‘A hmél ka hmuh rual khán min híp nghâl chat a. Kha minute rei lo te chhúnga ka thil tawn kha, he kum 40 chhúng hian a la danglam leh miah lo!’ —Jon Bon Jovi

A làrzia kan hria; a hmél thatzia phei chu khawvêl hmeichhiaten an hre chiang. A hla phuah thiamzia leh a zài thiamzia te, nula duh duh thing thei a nihzia pawh tláng tinin kan hai lo tláng vek ang. Mahse, ani Jon Bon Jovi chu, a nupui Dorothea lakah a rinawm tlat!

Keini, India ram kilkhâwra awm, sa kâp thei làra làr pawh zo lo foho hian, Bon Jovi band frontman, Jon Francis Bongiovi Jr. hi kan va’n tluk lo tak êm! Tin, khawthlang mi lär (celebrity)-ho, nupaa insiam a, inthen habit-a neite pawh khuan an va’n tluk lo chiang lulai tak êm!

Kan naupan ve laia (han ti ve khalang ila) “Bed of nails”-a mut hrehawm turzia hre thiam ve ni àwm fahrana, a  “I wanna lay …(Bed of Roses)” te kha kan thiam ang angin kan lo sakpui ve thìn a. Los Angeles-a tour an neih laia in lama rinawm taka amah lo nghâktu, a nupui Dorothea a ngaih tawh êm avàng leh a thlâkhlelh ngawih ngawih avànga a phuah chhuah a ni tih te erawh chu kan hre dèr mai si lo a!

Intawnna

‘A hmél ka hmuh rual khán min híp nghâl chat a. Kha minute rei lo te chhúnga ka thil tawn kha, he kum 40 chhúng hian a la danglam leh miah lo!’ titu John Bon Jovi leh a nupui Dorothea Hurley Bongiovi te hi, an pian leh sei lenna khua, New Jersey-a Sayreville War Memorial High School-a sikul kal dùn thìn an ni.

Kum 1980 a ni a. |um khat chu, History subject an test a. Bon Jovi chuan thiam nei hek lo; Dorothea chuan a chhànna a en tawntír ta ’ngawt a. Chu chu Jon-a’n Dorothea hmél a hmuh vawi khatna chu a ni—vawiin thlenga a khawvêl neitu a tawnna chu! Ho tak a ni; mahse, a tlo tlat!

Dorthea chu Jon-a thian tha ber Bobby-a bialnu a lo ni a! Bobby leh Dorothea te chuan Jon chu kàwm tel ve zêlin an pathum chuan thian inpawh tak an ni chho a. Kum hnih chhúng chu an inkàwm ho. Kum 20 an tlin kum, 1982 hma kha chuan Jon leh Dorothea te chu an “ni” lo!

High sikul an chhuah hnuah Dorothea chu Youth karate champion leh zirtírtu (instructress) ni thei khawpin karate lamah sùlhnu a nei tha a. Mahse JBJ Soul Kitchen Restaurant chain-ah a thawk daih thung!

Inhriat chianna, inpawhna leh induhsak tawnna chuan thian tha nihna aia thûk zâwk, hmangaihnaah Jon leh Dorothea te chu a hruai lût ta tlat mai! Mi dang kawp zai rëng rél zui loin an inngaizáwng ta nge nge a.

Dorothea hian a bialpa chu a ngai sáng a, a hnua a sawi leh dàn chuan Jon chu, ‘Kan sikula mipa zíngah khán, zaa za (100%)-in a hmél a tha ber!’ a ti. A zai thiamzia leh a thil tumte a hria a; chûngte chu a tuipui ve zêl a. |um khat pawh, Jon-a’n zaina tùr a neih avàngin an school prom (kum tàwpa zirlaite intih hlimna) an tlàn bo dùn nghe nghe. Dorothea hian a chhúngte hnênah pawh, ‘Ka bialpa chu rock star a la ni dáwn,’ tiin a sawi hial thìn.

Mahse … kárah léng dang!

Hlim takin an awm dùn reng dáwn emaw an intih laiin a ni reng bîk hauh lo mai! Kárah hmélma an lo hráng ve tlat! Kum 1983 March thlaa Seyraville, New Jersey-a band indin thar “Bon Jovi” ten, a kum leh, 1984-ah an album hmasa ber, an band hming an chawitír, “Bon Jovi” an ti chhuak a; hlawhtlinna leh hmingthanna an chang nghâl. A kum leh March thlaah “7800° Fahrenheit” an tih chhuah leh phei kha chuan an lär tawh hle.

