Mizoram sorkar sum dinhmun that loh thu sawi chang apiangin ‘K-Deposit’ hi sawi lan a ni ve ziah mai a, a hming lam ringawt pawh hian sorkar hnathawk thuneitu sang chin leh sorkar sum enkawl dan ngaihven chinte rilruah chuan kan state sum dinhmun a lang nghal ruau maithei. Mahse, sorkar sum khawih dan a bulbal hre ve lem lo mipui nawlpui tan chuan a bo theih viau thung ang. Engpawhnise, Pu Zorama sorkar leh Pu Hawla sorkarte lu na benvawn (economic/financial headache) vei, damdawi kha hmang chauha tihdam theih, tuna kan kalphungah phei chuan tihdam huphurhawm eltiang a nih avangin engemaw chin tal chu kan hriat ve a tul awm e. A manganthlak ta tak tak ania nge sorkar pawhin K-Deposit-a sum dah chungchang zir chiang tur committee hial a din tak ni. Thangkhat lian zen zawn politics a inchirhthehna atana an hman fo K-Deposit hi mawlmang te a sawi dawn chuan sorkar pawisa chheprelhna hmanrua a ni mai awm e. A ti ‘K-Deposit-tu’ a hminga ‘K’ lai tak hi a nihna hriltu leh a ni na a, finance department file a Head hrang hrang (ABCDE...) zinga K-Head sawina mai a ni thung. K-Head hi ‘Deposits and Advances’ a ni a, chutah chuan a pung awma dah (Deposit bearing interest) leh a pung awm lo a dah that (Deposit not bearing interest) a awm a, chungte chu sorkar sum chheprelh awm khawmna ‘K-Deposit’ an tih fo thin chu a ni ta a ni. A mawihnai zawnga sawi chuan sorkarin a sum dawn tawh, a hman rih lohte him taka a dahthat lailawkna pawh a tih theih ang. Heng sumte hi a pung awma dah a nih chuan sorkar tan pawh a hnemhnanpui theihna lai a awm tho awm e. Mahse, hmasawnna hnathawhna tur sum tam tak sorkarin a hun taka hmang lo a chheprelh thin lai tak hi a that lohna lian tak chu a ni. Tun hnaia kan lo hriat dan phei chuan K-deposit a sum dah hi Cheng vbc 700 a tling tih a ni a, Vbc 700 chu a tam tham khawp mai, mi thenkhat chuan hydel project siamna atan emaw ram tana chhenfakawm ro tling siamna pawh an it viau maithei a ni. K-Deposit a plan sum dah teuh hi hlohna a nihna lai a awm. Entirnan, lei dawhna tur sum sorkar laipuiin a rawn pe a, kumin a thawh tan tur a ni a. Mahse, sorkarin chung pawisa chu a lo ‘K’ ta daih mai a, kum thar lamah chuan hmanraw man leh labour hlawh thlengin a lo sang tawh anga, sum hlutna a tlakhniam zel avangin a daih tawh lo ang a, sum tam tak hlohna a ni der dawn a ni. A nih chuan ngati nge K-Deposit chu an chin viau si? Zep thu a awm lo a, Mizoram sorkar hi tunhma atangin a pachhe em em reng a, mipui hriat lem loh hian engtiklai pawhin sum harsatna namen lo a tawk reng a. Chuvangin, harsatna nasa zawk pumpelh nan dan hrula sum chheprelh mai hi a ngai thin a ni. Chhungkuaah pawh hian engemaw vanga sum indaih hleih theih miah loh chang a awm thin a, sum bawm ruak tur venna atan tlema zawng dah that a lo ngai a, chutiang thla veng atan chuan puk hial pawh a tul chang a awm thin. Chutiang chiah chuan sorkar pawh hian a sum bawm ruak vek tur venna atan sum remchang apiang dah that a ching ve a lo ni. Mizoram sum hi RBI-in a kawl vek a, a enkawlsak ti pawhin a sawi theih ang. RBI-a Mizoram sum bawm (Account) chu a ruak thiang lo a, engtiklai pawhin Cheng mtd 2 (Rs 0.20 crore) tal a awm reng tur a ni. A lo phai deuh chuan RBI hian a pung awmin a puksak thin a, chutiang chu ‘Ways & Means Advances’ leh ‘Special Ways & Means Advances’ an ti a. Chumi venna (Cash