun pan chi kan tih mai, mucous membrane in a tuam chhuak a, hnar bang chunglam ah he mucous membrane hnuaiah hian kan rim hriatna min petu olfactory system a in zar pharh bawk a, tin, thisen zam tereuh te te tam tak a awm bawk. Hnar bang nena inzawm hian sinus engemaw zat a awm bawk a, heng te hian kan boruak thawk luh a lo filter in a lo control thin bawk. Thisen zam hi a te chi a tam a, chuvang chuan engemaw tih palh vangin a thi awl bawk a ni.

Hnar thi chhan hi a hrang hrang a awm thei a, a common zual te lo sawi dawn ta ila. A hmasa berah chuan injury (tihpalh) vangin a awm duh hle. Hnar kawm, hnar kheuh chin avang te in hnar thi hi a awm duh hle a, kut fai tawk lova hnar chhung khawih chin phei chuan infection a awm duh hle. Chuvangin tihfai pawhin earbuds huh te hian ti fai thin ila a him zawk. A dang leh ah chuan infection engemaw vangin a thi duh bawk. Allergy nei, hahchhiau nasa te hi an hnar a thi duh phian bawk. 

Sinus vung (sinusitis) avang hian hnar thi a awm thei leh. Sinusitis hian boruak in filter tur te a ti buai a, rim hriatna te pawh a ti buai thei a, a bul hnaia hnar tuamtu vun pan hi a ti vung thei a, chu chuan hnar thi a thlen thei bawk a ni. A dang leh ah chuan hnar kua pahnih daidangtu bang nasal septum hi a kawi a awm thei a, chu chuan hnar thi a thlen leh thei bawk. Tin, foreign body kan tih mai, pawn lam thil tang vang te in a thi thei a, bawk (tumour) vangin hnar thi a awm thei bawk.

Engpawhnise, ENT doctor hnenah i la inentir lo ani mai thei a (i sawi loh vangin), i hnar hi check chian tir thei la a tha hle mai. A chhung lam te an enchiang anga, fel lo engemaw tak a awm ani thei a, chuvangin hreh lovin lo pan phawt mai la, an pui thei ngei ang che.