February 25, 2004, Nilaini, “Ash Wednesday” (Isua thawhleh ní, Easter Sunday hma ni sawm lìna; Setana’n thlalèra ni sawm li leh zan sawm li Isua a thlèmna hriat reng nána chaw nghei tan ní) a ni. Chumi ní chu Isua thih hma darkar 12 tàr lanna film, Mel Gibson-a siam, “The Passion of the Christ” tih chhuah (premiere) ní a ni a. Juda-te en hranna leh hmelmâkna lam hawi (antisemitic) anga ngaitu an tam avàng leh, thisen chhuahna leh insawisakna uchuak taka lantír nia ngaih a nih avàngtein he film hian sawisèltu a ngah nghâl hle.

Sèlna kára hlawhtlinna

“The Passion of the Christ” hi premiere a nih tûkah The New York Times chanchinbu chuan, film producer leh director, lemchan khawvêla “mi lian” Mel Gibson chu, ‘Lemchan khawvêla a zin kawng tàwpna tùr a ni!’ tiin an han chhuah piap mai a! Chu mai chu duhtâwk loin, ‘He film thar dòdàlna hi a puak keh thuai dáwn,’ tiin an hrilh lâwk chuai chuai bawk! An daw chiang è!

An dâwt chian êm êmna chu, “The Passion of the Christ” tih chhuah a nih ní là lâ hian US dollar mtd. 26 a lalût nghâl pang! Film siam nána an sum sèn zât  dollar mtd. 30 a khûm têp! Nilainia tláng zarh a ni nachungin, kár tàwp a lo thlen meuh chuan (ni thum chhûngin) dollar mtd. 125 lai zu hmu chhuak hmana maw le! 

Tih chhuah a nih hnuah, The New York Daily News-a ziaktu pakhat, Jami Bernard chuan, ‘Indopui II-na laia German-in Juda-ho an suatna film siam a nih hnua Juda mi leh sa hmuhsitna leh en hranna film siam zíngah a chhe záwnga nghawng nei lian ber a ni!’  tiin zu la ziak duh hräm a!

Hetia an sèl mék lai hian, US leh Australia tih loh, ram hrang hrang Box office-ah pakhatna dinhmun a luah vek tho! Box office-a a chàm chhúngin dollar mtd. 612+ (612,060,372) hmu chhuakin kum 2004 chhúnga film chhuak zínga sum lalût hnem pangana a ni pha hial a; Kristian film chhuak tawh zínga sum lalût hnem ber nihna leh mi mal chanchin tàr lanna film (bio-pic) chhuak tawh zawng zawng zínga hlawhtling ber nihna a hauh bawk. Vawiin thlengin he dinhmun ropui hi eng film dang mahin an la khûm zo lo! Chu mai chu a ni lo a, ram hrang hrangah chhuah phal loh (banned) a ni nachungin 2004 kum tàwpah phei chuan US-a “R-rated film” (Restricted fim/kum 19 chin chung lam en theih film) zínga sum thawk chhuak tam ber a ni pha bawk.

Isua tawrhna film siam duhtu Gibson-a

Kum 1990-a “Hamlet” film tih chhuah a nih tuma Hamlet-a lema chang Mel Gibson hian, interview-naah Isua chanchin tàr lanna (Isua film kan tih mai) siam emaw, chu film tih chhuahna kawnga inhnamhnawihna neih ve emaw a duh thu a lo sawi daih tawh a. Chu a thil tum, a “dream” ti hlawhtling tùr chuan kum 12 a nghâk a. Kum 2002 October-ah “The Passion of the Christ” chu Italy-ah chang tanin a kum leh February thlaah an chang zo thei ta a ni.

A film hming atán hian Gibson hian “The Passion” tih a tum zet a; mahse, Miramx Films-in “The Passion” tih hming hian Motion Picture Association hnuaiah Jeanette Winterson-i lehkhabu ziah an lo register tawh si a; “The Passion of Christ” tia thlâk a nih zet hnuah, “The Passion of the Christ” tih an hmang ta a ni.

