United States sorkarin hriselna kawnga an ram hmasawnna tehfung a hman, The Lancet-in a buatsaih (https://www.thelancet.com/journals/lancet/article/PIIS0140-6736(11)60418-2/fulltext)-ah chuan damlo emaw insawiselna neiten inentirna an pan awlsam theih dan te (access to healthcare services), hriselna lama kan inenkawlna that dan te (quality of health-care services), kan nungchang leh khawsak phung hrisel dan te, kan chenna khawvel him dan te (physical and social environment), natna benvawn awm zat te, rilru lam hriselna te, intihpalh vanga harsatna thlen dan te (entirnan accident), nu leh naupiang hrisel kawngah te, vaihlo leh zuk leh hmuam lam chi hman kawngah te, ruihhlo hman sual te leh sex hman kawnga fimkhur dan te a ni.

Hemi bakah hian hrisel kawnga hma an sawn zel theih nana an tum (Objective) te chu – cancer vanga thihna tihtlem te, lung natna vanga thihna tihtlem te, thisen sang leh zunthlum natna tih tlem te, vaihlo hman tihtlem te, kumtling lova naupai tih tlem te, hrileng laka natna thleng (infection) tihtlem te, naupang thau lutuk (childhood obesity) tihtlem te leh, rilru lam natna, a bikin Depression tihtlemte a ni bawk. Ram changkang leh hmasawn ber an ni a, an tehna han en pawh hian a sang viau mai a, keini ram retheiah hetiang ang target lo insiam ve ngawt chu a har kan ti pawh a ni mai thei e; mahse, heng kan tarlan thenkhat hmang hian keini ram bik hi eng nge kan dinhmun tih han thlir ve chhin dawn ta ila. Statistics ka nei kim lo nangin ka lo tawnhriatte atangin kan insiam that theihna lai te i ngaihtuah dawn teh ang.

Natna inkai theih communicable disease lam hi thlir hmasa ta ila. Tunhmaa kan buaipui nasat zual Malaria hi kan ziaawm chho ta viau mai a, a lawmawm hle a. TB hi kan ziaawm tan laiin HIV avang hian kan hnungtawlh leh niin a lang a, a chhan pawh HIV+ te zingah hian TB hi a common hle mai a, multi-drug resistant TB (MDR-TB) pawh kan pun belh hret hret niin a lang. Kawthalo hrileng chiam hi kan nei khât ta viau a, ek in mumal tak kan hman tam vang te pawh a ni anga. Thisen leh taksa tuihnang atanga inkaichhawn theih natna lamah erawh kan dinhmun a ngaihtuahawm viau mai. HIV&AIDS chu kan hriat sa angin India ramah kan sang ber a, Hepatitis B leh C pawh hi kan thahnem ta hle mai a, ruihhlo inchiu thinte zingah phei chuan Hepatitis C hi a vei an tam hle (SHALOM-a an test-naah chuan 86.8% vel laiin an kai).

Natna inkaichhawn theih loh Non-communicable disease lam hi lo thlir leh ta ila. BP sang kan pung viau mai a, zunthlum (Diabetes) nei pawh kan tam ta khawp mai. Chhungkaw tam ber hi chi (salt) kan heh niin a lang a, chaw ei a chi chhawp lova ei thiam lo chhungkua hi kan thahnem hle niin a lang. Chi ei hi kan in-control loh chuan BP sang leh Kal tha lo (Kidney Disease) nei kan pung zel ang. Tun hnai chho hian sa (meat) kan ei nasa ta viau mai a, street food leh fastfood lam kan ei nasa hle mai. Multinational brand KFC, Domino’s tih te an lo luh belh zel a, kawng sirah sa hem ei mai theih chi kan chhawp tam tial tial bawk a, hei hian zunthlum mai bakah thin lam tha lo, Fatty Liver kan tihte a la rawn thlen tam tial tialin a rinawm. Lirthei ah kan chuang nasa a, kan taksa a che tlem bawk si a, kan derthawng sawt hle; tunhnai hian kum 60 hnuai lam Stroke leh Heart attack nei kan pung niin a lang ta reng a ni. Naupang thau lutuk pawh hmuh tur an tam sawt hle bawk. Cancer phei chu India ramah a tamna ber pawl kan ni bawk.

Ruihhlo hmansual lamah hian hma kan sawn thei lo khawp mai a. A ken tel harsatna chi hrang hrang, a chunga kan sawi te tiamin kan tawng chho mek bawk a ni. Sexual behavior lam nise kan inthlahdah khawp mai a, a invenna hman nachang hre lo lah kan thahnem bawk si a, kumtlinglo emaw kum la naupang tak chunga naupai pawh hi data mumal tak awm lo mah se kan thahnem sawt niin a lang. Mahni thua damdawi dawra nau tihtlakna damdawi lei mai a theih bawk avangin data mumal tak neih a harsa. Thalai zingah mental disorder nei kan pung niin a lang bawk; mahni intihlum kan thahnem sawt tlat hian ngaih a ti tha lo lehzual. Road traffic accident hi rui chunga lirthei khalh leh kumtlinglo chunga khalh vanga thleng a tam hle. Heng kan han tarlante hi uluk zawka kan ngaihtuah a, a hnam anga hrisel tura hma kan lak a hun ta hle mai.