Tour-a an zin chhuaha va concert leh party kha an khawvêl a ni a. Chutih mék lai chuan, Hollywood lama mikhual lo tak mai, kum 14 mi a nih lai atang tawha Hollywood tual lo chai tawh, a kum 20-na hmang mék, party-a han hîr-hâ vêl nuam ti ve tak mai, khatih laia film hlawhtling “The Outsiders”-a a changtunu, Diane Lane leh Jon Bon Jovi chu an intawng fuh ta hlauh mai!

Rock star làr mék Jon chuan a aia kum hniha naupang zâwk Diane chu a ngaizáwng ta a. Thla nga chhúng vêl an inngaihzàwn hnuah an inthen zui leh mai a. A hmangaihna hmasa neitu, Dorothea hnênah lo kalna tùr dang nei hek lo; inchhìra lêrh sim intiamin, a rinawm loh lai pawha atána rinawm reng thìn Dorothea ngaihdamna chu a chang ta hlauh a ni.

‘Khatih lai khán kum 20 mi chauh ka la ni a, thla nga chhúnga rei ngaihzáwng neih te chu a! A rei tâwk viau aläwm,’ tiin Diane Lane chuan an inthen chhan a sawi. Mahse, Bon Jovi band tour manager thìn, Rick Bozzett chuan, a lehkhabu “Sex, Drugs and Bon Jovi”-a a ziah dàn erawh a ni hauh lo! ‘Kha nu (Diane Lane) kha party mî a ni a. Bon Jovi guitarist Richie Sambora nèna an “Ck” lai Jon khân a phâwk a, chu vànga inthen chu an ni,’ tiin a ziak ve thung!

Khatih laia Bon Jovi hla hit ber zínga mi, “You Give Love A Bad Name” pawh kha … amah Jon Bon Jovi, hla phuahtu hlawhtling Desmond Child leh Richie Sambora te phuah ho ni tho mah se, Jon-a’n Diane Lane a phuah chhan nia sawi a nih nghe nghe khâ!

Innei hlawl!

Kum 1988 September thlaa Bon Jovi album tih chhuah, “New Jersey” tih làr nán kum 1988 atanga kum 1990 inkárah tour an nei a. Kum 1989 April thlaah Los Angeles-a “The Forum”-a zan thum concert an neih hnuah an chàwl lailâwk a. Hetah hian Dorothea pawh a tel ve.

Jon chuan Dorothea hnênah chuan (zàwi sapa a sawi ka ring—he thu hi!), ‘I pasal tak ni tùrin min nei duh ang em?’ a ti ta phawng mai—Sâphoin “propose” an tih ang hian!

Dorothea chuan a lo hreh lo nasa mai! A tána chutiang zawhna chhànna tùr chu—“Yes!” a ni chiang sa si a!

“Aw!” tih chhànna a hmuh rual chuan Jon chuan , ‘E! Ih …  tih dàn ka hria!’ a ti thut. ‘Engati nge tùnah hian kan inneih nghâl mai loh? Hawh, kal nghâl ang!’ a ti ta mai!

Hurley chuan, ‘I ä em ni?’ a ti hluai a. Mahse, a nihna takah chuan a bialpa, tùn maia “a pasal hual” ni chauh Jon-a rawtna âtthlâk tak anga lang chu, a rilru chhúngril tak chuan a hnial lo nasa mai si a!

A a rûkin Las Vegas lamah a thlâwk thut. April 29, 1989-ah, Jon Bon Jovi leh a tleiräwl bialnu, a hmangaihna hmasa ber neitu Dorothea Hurley te chu a rûk thei ang berin, mi lär tam takten inneih nána an hman thin, Las Vegas-a Graceland Wedding Chapel-ah an lo inkutsuih ta a ni.

Bongiovi chhúngkua

An nupa hian fanu pakhat, Stephanie “Rose” Bongiovi (1993-a piang) leh fapa pathum: Jesse Bongiovi (1995-a piang), Jacob “Jake” Bongiovi (2002-a piang) leh Romeo “Jon” Bongiovi (2004-a piang) an nei. ‘Band-a kan tel hian, “Chhúngkua kan ni,” kan ti thìn tak nâ a, nupui fanaute nèna khawsak hoa “chhúngkua” kan tih nèn chuan inang lo tak a ni—lei leh vàn ang hlauh!” Jon chuan a ti.