Chanchin Tha ziak pali bâkah Clemens Brentano-a lehkhabu, “The Sorrowful Passion of Our Lord Jesus Christ” leh Roman Catholic lehkhabu, Venerable Mary of Jesus of Ágreda ziah, kum zabi 17-a tih chhuah daih tawh, “The Mystical City of God” te behchhanin, Mel Gibson leh Benedict Fitzgerald ten “The Passion of the Christ” film script hi English-a ziakin  William Fulco, S.J. chuan Aramic leh Latin-in a letling a ni. 

Kum 2002 khán Hollywood studio hrang hrang atangin Tanpuina emaw thlâwpna emaw a hmuh theih loh thu Mel Gibson chuan a sawi a:  ‘Hetiang hi tú ma siam duh loh film a ni! Tawng thi tawh pahnih—Aramic leh Latin hmanga chan a ni bawk si a,’ a ti.

Sawisèlna a tawh nasat êm avàngin a hmaa inremna an lo siampui tawh 20th Century Fox chuan an inremna chu an ti tàwp hmak a. A tàwpah Newmarket Films lamin an pui duh hlauh a; ama production company Icon Productions nèn an thawk dùn thei ta chauh a ni.

A siamtu a hneh hmasa

Hamlet-a lema a chan laia kum 34 mi, Mel Gibson chuan, Isua film siam duhna thinlung a put tan dàn heti hian a sawi: ‘Pathian hi ka ring a, a awm ngei a ni tih pawh ka hre chiang. Mahse, ka nunah hian Amah ka rinna chu kil khata dahin thil dang ka dah pawimawh zâwk fo thìn. Rinna kawnga ka than len theih nán leh Isua min hmangaihna thûkzia ka hriat fiah theih nán, kan tána a inpêkna leh a tawrhnate hi zira chhui chian ngaiin ka hria a. Chu chuan uluk zâwk leh ngun zâwkin Chanchin tha ziakte hi min chhiartír a. Kan sual man min pêksak tùrin a thil siam mihring tlukpuiah a insiam mai ni loin, a thil siamte diriam leh nghaisak a tuar a nia! A inpêkna nasa lutuk hi—kawng eng emaw ti tala rulh ve ka duh a ni,’ tiin.

Mel Gibson chuan, Isua lema chang tùr tána hma lam kawng a pin tùr thu a hre lâwk a. “The Passion of the Christ” chang tùra Jim a thlan lai paw’n, ‘Hollywood-ah hian film lian chang tùra sàwm i ni tawh ngai lo ang!’ a ti lâwk hial! Movie hlawhtling tak tak—“G.I. Jane” (1997), “The Thin Red Line” (1998), “X-Men” (2000), “Angel Eyes” (2001), “The Count of Monte Cristo” (2002) tea a “changtupa” lo ni tawh Thìn, Jim Caviezel tán chuan Isua lema chan chu a phùrawm fahran lo ang le! Mahse, ‘Tu pawh hian mahni kraws put tùr kan nei theuh aläwm,’ tiin a chháng fel êt—hnar a tum lo.

Mel Gibson-a hrilh lâwkna a thleng dik em ni?

Jim-a’n Isua lem a chan hnu hian Mel Gibson-a sawi angin thil a thleng hman! Jim hian budget lian film-a chang tùra sàwm a hlawh tawh lo mai ni loin hnâwl a ni fo. TV serial “Person of Interest”-ah a chang chho pha tâwk! ‘Vawi leh khatah ka lär hluai tawh lo. Thil sual ka tih vàng pawh ni loin Isua lema ka chan vàng mai khán a ni! Chu chuan a chhe záwngin ka nun a nghawng eih lo—mi tin hian kraws put tùr kan nei theuh a ni … tù mah hi, he khawvêlah hian chatuanin kan awm dawn lo … Hollywood producer-te pawh. Mi tin hian kan nuna kan thil tih hi, nakinah kan la puang leh vek dawn a ni,’ Jim chuan a ti.

