Tûn hnaiah, Chinese leh Hollywood comdey action film chang thiam hmingthang Jackie Chan leh a fanuin, Chan-a movie clip hlui hrang hrang an thlìr dunna reels (video clip tãwi) kha YouTube leh Fb-ah ka lo thlír ve a—ka rilru a khawih tak zet a ni.

A pa inhliamna scene an en dun laiin a fanu chuan, ‘Pa, khîngahte khian ná tiin i inhliam thin em?’ a ti a.

‘Tehrêng mai—vawi tam tak!’

‘Pa, i lo ropui e …’ tiin a pa a kuah a; an tap dùn ta a …

He ‘reel’ hian ka rilru a khawih ngawih ngawih a; dàwn a ti thui a; tahpui an châkawm tak zet zet bawk. Mahse … he ‘reel’ hi sawi fiah ngai a ni a; a tàwpah kan sawi chauh ang!

Chu zawng ai chuan, a phèna Jackie Chan-a lo chanzia, a tumruhzia, hnà a ngaih pawimawhzia te leh a inpêkna thûkziaten ka ngaihtuahna an luah zui a. A chanchin ka’n chhiar zau a; naupan laia “Jackie Change-a” tia a channa film kan en thin lai ai khán, vawiina film lama kan hmuh tlèm hnu hian ka ngaih sànna a zual daih tawh zâwk nia!

Chan-a channa!

Mihring hian ruh 206 kan nei a. Film 150 vêl a channaah khán Chan-a khân a ruh tliak thei zawng zawng a ti tliak vek emaw tih mai tùr a ni. Talk show host, Steve Harvey phei chuan, ‘I ruh zawng zawng hi i ti tliak vek tawh ti raw?’ fiamthuin a ti hial! A lu ruh te, a nâk ruh leh a hnungzáng ruh te, a khup leh a mal, a kè leh a kheimit ruh, a hnár leh a biang ruh te, a khabe ruh mai bâkah a kutzungtang ruhte a ti tliak nuai tawh. Hêng zíngah hian a kutzungtang ruh a ti tliak zing ber. ‘Ka ti tliak pawh ni lo, “ka ti chhe thin” a ni mah zâwk! Siam tha (repair) leh tùrin vawi tam tak zai an zai tawh!’ a ti. Film a channaah, a ruh a tih tliah loh vêk paw’n “pem leh khem na chi” tal a nei ziah!

Pa chang Jackie Chan khân film a chan chhúng khán a ruh 20 chuang a ti tliak hman! Talk show hrang hrang hosts—Steve Harvey te, Conan O'Brien te, Jonathan Ross te, Stephen Colbart te leh mi dang dang hnênah pawh, vawiin thlenga a lu ding lama kua (hole) a la awm thu sawiin, an awih loh tâkin, ti niàwm takin a khawihtír kher thin!

Action film dangah chuan “action” hautak chinah, hetiang chang tùra mi thiam bîk, training chhuak thlap, film-a a changtute aiawh “lem” tùr, “stunts” an ruai thin. Mahse, Chan-a film tam zâwka insual, inchung atanga zuan thlâk, building chung atanga a lehlam chunga zuan phei … tih zawng zawng kha, 1983-a a din daih tawh, a “stunt team”-te tihtír loin ama tih deuh vek an ni. A “stunt team” te kha chu, scene awm dàn tùr, insual dàn tùr duangtu (choreographer) atán a hmang chauh zâwk thin!

Hetiang thil hlauhawm hi, Hollywood-ah khuan lem changtute tih hi an remti lêm lo. Chan pawh hi a film siam rêng rêngah, a inhliam emaw a boral emaw a nih paw’n, insurance company ten inremna an siampui thei lo tih a ni bur. Chuvàng chuan alãwm, khawvêla mi ber kaite chhinchhiah thintu, Guinness World Record hial paw’n, “Most Stunts by a Living Actor” (lemchan thiam la dam lai zínga mahnia stunts ti hnem ber) nihna an lo pêk hial ni!

A hringnun zin kawng

Kum 1954 April 7-a Hong Kong-a a lo pian hma khân, a nu’n a huna a vei loh chu thuhran, an retheih êm avàngin a nu pum chhúngah thla 12 ngawt zu awm a! ‘Nu pum chhúnga naute lian pui ka ni!’ tiin he thu hi a tak a nih thu Jackie Chan chuan UK TV Talk Show host, Jonathan Ross hnênah a sawi nghe nghe. A pian tirha Chan Kong-sang hming an puttír hi kg 5.4 kg zeta ritin a piang chhuak rêng a ni.

