Krismas chhutî-a ka hâw hun tûr ka hrilh lâwk duh lo a; ka nupui hual, khawvêla ka hmangaih ber leh ka ngaih ber, ka lungngaih nîa beiseina êng min hmuhtîr thintu Lillian-i lâwm nân, a rin loh deuha ka hmêl hmuhtîr thuta ‘surprise’ ka tum a ni. Aw … ka phûr maizia chu!

Kan khaw daia kan in, fâl taka ding tlawng mai, mal leh khawhar taka min lo luah lumsaktu, Lillian-i lam pan tûr chuan eng mah hian min dang zo lo a; ka ip ah leh ka phur zawng zawng pawh chu an rit tawh lo, ka Duati hmuh ka nghahhlelhna chuan min uai rit fê tawh zâwk a ni.

Kan in, kum hnih dâwn Lillian-i nêna kan lo luah dun tawh; US Army-a ka tan avânga ka kalsan tâk chu ka ngai tawh hle mai—a ni lo, a chhûnga min lo nghâktu, ka Duati chu ka ngai ngawih ngawih tawh zâwk a ni. In chu ka thleng a. Mahse le…

Kan kawta Duati’n duat tak maia zîng leh tlai tin tui a pêk thin pangpârte chu an lo vuaiin an lo chuai hnuang mai a! Kan in kawta lehkhathawn bâwm (mail box) chu ka hawng nghâl rawk rawk a—e he le! In ka chhuahsan hnua Lillian-i lehkha ka thawn zawng zawng chu, hawn lohin, a ngai ngaiin an lo la awm reng chu niin! Eng thil nge thleng ta ngai?

In khawhar chu hmahmawh takin ka pan a. Mahse, pâwn lamah tala-in a lo inkalh tlat! Eng nge thil awmzia? Lillian-i chu a lêng chhuak lawk … lo! A zin bo hek lo ang! Kan luhkapui bul step-ah chuan ka thu hnawk a. Khawvêla in ropui ber ber aia ka thlâkhlelh zâwk, chû ka rûn chhûng chu luh ka châk thlâwt lo a ni!

Chabi ka zawng lo a, a kalhtu ka zawng zâwk a ni! Ka in kawngkapui chauh a kalh lo ang; a thinlung pawh a kalh hial a nia ka rin ni!

Engkim chu a chiang vek alâwm, hei. Lehkha min thawn ngai lohna chhan te, telephone-a biak ka tum tum pawha min chhân ngai lohzia zawng zawngte kha… Râl do tûra in ka chhuahsan hmâ zân, khawpui Café-a zanriah kan kîl zawha inhualna zungbun ka buntîr kha, Lillian-i hian ka hriat loh hlânin a lo phelh reng tawh a nih ngei dâwn hi!

Têk den aia nâ!

Chawlh kâr tâwpa ka zu in thinna, thianpa Hardy-a ‘bar’ lam chu tlai ni tlâk hlimah ka va pan a. Tequilla shot hnih ka shot zâwn thuai a. Pum a sat thlâk vawng vawng rualin ka thluaka thinrimna chu a rawn so chhuak nghâl bawk a.

‘Ngaithla teh Logan,’ Hardy-a chuan khun khân leh ngun takin ka beng bulah a rawn ti sâ sâ a. ‘Lillian-i kha i tâ a ni tawh lo! Hmâna i thianpa Jayden-a kha, sipaia i tan hmaa i thian tha ber ni reng thin nên khan maw … an pahnihin … an phatsan ta che a ni!’ a ti zui zat a.

A thu sawi chu ka bengah ri sê sê mah se, ka thinlungah erawh têk tla aiin a ring zâwk! |êk hian min la dêng lo; mahse, ka thinlung erawh têk aia nâ-in a dêng a nih hi!

Scotch whiskey, Chivas Regal ka lam belh a; ina hawn tûr bottle khat nên. Peg khat tlâk pap pah chuan, ‘Hardy, sawi tûr ka nei ve tawh lo e. Beiseina nei tawh lo mihring chu, sa ruang, la nung sî ang chauh a ni. Chu chu ka nihna!’ tiin chû December khaw vâwt hnuaiah chuan ka thianpa ‘bar’ chu ka chhuahsan zui nghâl a.

Lawmpuina… maw!?