balance management) atan leh a pung awm a sum puk (WMA/SWMA) venna atan sorkar hian loh theih lohin a sum hmuh theih ang angte hi K-Deposit-ah a dah a ngai thin a ni. A chhan pakhat leh chu sum hmuh ang ang hi a nihna turah hnathawh nan hmang zel ta se sum khawl a awm dawn miah lo tihna a ni a. Keini ang state pachhia, sum thawh chhuah tur nei lo tan chuan harsatna nasa zawk a thleng ngei dawn tihna a ni ang. Sorkar sum enkawl dan kalphungah chuan hmasawnna hnathawhna tura sorkar laipui atanga sum lo kalte (plan sum) hi hman nghal ngai tur a nih loh chuan lak chhuah (draw) kher a ni ngai lo bawk. Chumi awmzia chu thla ruk hnua hman chauh tur sum vawiin a lo lak nghal an remti lo tihna a nih ber chu. Chutiang sum awm sa chu an ‘K’ ta thin bawk a ni. Hetiangte a lo nih chuan K-Deposit chu a sualna a awm lo tihna a mi niang? A ruh langa sawi dawn chuan hman atanga sum harsatna inrochun chhawn zel, thuneitu luten siam that tumna tak tak an neih bawk si loh vanga harsatna inchhekkhawm tam tial tial hian loh theih lohin sorkar hi K-Deposit-ah a tluk luhtir leh thin a ni. Kum tin hmasawnna hnathawhna tur annual plan sum tam tak sorkarin a dawng thin a, mahse, a thawktu ber (e.g. PWD) an vuaicha avang leh eng eng emaw vangin hna bul an tan lawk lo a, pawisa kum tawp dawn hnai February/March thla an nghak thleng kher thin emaw tih mai tur a ni. Hnathawhna tur sumte chu pawisa kum thar hmaa khawih chet a nih loh chuan hman theih lohin a liam (lapse) mai dawn si a. Chutiang hunah chuan plan sum tam tak a hmanna an siam chawp ta vak thin a, chu chu 'Rush of Expenditure' an tih fo hi a ni, dawt a sum hmanna siam chawp a tam thin em avangin sorkar sum hman dan endikna CAG Report-ah pawh hei hi pumpelh tura rawtna a awm chamchi nghe nghe. Chutiang hunah chuan sorkarin sum liam mai tur a venna atan K-Deposit hi a hmang ta thin bawk a. Kum liam ta pawh khan plan sum lapse a awm loh chhan chu K-Deposit a an dah teuh vang kha a ni. Hetianga pawisa kum tawp dawn ruai thleng a plan sum an lo la khawih chet loh chhana mawhphurtu sorkar hnathawkte chuan chhuanlam tha tak erawh an nei tho. A zawng a za chuan an chhuanlam hi dik vek lo mah se sorkar hnathawh dan kalphung hian a zir lohna lai pawh a awm ve tho ang. Kan hriat angin kum engemaw zat chhung chu Planning Commission-in annual plan a pawmsak tlai thin avangin kum tirah regular budget kan nei ngai tawh lo a. (Kumin pawh hian September thla kan chuang kai dawn thlengin Annual plan kan la nei lo a, a thuneitu ber Planning Commission lah chu an titawp dawn bawk si a). Annual plan kan neih hnuah sum hman dan tur ruahman leh a ni a, sorkar laipui atanga pawisa dawn meuh chuan kum a tawp ruai thin. Chutiang chu an chhuanlam chu a ni. A dikna lai a awm tho na a, a lehlamah chuan hnathawhna tur hun tha an neih hi an hmang tangkai tawk lo tih erawh hnial rual a ni lo. A tawpna atan chuan ram hruaitute hian kan sum harsatna tawh mek hi vei tak takin, hmala ngam khawpin vei ta se, leiba tipung zawng kal loh hram tumin an theih chin chinah inrenchem tum hram se la. Sorkar hnathawkte pawhin dik taka sum hman te, a nih tur ang taka hman te tum ta se la, eirukna tel loin hnathawk theuh thei bawk ila. Chutiang zawnga hmalakna a awm tak tak chuan kan buaipui K-Deposit pawh hi a kiam ngei ang a, sum harsatna kan sawi fo pawh hi a ziaawm ngei ang.