Kan ei leh in a tha tial tial a, kan chet tlem leh lawi si avangin kan rit tial tial bawk a, ke a kal aiin lirthei kan hman tam tial tial avang leh, awmhmun hnathawh, taksa chet tlem zawnga hna kan thawh tam zawk si avangin hnungzang kham leh na kan tam sawt hle. Chutih rualin taksa sawizawi dan dik si lo, phur thut a infiamna lam tih leh chiam kan chin thin avangin hnungzang na mai ni lovin ruh chuktuah fel lo, inherh, tihrawl tangmar (muscle sprain) an awm fo bawk. Pathian min siam dan hi a fuh em em mai a, kan hnungzang ruh hi motor duhthusam a duan ang mai hian shock absorber tha tak takin a kar cheh thap mai bawk a. Tihpalh veng turin tihrawl chak pui puiin a hual vel bawk a, a chhan pawh a chhung kaw lai ah hian kan thazam pui Spinal Cord a rawn inzam thlak vang a ni. Chuvangin engtin nge kan hnungzang hi kan ven ang a, kan enkawl uluk ang tih te, harsatna lo thleng fo thei lakah te engtin nge kan ven ang tih te hi tun tum chu i han sawi dawn teh ang. Hnungzang na hi a chhan hrang hrang a awm thei a. Chungte chu: 1. Mechanical: A common ber pawl chu hnungzang ruh inkar thamtu mawih (intervertebral disc degeneration) vang ani. Kum a lo tamin heng a thamtu hi a lo khawng tial tial a, shock a zo lo tial tial a, a khem hma a, a rualrem loh chuan na a lo insiam mai thin a ni. Kan sawi tak angin kan hnungzang ruh tihpalh laka vengtu tihrawl chak pui pui ho hian an ven luatah na an thlen thei bawk. Hemi disc hi a keh thei a, a rawn dawk chhuak thei bawk a, chungte chuan na a thlen thin bawk. 2. Injuries (intihpalh): Accident te, taksa inherh sual palh te, infiamna lama intihpalh vang te in a thleng thei a. Kum tam lamah phei chuan ruh mawih (osteoporosis) avangin ruh keh te a thleng fo bawk. Rit chawi nasat vang pawhin hnungzang ruh tuamtu tha (ligaments) thler a awm thei a, chung te chuan na a thlen fo bawk. 3. Natna thenkhat vang: Ruhseh te, hnungzang ruh kawi (scoliosis) vang te leh chi dang dang ruh lam fel lohna avang te in hnung na a awm fo bawk a. Naupai vang te, kal lungte awm emaw kal infection te, chhul lam fel lo (endometriosis te hi a common zual) vang te pawhin a awm thei a. Ruh infection te leh, cancer hnungzang ruh a darh vang te pawh hian a awm fo bawk. Heng kan sawi atang te hian hnungzang na thlentu common zual te leh a inven dan te lo tarlang leh ila: 1. Taksa sawizawi mumal silova infiamna lam tih nghek vang. Kar tluanin hun buai takin kan hmang a, kar tawp a lo thlenin infiammi te tih ang ti ve thei ni awm fahranin physical sports (badminton, football, tennis etc) kan han ti ve hluai a. Taksa a lo lum a, game hnih khat duh tawk ta mai lovin kan ti ta chiam thin a. Hetiang hian hnungzang an tina fo a ni. Infiamna lam kher lovah pawh in lama chet, bawlhhlawh paih, inchhung bungrua rem, huan lam chet ang te pawh hi, taksa sawizawi thang kan nih loh chuan hnung na thlen fo tu an ni. A invenna atan chuan nitin taksa stretching leh exercise ho tete lo tih lawk thin hi a tha hle a ni. Tin, infiamna tih hmaa warm-up neih hmasak a pawimawh hle bawk. 2. Thil rit chawi dan dik loh vang. Zo anga kan inhriat pawh kan chawi dan a dik loh chuan hnung na a thlen fo thei a ni. Chuvangin rit chawi lam kan tih dawn reng reng chuan khup char chunga chawi loh tur a ni a, kawng thlep zawnga chawi loh bawk a tha. Kan rit chawi tura kha kan taksa hnaih thei ang bera awm tir tur a ni a, kan chawi pawhin kan zak zawn aia sang emaw khup aia hniam a chawi loh hram bawk tur a ni. Rit kan chawi laiin kan kawng atangin hawi sawna inher tir loh tur a ni a, kan ke kan ti che zawk tur a ni. Tin, kan rit chawi tura chu kan taksa rihna hmun 5 a thena hmun 1 (1/5) aia rit ni lo hram bawk se. 3. Kan thu nasa lutuk. Kan mut leh ina kan thut bakah, office lirthei in kan kal a, office ah nilengin kan thu leh bawk a, kan taksa hi a che tlem em em mai a ni. Kan intervertebral disc (hnungzang ruh kar thamtu) te hi thisen supply an nei chau a, an nal reng theih nan chuan taksa tuihnang an dawnsawn fo a pawimawh a, chumi tur chuan taksa chet tam a pawimawh em em a ni. Position tha lo ber pawla an sawi chu thu chunga hmalam zawnga awn hi a ni. TV ena kan thut pawhin duhdah tak ni lovin, hnungzang ruh ngil thei zawnga thut hi a pawimawh em em a ni. Kan hnathawhna hmuna rei tak tak thut ngai anih chuan a hnuaia mi ang te hi tih lo tum la, i hnungzang ruhin a ngeih phah anga, na pawh i nei nep ngei ang: 1. Minute 20 dan velah thawh kan a vei kual tum tur. Computer a hnathawk i nih chuan min 20 dana screensaver rawn lang turin set la, chumi hunah chuan i tho anga i che kual dawn nia. Anih loh pawhin phone chhan ngai apiangin ding chungin biak tum la. 2. Lehkha chhiar ngai chi (newspaper tiamin) i mit zawnah keng la, chu chuan i hnungzang ruh a tingil bawk ang. 3. Thutna ah i thut laiin i kephah khan ngil takin chhuat remin lei a rap tur a ni. Chu chuan i hnungzang curve a veng thei a ni. Hnungzang na i neih fo chuan mahni thua innuai/inzuttir mai lovin doctor rawn hmasa thei la, a serious leh serious loh hriat hmasak a pawimawh hle a. A chin tawk awm lova inzut vak vak te hian a ti zual thei a ni. Sawi tur tam tak awm mah se duh tawk phawt mai ang.