Ka kalsan hmâ zâna kan chen dun hrep, ‘kan khum’ chul rup tawhah chuan ka mû a, ka meng reng. Chû ‘ka khum’-a zâl chung chuan ka ngaihtuahna chu sâwtah a awm—khawpui hulûm laia thian tha anga ka ngaih thin Jayden-a te inah—khawvêla ka hmangaih ber leh hmangaih ka neih chhun, ka rohlu ber leh rohlu ka neih chhun, min ti hlim ber thintu leh ka hlimna neih chhun Lillian-i nên chuan. A va han rapthlâk ngai ve le—Aw Lalpa … khawvêl tenawm hi!

Zanlai a pêl ta. Ka tho a. Scotch bottle inchhawp chungin lehkhathawn ka ziak ta ’ngawt a. Lillian-i chhiar atâna ziak ka ni lo. A address ka hriat chian êm êm ka thian tha ber emaw ka lo tih thin chhiar atân a ni ka ziah ni.

‘Jayden Jones…

‘Khawvêla ka neih chhun, ka hmangaih ber i chan tâk avânga lawmpuina thû rawn ziah ka duh viau mai; mahse, tûna ka dinhmun leh ka natna natzia ka ngaihtuah hian ka ngam ngang lo a ni e. |hianpa, ka Duati kha, ka duat aia nasain lo duat hrâm ang che aw…’ tiin bul ka’n tan a.

Chivas’ peg khat ka’n tlâk leh pap a.
‘A kianga tâpa tâla, a mi zar sek phâka awm kha ka chaw tui ber a ni fo a; amah kha, amah zawng zawng, a vai mai khân ka hlimna leh ka lungawina a ni reng thin. Ka hmâ khua leh ka nun zawng zawng kawltu leh innghahna a ni bawk thin a. Tûnah, chû ka rohlu chu nangin i lo kawl tâk siah chuan, khawngaihin ka Duati kha, lo duat hle ang che’

Pawm harsa chu ka pawm ang!
Ka thaw halh a. Ka thil ziah lai chu ka chhunzawm zêl a:

‘Kei sipai hi ka nâ a, ka rûm a ni. Silai leh laipui mû avânga hliam tuara nâ erawh ka ni lo tih pawh i hre thiamin ka ring. Mahse, nunga ka la thâwk chhûng chu, hlimna chhe tê tal pawh neih la phû ve ni hian ka inhre ve khanglang a. Chu erawh chu nangmah chauhin min pe thei asin—ka Duati hlimna leh lâwmna thlentu i nih chauhin!’

Chû thû ka ziah lai chuan kei sipai hi dawl zawrin ka zawr chiang a, ka va’n tlâwm chiang tak! Indona muala hnung tawkh tûra, ‘Retreat!’ kan ti tuar tuar thin chu nêp tê. Ka nu leh paten min boralsan tuma mittui far khat pawh sêng lo thei khawpa inti pachang thin mittui hi, chû lehkhaah chuan a far ta kauh kauh mai le…

Chu ai chuan he thu ziah chhuah hi harsa ka la ti zâwk asin; pawm harsa lutuk ka pawm theih thu ziah hi!

‘Jayden, hei hi ka pawm e— “Ani Lillian-i, ka hmangaih ber thin hian, kei aiin nang hi a hmangaih zâwk che a, thinlung keh sawm vek chungin, ka hnên atanga bo ta lakah khân, lungawi tak chungin, “Ka bâng ta!” tih ka puang ve e!’ tih thu ziah chhuah hi!

Ka duat thin kha…
‘Thil pakhat erawh ngen duh che ka nei, Jayden: Khawngaih takin inneih sâwmna chu min rawn thawn buai duh lo hrâm ang che. A chhan chu, “A nuamah pawh, a hrehawmah pawh, dam chhûng atân…” tia inneih thû a tiam tûr che kha ka hmu ngam lo a ni! A takah, i kianga hlim taka a awm tûr te, a nui sâng tûrte kha, mitthlâ ringawt pawn ka hmu ngam lo a nih hi…

‘A hlimna chu ka inhnem theihna sâng ber a ni ang a, ka inhnem theihna awmchhun pawh a ni ang. Eng pawh ni se Jayden, kei i thian tha tak ni thin hi ka lo hlim ve zêl i duh a nih ngai chuan… ka hmangaih thin, Lillian-i kha hlimna pê la, lâwmna leh lungawina chantîr fo la, ka duat thin ka Duati kha lo duat hle rawh aw…
‘–I thian tha ber ni thin,
Logan Williams.’

Ka no ruakah chuan Chivas’ chu a tâwp nân, muang chângin ka thli leh a… Ka thingremzaitheiah chuan Elvis Presley-a’n run tak maia ‘Take Good Care of Her’ hla a sak hi ka zaitîr a…