An fapa upa ber, rosé (wine chi khat) company “Hampton Water” neitu Jesse hian kumin 2024, May 7 khán kum li kaltaa nupui atána a lo hual tawh, Jesse Light chu nupuiah a nei a. A nu leh pate inneihna hmun, Las Vegas-a Graceland Wedding Chapel-ah ngat an innei. 

A ú, TV show hrang hranga camera operator hna thawk mék, Stephanie hi tûnah hian pasal nei mai tùrin a inbuatsaih mék a; an inneih pual hian a pa hian hla thar, “Kiss the Bride” tih a phuah diam tawh a; a fanu hi a la ngaithlâktír phal lo! Stephanie hi kum 2012 khán, college a kal laiin opiod (ruihhlo chi khat) overdose avànga damdawi in panpui a ni a. Hemi chungcháng hi Jon chuan heti hian Associated Press a hrilh, ‘Kan za-in a kiangah kan awm reng a, theih tâwp chhuahin kan tanpui a, kan hmangaihna sáng ber kan hlàn a; a tha leh dáwn a ni tih ring chungin hma lam kan panpuia a ni,’ tiin. 

Jake Hurley Bongiovi paw’n kum 2021-a Instagram atanga a bialnu chhar, “Elona Holmes” te leh “Stranger Things” tea a changtunu, Millie Bobby Brown nèn nikum, 2023 April thla khán an lo inhual ve tawh bawk a; “inring rengin” an awm ve mék bawk. [He thu ka ziah that (edit) lai (May 24, 2024) hian Vogue magazine chuan, “Kár kalta kár tàwp khán, a rûk theih tàwpin an innei. An inneihna hmun pawh hi hriat a la ni lo,” tiin a ziak.

An fate an enkawl dàn sawiin Dorothea chuan, ‘… nun phung pangngaia an nun hi kan duh ber a. Vawi te khat mah TV kâwk pahin, “Saw, i pa!” ka la ti lo!’ a ti. ‘New Jersey-a kan inah hian kan awm tam ber a. Kan awm ho tam a, kan inkàwm tam a, kan inngeih tláng a, kan hlim a ni. Hna hrang hrang thawk mah ila, kan thupui ber chu: “A hmasa berah chhúngkua (family first)” tih hi a ni,’ tiin an chhúngkaw chanchin a sawi bawk.

Hmel tha leh lär Jon Rinawma!

Kum 1996-a People magazine-in “50 Most Beautiful People in the World”-a a lo thlan tawh,  kum 2000-a People magazine-thoin “Sexiest Rock Star”-a a thlan; kumin 2024-a kum 62 mi, khawvêl mipate ngaih sàn, hmeichhiate star rawn Jon Bongiovi chuan an nupa inneihna tlona chhan, People magazine zawhna chu heti hian a chháng: ‘… kan inzah tawnna hi a ni ber. Khaw khata sei liana inkàwm chho kan ni a, kan inhre chiang a, kan inngaina tawn,’ tia sawiin, ‘… kan thian mi lär dangte tàn thinna “thang”-a awh ve (nupa inthenna) hi kan hlau dùn hle thìn a, a thawh pawh kan thawk rim. Mahse, kan hlim dùn êm êm reng … A chak zâwkin a chak lo zâwk kan indäwm käng thìn,’ a ti bawk. Dorothea paw’n, Jon-a chakna lai a hmuhsak thiam thin thu leh, chu chu thilpêk hlu tak a dawn a nih thu a sawi ve bawk.

Hollywood mualah khuan làr zo lo an tam tih kan hria. Anni khu chuan inneih zeta inthen leh mai te hi an hobby emaw tih mai tùr a ni a. Chûngho zínga khawsa ve tho, Jon Bon Jovi te nupa chanchin erawh hi chu, a ngaihnawm bîk tak zet a, zir tùr pawh a tam bîk a ni. Nupui kan nei tawh a, kan lo làr a, nula/tlangvál emaw, nuthlawi/pathlawi emaw, min lo “Ck”-pui duhtu kan tawng a nih paw’n, Jon Bon Jovi te nupa ang tal hian rinawm tlat ila, he hla hi i insak-sak fo ang u …

And I will love you baby, always
And I’ll be there till the stars don’t shine
Till the heavens burst and the words don’t rhyme
And I know when I die, you’ll be on my mind
And I’ll love you, always …