Ka pu, zawhna pahnih ka lo zawt teh ang che. 1. Hahchhiau leh haham kan tih hi engvanga lo awm nge? A thatna sawi tur a awm em?  2. Bible a kan hmuh Lota kha a fanu ten wine in an hrai rui a, an inpawl tir a, an rai ta tih kan hmu a. Mahni fanu leh hmeichhe dang pawh hre hrang thei lo khawpa rui kha a mipatna a chhuak thei dawn emni? Hetiang a rui, common sense bo thak khawp ah hian mipa thil hi hman tlakin a khawng thei ang em, medical takin?

Chhanna: I zawhna hmasa zawk hi han chhang phawt ta ila. Haham i tih hi ham (yawning) zawk anih hmel a. Hahchhiau (sneezing) bik hi lo sawi ta ila. Kan hnar chhung leh hrawk tuamtu vun hamda (mucouse membrane) te hi an sensitive khawp mai a. Bawlhhlawh engemaw ti buaitu a awm chuan an tuamtu tihrawl te sang vak khan hahchhiau hi a rawn siam ta mai thin a. Chutiang zawnga ngaihtuah chuan reflex pawimawh tak a ni kan ti thei ang. Chutih rual erawh chuan hahchhiau nasa, hrehawm khawp leh ninawm khawpa awm hi a awm thei a, chung erawh chu a tam zawkah thil huat (allergy) vang a ni duh viau.

Ham (yawning) erawh hi chu mutchhuah leh awmdan nin (boredom) vanga lo awm ani duh viau a. Mahse tunhnai mithiamte zirchianna ah chuan kan taksa in engemaw tak tih hlawhtlin a tumna atana taksa a buatsaihna ang zawng deuhin an sawi bawk. A dik leh dik loh erawh sawi thiam a har phian lawi a. Engpawhnise, kan mut a chhuah emaw kan chauh deuh te a kan ham hian kan thawk a ti tha ni te pawhin an sawi a, a awihawm phian bawk.

Zu chungchang hi lo sawi leh dawn ta ila. Zu hi vasodilator a ni a, chumi awmzia chu thisen zam ti zautu tihna a ni mai a. Mahse chu chuan zun tam a thlen a (diuretic effect tiin an sawi bawk), an zun tam khan an zun chhuah zat tui an in leh loh chuan taksa a tui tlakchham (dehydration) a thlen a, chu chuan thisen kal vel a ti muang ve leh thei thung bawk. Pentawng ah pawh hian sam a ro duh an tih fo chhan hi a ni.

Mipa zu avanga an ruih viau pawh hian an sazu chu engemaw chen a fuk/khawng thei tho mai a, mahse harhfim chunga a khawng ang tak ai chuan a nep deuh ang. Tin, mu leh mal hre lo khawpa an ruih phei chuan a khawng a kha a daih rei thei lo fo zawk thin. Mipa hrisel pangngai sazu na na na chu hmeichhe kut chuan a ti khawng duh lo thei lova, an rui deuh anih pawhin hmeichhia in an sawngbawl uluk chuan a khawng thei tho ngei ang. Lota chungchang hi erawh a chipchiar in kan hre hauh lo mai a, bible inziah dan kha a ni mai a. Sawi thui a har phian mai.

Mipa sazu khawng/fuk chungchangah hian zu hi a tawk chauh a in chuan kan sawi angin thisen zam a tih zauh avangin mipa sazu pawh thisen lut tam vanga khawng a ni mai a, chuvangin zu tam lo taka in hian sazu chu a ti khawng hma zawk fo. Mahse, kan hriat tel tur chu nerve (thazam) lam a function that a pawimawh khawp mai a. Zu in nasa te hian nerve chak lo an nei duh khawp mai a, chuvangin sazu khawng tha thei lo (erectile dysfunction) insawisel pawh an awm fo mai.