Thu hma: November 21, 2023, Thawhlehni chhùn dár 1:05 khán Zalên enkawltuten an chanchinbu zahawm tak leh hlu tak maia huang min pêk ve, Luang liam huang an zauh thu leh hmun ren lo leh inthlahrung hauh loa luang liam chhunzawm pur pur tùra min duh thu min rawn hrilh hlauh mai a! Ka làwmzia mai chu!

Kum nga chhúng chhum lo chat loa keia thu ziah mãwl leh nãwi tak tak min chhuahsak tawh hnu hian, ‘E khai, i chau tawh ang e, lo chàwl hahdam ve tawh rawh le,’ min ti àwm an ni tawh a—ngawih ngawihin a. Chu lam sawi ahnêka huang min la zauh belh tak deuh deuh hi an ã ka ti ngawt mai! Kei mi dawráwm leh thu tuihnãng pai tam lo tak mai hian tlin tak ang maw le!? Eng pawh ni se, Zalên chanchinbu enkawltute, amah Mafaa tawngkam takin, ‘… thei ni ila, beng thlenga bawp khaiin,’ chibai ka bûk e!

Kam keuna: Vànduaina hian a khát tâwkin, tui mal far angin i nun a far ve kauh kauh tawh thìn che em? Nge, ruahpui-vànàwn ang maiin a sùrin a rawn súr thìn zâwk? Kan sawi tùr, a hun laia ukil hriat hlawh, Horatio Spafford-a vànduaina tawh hi ruahpui anga tehkhin chî pawh niin ka hre lo! Keini’n, ngaihzáwng ten min then tuma, ‘Tùnlai chu ka depress riau—thih ka châk!’ kan lo tih ve thlâk ngawt thin nèn chuan inhlat vai vai tak hi a ni ringawt! Chhiar teh le …

Horatio Spafford chu : Kum 1828 October ni 20-a New York-a piang Horatio Gates Spafford hi Chicago-a dàn hre mi, hming tha tak leh hausa tak, Kristian tha tak, an làwina Presbyterian kohhrana rawng báwltu a ni a; thu hriltu lãr, DL Moody-a thian hnai tak a ni bawk. A nupui Anna Spafford nèn rawng bàwlna lam an tuipui hle a, an kohhranah pawh mi tangkai tak an ni. Sum leh pai leh in leh loah mai ni lo, fanauah pawh Pathian mal sàwmna dawngin fa panga an nei.

An sum leh pai—mei vãpah!: Kum 1871 nipui laiin Spafford-a hian a sum tam tham tak mai chu Chicago hmàr lama sum peipunna hmun (real estate company)-ah a dah a. Favàng a lo thãw a; October 8 zàn dár 8.30 a ni. Chicago khaw ro zet chu—ran in pakhat atanga kàngmei chhuak chuan a nuai ta chiam mai a. Thlí a tam si;  kàngmei chu thelh mih rual lohin a bul hnai in a kàngkai zêl a. Ni hnih chhúng lekin Chicago, khawpui ropui tak mai chu meivãpah a chang ta dèr mai! He kàngmei rapthlâk tak, “The Great Chicago Fire” an tihah hian mi 300 vêlin nunna an chán a, mi nuai khat vêlin in leh lo chánin in ding lai 17,000 vêl chu a kàng ral vek bawk a ni.

Horatio Spafford-a building pawh a kàng chhe hneh hlawm hle a; a sum peipunna building pawh a tel lehzêl! Sum a lo khâwl ve sâte pawh chu meivãpah an chang zo ta! Chicago khawpuiin chhiat tawhna rapthlâk a tawh hi Spafford-a chuan beidawnga indawm kun nán hmang loin Chanchin tha hrilna remchángah hmangin tanpui ngaite tanpui nán leh manganga lungngaite hnem nán a hmang thung thìn.

An hmangaihte—tuipui mawngah!: Chicago-in kàngmei rapthlâk a tawrh atanga a kum hnihna, 1873-ah Spaffords chhúngkua chuan England lama thlasik chawlh hman an tum a. An chhúngkaw thianpa, DL Moody-a rawng bàwlna chhim an duh pah bawk a ni. 

Horatio erawh chu a hna lamah buaipui ngai—kàngmeiin a kan bàn lehkha pawimawh chin fel tùr a neih avàngin a nupui fanaute rualin a kal ve hman lo a. A nupui, kum 31 mi Anna ho chuan an fanute pali: Anna (kum 11), Margaret Lee (Maggie; kum 9), Elizabeth (Bessie; kum 7) leh Tanetta (kum 3) mite chu French lawng lian, “Ville du Havre”-ah chuangin New York harbor chhuahsanin England an pan ta a ni.

November 22, 1873, zíng lam dár hnih a ni. Mi 313 phurtu “Ville du Havre” lawng lian chu thîr lawngin rawn su chawrh mai—an che sual zui! Minute 12 chhúng lekin chu lawng chu Atlantic tuipuiah chuan a pil vek hman! He chêt sualnaah hian mi 226-in nunna an chán a; mi 87 chiah an dam khaw chhuak. Nunna chán zíngah hian Horatio leh Anna-te fanu palite chu an tel ve hlauh! Vànneihthlâk takin nu ber Anna Spafford chu nung dama chhan chhuah zíngah a tel ve mial a. Chhan chhuah hna thawktuten nikhaw hre loa thing phel keh them lánga a mú chu an hmu a. Cardiff, South Wales an thlenpui hnu, a harh chhuah vêleh a pasal Horatio chu thîrhrui a thawn nghâl a. Thu mal pahnih a thawn, chhinchhiah zui hlawh tak chu: “Mala chhan chhuah!” (“Saved alone!”) tih hi a ni.

