Nizân kha, mang lama ka hmuh pawh ni se la, mang chhia a ni chiang ang! Man nawn leh hlauin mut dâwnah ka tawngtai uluk khawp ang. Mahse, mumang a ni lo a, a taka ka tawn, in ina ka tawn ngei a ni si a. In ina thu ve reng, thu tlawk tlawk a ni zâwk ang chu--kâwma titipui tûr nei loa khawhar leh mal taka thu ngawih ngawih keimah kha, ka va’n inkhawngaih tak!

Zan dang angin ka rawn rîm leh ngei che a nih kha—nizân khan. Nang pawn i dân ngai tê bawkin tha taka min kâwmin min be ve siam siam a. I titi duhzawng tak, Hollywood movie chhuak thar chanchinte sawiin tawng kan inchuh a; Katherine Hepburn ka âtchilh luat tuara i thîkzia min hrilh paha i’n titau der kual kawi vêl te kha, ka va’n làwm tak che. ‘James Dean i star ve tho a,’ tih paha lehlam hawia in hawi tau nghan nghan te kha, hmuhnawm ka tihzia che kha aw…

I kiangah khan thil ho hi a mawi tlat thin a; a hoh poh leh ka ngaihlu thin. Puithû leh khunkhânna tel loa kan awm dun mai mai thinna khan rilru a fan tâwk chiah thin a; han serious deuh hlek thin phei ila chuan, ka lairil hi a kanin a kâng thei hial thei ang le! Ho deuha awm kha ka kham tâwk a tling mai thin a, mâwl tak maia kan nih ang anga kan awm mai kha ‘a tâwk chiah’ a tling mai thin. In ina hlimna tawng thin, i zâra lungawina tawng thin, i kianga thlamuang thin, nang vânga hmangaihna tleipui thin keimah kha… ka va’n inngai tlawk tlawk thin tak!

Ka inngaih êm êm ’ngawt thinna chhan chu maw … nizân khan tû a ni tih pawh ka hriat loh kha a rawn faifûk raih a—min chhuahsan ta daih a nih kha. Kha pa khan khawih nge a hruai dâwn che ka hre lo a; eng in ti dûn dâwn nge tih pawh ka dàwn phâk loh lam thil a ni. Mahse, i phûr hûrh dânah khân i hur mû a sawh kehsak tawh che nge ni ang aw…? tih te ka ngaihtuah zui neuh neuh a. Mal ngawih ngawiha awm tûra min kalsan hnû khân, engtin tak awm dûn ang che u maw aw…? tiin ka insik neuh neuh zui asin!

Chûng ka ngaihtuah neuh neuh avang chuan ka tap ta ngawt pek a! Ka tah ngawtna chhan chu ka inngaihtuah a; thil dang vâng ni thei leh awm thei hian ka hre lo—ka hmangaih êm vâng che tih mai loh chu. Ni e, ka thinlung, ka rilru leh ka ngaihtuahna zawng zawng hi ka lo hlân reng tawh che a ni tih ka inhre chhuak thar thut a. Nizâna i ina mi khawhar pa kha ka inngai a ni!

Kut inkhalhsak niap niap paha kan titi siam siam thin lai te; in kawt zâwla inkai chunga tei mai mai paha kan thu sawi, hu ho tak takte kha… inhmangaihte thu sawi a nih miau avang khan kei, ka tan chuan a ho lo a; inthlahlel leh inngaihna vâwrtâwp thlentîr nâna kham tik nei loa ka chanpual liau liaua ka ngaih i hmui ka fawh vawng vawng thin laite kha … tui kan tih dun thinziate kha aw… Kha kan khawvêl, khang kan nun, khatia kan induatna hmun, in ina nawmna leh hlimna tawnga khawsa thin, keimah kha, ka va’n inngai thin tak êm aw!

In theawmte pawh khan mak an ti viau lo maw—nizân thil thleng kha? Zan dang ang lo taka in kawta motor rawn in-park tuk tuk mai kha. I chuanna tûr lah kha, duh thlan chawp ngai hauh loin i han pan ding chat mai a. In kawta in êng chhit, lo êng rii riai hnuaia ding, a car kianga a fawh vawng vawng laite kha in thenawmte khan an lo hmu fuh ‘palh’ ve che ang em le? A nih, in ina khawhar taka awm keimah ka inngaih ang hian anni khan min ngai ve ang em le?

Kha i chhuahpui pa, eng rii riai hnuaia fâwp dawk dawktu che lakah khan i hlim zân em? Kei, i kut khalhsak niap niap thinin ka tih hlim ang che khan a ti hlim ve thei che ang em? In tualzâwla inkai chung mai mai paha hlimna kan tawn mai thin ang khan, hlimna a pe ve thei che em le? A nih, a kiangah huan i tawn thin ang, lungawina leh hlimnate kha i hmu thei meuh ang maw?

Kei zawng, heti hian, mahniin, in ina hmangaihna lungawipui thin hian, kha keimah kha, ka inngai vawng vawng mai thin a nih hi!

I Missed Me
–Jim Reeves
Last night was the worst night of my life no doubt
‘Cause while I stayed at home someone else took you out
I cried ‘cause I love you with all of my might
And I missed me, how I missed me at your house last night.

I missed holding hands walking out on your lawn
I missed the sweet kiss that was mine for so long
Were you happy with new arms
Wrapped around you so tight
I missed me, how I missed me at your house last night.

Did the neighbours say they noticed anything strange
Like a different car parked in your drive for a change
Did they watch as he kissed you beneath the porch light
Did they miss me like I missed me at your house last night.