Hollywood-a Jim Caviezel a tlâk nat loh chhan pakhat chu, a lem chan tùr (a role) an ruatsak a hnawl fo vàng a ni. Isua film tih loh chu tharum thawhna lam leh “sex scene” lanna chu pumpelh a tum ta zêl a. ‘Movie-a saruaka inlan hi ka tán chuan a harsa—dik ka ti lo! Rinna kawngah chuan thianghlimna hi a pawimawh êm êm si a,’ tia sawiin, ‘Min chantír duh tak zet a nih chuan a script an thlâk mai tùr a ni. A nih loh chuan keimah hi min duh tak tak lo tihna a ni mai!’ a ti hmiah!

Malsàwmna chu!

Hetiang a nih rual hian Jim Caviezel hi Hollywood-ah a hnawng reng hauh lo—a lem a chan Isua’n a ei zawnna tih tàwpa rethei leh riltáma a awm a phal hauh lo! “The Passion of the Christ” a chan hnuah film 20 a chang leh tawh a; a channa hnuhnung ber, Christian thriller, “Sound of Freedom” (2023) phei chu a hlawhtling hle.

“The Passion of the Christ” chhunzawmna—Isua thih leh a thawh leh inkár tàr lanna film, “The Passion of the Christ: Ressurection” pawh an buaipui mék a. He film-ah hian Jim Caviezel hi Isua lema chang leh tùr a nih mai bâkah co-producer a ni dáwn nghe nghe a; nakkum 2025, April 18-ah US-a tláng zarh tum a ni.

Isua tawrhna Tâwmpuitu

“The Passion of the Christ”-a tláng chunga Isua thu sawi an chan laiin Jim hi têkin a déng a; a sam a alh pup hman. Krawsa khai kàn a nih laiin têkin a déng leh bawk. Mak deuh maiin hliam ná a tuar lo hlauh! Golgotha pana Kraws a putna lamah a dàrah hliam na tak tuarin a dàr ruh a ti pelh bawk. Tin, Rom sipaiten Isua (Jim Caviezel) an vuakna “scene”-ah khán hruihrual hling nei (whip) an vaw sual palh a, inchi 14-a zauin a hnungzáng a kak a, ser-nung a nei bawk! Kum 2023 khán Jim hian a thurûk pakhat a puang a: Film an chan laklawh laia damdawi in panpui a nih thu leh, minute rei lo te chhúng “a thih” thu! A harh leh hnua Pathian a hnaih zual thu a sawi bawk. Krawsa khaikàn scene an chan lai kha Italy rama thlasik vàng lai tak mai a ni a; temperature pawh minus 4°C niin thli vâwt nasa tak a tleh reng a. Chu chuan taksa lumna tla hniam thut (hypothermia) leh pneumonia a neihtír a. A mit an chei (make up) nasat avàngin thâwk lama harsatna leh lu na benvawn (migraine headaches) a neih phah bawk.

Mel Gibson chuan krawsa Jim-a khaikàn a nih hmaa a kuta perek chhu tlumtu kha amah ngei a nih thu a sawi a, ‘Krawsa Isua khéng bettu kha keimah ka ni a; ka sualna avànga tuar a ni,’ tiin Isua tawrhna a tàwmpuina entír nána ti a nih thu a sawi.

Jim chuan, ‘Hêng ka tawrhna zawng zawng aia nasa ka tawn chu: Pathian hmangaihna a ni! Mahse, min hmangaihzia hi ka hre zo lo a, ka duhkhawp ka tem pha chuang lo!’ a ti a. ‘Film kan chan lai pawh khan—krawsah khán Isua nèn min khéng bet dùn niin ka hria. Kha scene bîk kha Isua zâwkin a chang vek a ni. Ka rilrua lian bera chu—“Khawvêl hian Jim Caviezel hi hmu loin Isua Krista zâwk hmu se,” tih hi a ni,’ tiin a testimony a puang chhuak.

Ni e, chan chawpa kan hmuh, Jim Caviezel-a tawrhna ringawt pawh kha a na viau ang; mahse, nang leh keia Chhandamna thawk chhuak tùra kan Lalpa Isua Krista tawrhna erawh kha chu, engti kawng maha lan chhuahtír theih a ni kumkhua lo ang—a lem paw’n, a tak paw’n!