Thîrhrui a hmuh rualin Horatio chuan a nupui awmna lam chu a pan ve nghâl a. Lawnga an chuan laiin, ni khat chu, lawng captain chuan a nupui leh a fate chuanna lawng, “Ville du Havre” pilna lai, a faten nunna an chànna lai tak chu a kawh hmuh a. Spafford chu lawnga a pindanah lêt nghâlin, khawvêla Kristian hla chuai tawh ngai lo tùr, “It is well, with my soul” tih hi a phuah chhuak nghâl a ni.

A hnua Anna-i unaunu (half-sister) hnêna lehkha a thawnah chuan, ‘Kár hmasa Ningani khán, lawngin kan hmangaihte pilna hmun chu kan thleng a. Tui hnuai—khútah, mél thum mawngah an awm tih ka hria. Chuta pil, kan hmangaihte chu ka ngaihtuah lo; an him tih ka hria—Beramno kiangah chuan,’ tih a ziak tel a ni.

Anna chhan chhuah a nih hnu, mi dang chhan chhuahte nèna hmun him lam an pan laia Anna thu sawi chu, lawng a chuanpui zínga mi Pastor Nathaniel Weiss chuan a hriat reng thu a sawi a. Chu thu chuan Joba tawngkam a zúl hle: ‘Lalpa’n fanu pali min pe a; Lalpa’n a la leh ta a ni. Engtik ní-ah emaw chuan a chhan ka la hre thiam ang.’

A nihna takah chuan Anna hian an chhiat tawh hi a tuar hle a. Mahse, he lungngaihna chhûm pik tak hnuaiah hian aw ném leh zaidam takin, ‘Chhan neia chhan chhuah i ni!’ tih thu a rawn hriattír tih a sawi. Tum khat chu, a thian pakhatin thu a hrilh thin, a hriat chhuah fo chu a sawi chhuak a: ‘Kan duh  kan neih lai leh kan hlim lai hi chuan Pathian hnêna làwm thu sawi leh a duh záwng tih hi a awlsam thìn; mahse, khaw that lai chauha Pathian thian nih hi hlau hle ang che,’ tih thu hi!

Chhiatna—a la kiang lo!: Fanu pali an chàn hnuah Horatio leh Anna te hian fa pathum an neih belh leh a. Horatio Goertner (b. 1875), Bertha Hedges (b. 1878) te leh Grace (b. 1881) te an ni. Lungngaihnaten kian zai an rél tawh dáwn emaw tia hlim taka an awm mék laiin a la ûm zêl tho! Kum 1880, February ni 11-ah, an fapa neih chhun, Horatio Goertner Spafford chuan khawsikpui avàngin a boralsan leh ta!

Rawng bàwlna zau zâwk: Chutianga namén loa an chhúngkaw chunga thihnain ro a rèl lai pawh chuan Spaffords chhúngkua chuan an hriat leh an rin Pathian rawng bàwl thulh an tum chuang lo. August 1881-ah an chhúngkua chuan America chhuahsanin Jerusalem-ah an inbéng bel a. Mi rethei, dam lo tanpui ngaite tanpuiin chènna tùr in nei lo naupangte an enkawl zui thìn. An nuam tih ber chu, hêng mi hnuaihnung leh mi harsate hnêna Isua hmangaihna thu hril hi a ni.

Horatio Spafford hi malaria avàngin September 25, 1888-ah kum 59 mi niin a boral a; Anna Spafford chuan an hna la thawh zawh loh chu Jerusalem leh a chheh vêlah a chhunzawm zêl a; kum 1923-a a thih thlengin, rinawm takin Pathian rawng a báwl zui a ni.

Thu hnu kháwi: “It Is Well With My Soul” hi Mizo tawngin Zosapthara (Rev Edwin Rowlands) khân min lo dahsak a—“letling” han tih tùr chu a ni hauh lo! A thlûk chauh hi a hmang em maw ni chu aw … tih tùrin Mizo tawnga a dah leh a sap tawng hi a inpersan êm êm mai a. Tin, Horatio Spafford hian cháng li a phuah a; Zosapthara thung hi chuan cháng thum chauh min siamsak thung. 

Govt Higher & Secondary School, Aizawla páwl 11 leh 12 kan zir ve laia Mizo subject min zirtír thìntu, Sir Hmingtea @ C Vanhmingliana’n Mizo tawnga “It is well” a lehlin fuh zet mai hian ka’n tlip ang e:

Ka Thlarau tan A Tha E
(It ts well with my soul)

Muanna luipui iangin min chîm mék laiin,
Lungngaih tui fâwnin min nang vêl;
Eng pawh thleng mah se ti hian hril rawh min ti: ‘Ka thlarau tán chu chu a tha ber.’

    A tha ber, a tha ber,
    Ka thlarau tán chu chu a tha ber.

Sualna lo hrángin buaina lo thleng mah se,
Krista thisen hlu zárah chuan;
Ka lungngaih zawng zawng min hriatpui vàngin,
Ka hneh ang, a thisen zárah chuan.

Làwmna thurûk min pe, vàn làwmna thurûk,
Ka sualna zawng zawng tlêng faiin;
Kros-ah khéng betin ka rit phurh a bo ta,
Aw ka thlarau, Lalpa chu fak rawh.

Lalpa hun ruat tàwpna pawh lo thleng mah se, 
Lalpa chu vàn chhûm zíngah khian;
Tawtawráwt ri nèn, ropuiin lo lang se,
Ka thlarau tán chu chu a tha ber.

© 2023. C Vanhmingliana. Copyright reserved.