Mizoram Chief Minister hlui, Pu Lal Thanhawla kha, Congress leader a niha an party hotu ber a nih khân kum 34 mi chauMizo thu leh hlaa mi thawhhlâwk leh mi thiam chungchuang chanchin kan sawi dawn a; mahse, thu leh hla lama a hna thawh te, khawvêl lehkhabu ropui tak tak Mizote min lehlinsaktu a nih thu te leh a Bible thlîrna leh a Thungaihnawm Huang lam sawi tam loin a chanchin kan hriat zen zen loh, kut hnathawk mi  a nih thu i’n hrút dáwn teh ang.

Pian ni leh thih ni danglam bik: ‘Chhinlung fa Zofa piang tawh zínga thu leh hla thiam ber leh thawhhlâwk ber,’ tiin January 9, 1925-a Tlangnuama piang Joseph Francis Laldailova hi chhál ta ila, min hnialkalha min hnial-dan tum hrãm hi an tamin ka ring lo. A pian tûk leh a thih tûk hi a mak ve hrim hrim a: a pian ni, Zirtawpni zíng ni chhuah hlim hian thla bial a la hmuh theih a. Hei hi sapho chuan, ‘mi bîk pian hun’ anga an lo ngaih thin a ni. June 27, 1979 dâr 4.55-a khawvêl a chhuahsan tûk pawh kha, kum dang chu ni se, fùr ruahtui hul tawh hnu, khua a khèn vànga zirna in thenkhat an khàr hun lai a ni. Mahse, Pu JF Laldailova kha, ‘khua paw’n a sún ve a ni ang,’ tih mai tùr khawpin ruahpui vanàwn zu súr chiama maw le!

Lehkha thiam thei chungchuang: Mizorama Catholic kohhran dintu Peter Thangphunga leh Margaret Thangzawni te hian fapa panga leh hmeichhia pali an nei a. Kum 10 mi âwrh a nih laiin St. Pauls High School dintu Father (thenkhatin Brother tiin an ziak) CSC Godfrey chuan Chittagong-a St. Placid’s School-a kal tùrin a hruai thla a nih chu—kum 10 mi âwrh a nih laiin! Saptawng emaw Vaitawng emaw pawh kawi khat mah hre lovin sikul chu a zawm a. A zirlaipuite hmuhsit leh endawng a hlawh nasa hle. Mahse, lehkha a thiam thei hle mai si a; Class II a zirlaia an zirtirtupa, BA vâl, mi ngo mi lehnghâl chu saptawngin a hnial dang thei dêr tawh! Class VIII thleng St. Placid's School-ah lehkha a zir. A lehkha zir chhúng hian vawi 22 exam-ah vawi 17 pakhatna a ni thei nia! Hetih hun lai hian Englih thu leh hla un-pui pui hi a tuipui tan tawh a; a bîkin, William Shakespeare-a thu leh hla hi a ngaina hle. English mai bâkah, subject dang dang history, Mathematics, Science te pawh a tuipui vek bawk.

A sikul chhuti tuma Mizoram a rawn haw tumin Mizo tawng kawi khat pawh a lo thiam tawh lo a nih chu—a hnua English–Mizo Dictionary siamtu Pu JF-a hian! Indopui avânga zirna in khàr a niha Mizorama a lo hâw leh tumin hna a zawng ve a; mahse, sap sipai lalte chuan a sap tawng thiamzia an hriatin a hna dil, peon emaw tirhkah hna thawh an remti lo a, a pa kiangah lehkha zir chhunzawm leh tùrin an ti ta zawk a ni.

1943-ah Thlawhna Sipai (Royal Air Force) hna a thawk tan a; tawtawrâwt ham a zir tan hnu lawkin hotu (band master)-ah an hmang nghal. Mahse, 1949-ah Ngawr natna (TB) a chhar ve hlauh. Daktorin a nâk ruh pakuat ngawt zaisakin a tansak a; a tha chhuak ve leh mai. (A thlalakah pawh a dâr a hi hniam deuh bikin a lang). A He a natna avâng hian Air Force atanga rawn bángin Mizoramah a rawn chuang chhuak leh ta a ni.

Kut Hnathawk mi JF-a: Kan thupuiah lût tawh ang. Kum 1950-a Zorama a lo chuan chhuah khan Zopa hna chuan a lo hmuak lo thei bik si lo. Mahse, kum 10 mi a nih atanga ram danga awm tawh chuan thawh thiam alawi a nei si lo. Tin, a nâkruh pakua lai tansak a ni tawh bawk nèn, hna-hrám thawh chu atan a zuamawm si loh a! A chhúngte lakah pawh a inthlahrung thin hle 

Hna zãngkhai deuh thawh tùr a ngaihtuah ta a; a nupui Margaret Thangzawni chuan a lo tuipui êm êm a. An nupa chuan huan an siam dùn tan ta. Huan thlai chìn dànah pawh Mizo chìn thin dàn anga hmalâk ai chuan kawng dang tha zâwk tùr a zawng ta a. Amah Mafa-a’n a fiamthu tawngkam a sawi chhâwn leh hi a ngaihnawmin a hlimawm ngawt mai: “Tuthlawh chelek hi ka chemkalna zâwng tak a ni a; chem chelek erawh hi chu ka tuthlawh kalna lam a ni lo,” tiin.

Tlangnuam tuikhur kamah terrace a lai a. A tìrah chuan bawnghnute tín ruak a la khawm teuh a. Lei a dah a, vaihlenhlo tiak a khawi phawt a. Agriculture lam lehkhabu a ráwn zêl a. America/France/England/Japan/India/Denmark rama an thlai enkawl dàn leh lane an siam dàn mai bâkah ama phuahchawp lane hrang hrang a siamin a en chhin ta a. Mizorama lei tih thatna ‘chemical fertilizer’ chíng chhuak hmasa bertu a ni nghe nghe. Mi tam tak chuan Tlangnuamah Zikhlûm a hlùm theih loh thu an hrilh fo a; mahse, a tumah a chiang tlat a. A thiltih lama tih tak taka ti mi a nihna a lang zêl a; taimâkna leh tih tak zetna nên a bei chhunzum zêl a. A tàwpah thlai tha tak tak—Zikhlûm, antam, tomato, knolkhol te leh raddish a chìnte chu, hlawhtling takin a thar chhuak ta a; a lãwm hle mai. 

A unaute hnênah pawh, ‘In kum khat buh thlawh chhuah hi ka thla thum thawh hian a lei thei mai ang,’ a ti fiam thin. Páwl an tlâk meuh chuan an han chhût chhin a, a lo lei zo thei tak tak reng mai a ni. Mizoram sawrkarina thlai entirsiakna tum hnih a buatsaih (1954 & 1955)-ah pawh lawmman awm zawng zawng a hui fai vek deuh thaw a ni. A antam/zikhlum (Mafa-a’n antam tiin a ziak a, R Lalrawna’n zikhlum hnah tiin) thar te chu thlangra tiat tiata hlai te a ni a; a ‘knolkhol’ thar pakhat pawh inches 23 hawlhtlang a tling hial a ni.

JF Laldailova chuan a hun tawnga a hlim lai ber chu heti hian a sawi: ‘Bawng êk leh ar êk phura hnathawh kawr bàl tak mai nêna, Aizawl daifema ka thawh hnak hnak lai khân tukhaw hriat hlawh lo mah ila, ka huanthlai no hlep hlep mai khân min tihlim a. Ka hun tawng azawnga ka hlim ber lai niin ka hria,’ tiin.