A naupan laiin Hong Kong Island-a Primary School-ah a kal ve a. A kum khatnaah a’n fail nghâl pang a. A chhúngten an bàntír hmak! Kum ruk mi a nihin a pa’n Canberra, Australia-a American embassy-a head cook hnà thawk tùrin a pèmsan a. Chan chu The China Drama Academy, Peking Opera School-ah an kal zawmtír thung. Hetah hian rim takin martial arts leh acrobatics a zir a. A hnuah “Seven Little Fortunes” an tih—an school-a naupang ti tha fál thlan chhuahte performance group-a telh a ni pha hial. An group hian kum 1962 khân “Big and Little Wong Tin Bar” film tènau an ti chhuak a; chu chu lemchan lama Chan-a bul tanna a ni.

He group-a a thiante, Sammo Hung leh Yuen Biao te nèn an inkàwmngeih bîk hle a. A hnuah “The Three Brothers or Three Dragons” an invuah. Kum 17 mi a nihin Bruce Lee-a film hlawhtling, “Fist of Fury” leh “Enter the Dragon”-ah te ‘stuntman’-ah a tang a. A hnu kum 1973-ah, film puitlinga a inlanna hmasa ber, “Little Tiger of Canton”-ah a chang pha ta hial. Mahse, he film hi Hong Kong-ah chauh tih chhuah a ni.

Chinese film eng emaw zât a siam hnuah kum 1980-ah Hollywood a pan ta a. A bâk chu kan hre hlawm tawh e …

Ka sawi tum tak chu …

Facebook-a ‘Reel’ ka sawi ang khian, mahni pate hna thawh, kan pian hma hauha an ei zawnnate kha, movie anga en theihin awm ve ta se, mahni pate ngaih sàn avànga mittui súm zo loa tahpui zawih zawih thei hi mi eng zât tak awm ang maw? Hlawhtling tùr leh min chãwm tùra kan paten hrehawm an lo tawrh zozia te, an inpêkna lo thûkziate hre thiam pha hi a tam zâwk kan ni ang em le?

Chuti lo záwng chuan han sawi leh ta ila: kan fa la ni tùrte ngaih sàn tlâk leh, ‘A pa, i lo va’n ropui thin ve!’ tia nakina kan fate mittui ti tla zo tùr khawpin vawiina nula/tlangvál kan nih lai hian hnà kan thawk em? Kan hnû hi an la rawn chhui ngei dáwn si a. An pa, an nu nih pawh an zahna tùrin, vawiinah hian kan khawsa mai mai em, tih te thlenga kan inzawh a ngai a nia aw …

Mi chang Jackie Chan erawh chu, fa a neih hmaa a film-ah te khán, vawi tam tak inhliamin a ruh a lo sawh tliak tawh a; film an chan laklawh laia damdawi ina an phurh zinziate kha! A hnaah a chiang a, a inpe zo a, a rinawm bur a, ‘stunt team’ nei reng tho si khán amah ngeiin a thawk duh tlat zêl thin a nih kha.

A tìr sawi fiahna 

A tìra ‘reel’ kan sawi khi lemchan tho a ni e! Jackie Chan hi a fel famkim bîk hauh lo. A bîkin chhúngkaw enkawl chungchángah. Kum 1982-ah nupui neiin fapa, zai leh lemchan lama inhmang Jaycee Chan an nei. Chan kha a rawn làr chho tak tak a, nupui dang, Elaine Ng Yi-Lei a nei leh. Fanu, Etta Ng Chok Lam an nei—patil ni zuia nun kawng khaw lo zet zawha mi in hnuaia a bialnu nèna riak bo fo thin chu. Jail bang lah a zût fo lehnghâl! A fanu anga ‘reel’-a rawn lang kha a fanu tak tak a ni lo—lemchan mai a ni!

Jackie Chan ropui lehzualna chu, a thil tih sual a inhria a, a inpawm a, a inchhîr “ngam” tlat hi a ni. ‘Mipa tam tak angin, kei ngei paw’n thil ka ti sual—ka chhúngkua ka lo thlauhthla kha pawi ka ti a, an mi ngaihdamna ka díl!’ a ti thei tlat!

Ni e, mihring hian tlin lohna lai chu kan nei theuh mai. Mahse, kan tlinna lai te, kan thatna lai te, kan chakna laite leh kan theih vena laite kan “inhmuh luihsak” loh chuan, khawvêlah hian hlim takin tú mah kan khawsa ho thei ngai lo ang.

Kan fa la ni tùrte ngaih sàn tlâk leh, ‘A pa, i lo va’n ropui thin ve!’ tia nakina kan fate mittui ti tla zo tùr khawpin vawiina nula/tlangvál kan nih lai hian hnà kan thawk em?