Pi leh pute atanga kan rochun thawmhnaw, thiamhnang leh la deh lama kan ro hlu neih chi hrang hrangte hi ngaihhlut nachang kan hre deuh deuh zel a, sumdawnna atan te kan hmang ve ta a, hnam dangte pawhin min hriatsak ve ta viau mai a. A lawmawm hle a ni. Mahse, hetia Mizo silhfen leh hmanraw chi hrang hrang khawvel hmuh tura kan pholan mek lai hian a humhalhna lampang hi kan hlamchhiah rei palh ang tih a hlauhawm khawp mai. Kan hnam incheina/silhfen chi hrang hrang - ngotekherh, kawrchei, puanchei, hmaram, khumbeu leh a dangte hi hnam dang neih ve loh, kan ta liau liau a ni. Heng puan mawi tak tak rawng inchawih mawi em em mai te hian kan pi pute ropuizia a tarlang a, tunlaia kan phalrai viau takah hian company thenkhat chuan an lo hmu tai viau tawh mai thei a, sum hai luhna tha tur nia ngaiin a neitu nihna te hial an lo beisei reng tawh mai mai thei a ni. Chutiang chu hmun dangah pawh a thleng fo tawh nghe nghe. Mi tam takin kan khawtlang nun tihzalen an duh mai bakah sumdawnna lamah pawh inhawn zau ve tawh a, hnam dangte nena inchiahpiah tak tak tawh an duh lai hian kan hnam himna tur leh kan pi pute rohlu himna tur hi kan ngaihtuah thlen a ngai hle tih erawh hriat a tha. Mihring thiam thilte hi dan hmang humhalhna a awm a, chu chu Intellectual Property Rights (IPR) an ti a. Chu dan (chanvo) hmang chuan miin ama thil hmuhchhuah/siamchhuahah neitu nihna an nei thei a, mi dangin an lo chuh ve ngawt thei lo a, a neitu thu lo chuan lo siam chhuah leh hralh chhuah phal a ni lo bawk. Intellectual Property Rights hnuaiah hian neitu nihna hauh theihna chi hrang pasarih a awm a, chungte chu - Copy rights & related rights, Trade marks, Geographical Indications, Industrial Designs, Patents, Layout designs of integrated circuits, Trade secrets (protection of undisclosed information) te a ni. Hman kum lawk khan Indian Chamber of Commerce (ICC) chuan Naga Shawl leh Assamese gamosa te tan registration an dilsak thu chanchinbuah tarlan a ni a. Hetianga hmun pakhat huam chhung bika thil siam chhuah/thar chhuahte leh ram bial khata chengte thiam thil bik humhalhna hi Geographical indication (GI) hmanga neih theih a ni, Himachal Pradesh-a an siam Kulu Shawl te, Malabar thinghmarcha te, Assam maimaw puan (Muga silk) te pawh GI-ah ziah luh a ni tawh nghe nghe. Kan hnam silhfen lar tak Thangchhuah kawr kan tih mai hi tualchhung handloom-a tah a ni a. Hman deuh lawk khan phai lama puantahna khawl tah, a rawng leh a zia ang chiah, hak nuam zawk a lo chhuak a, mi tam takin an ha sup sup a nih kha. Hei hian ngaihtuah a tithui khawp mai. Kan hnam puan chi hrang hrang, rawng inchawih mawi tak takte hi design nalh tak taka siamin hnam dangten sumdawnna atan an hmang mai ang tih te hial a hlauhawm tan ta. Chutiang chu a thlen lohna turin thuneitute leh a kaihhnawih pawl hrang hrangten hmalak thuai a ngai a, IPR (or GI) hmanga kan humhalh thei lo a nih pawhin sorkar laipuia Ministry of Textiles hnuaia dan awm sa hmangin kan hnam puante hi tualchhung handloom-ah chauh tah a nih a, phai lama khawl lian (Power loom) hmanga siam chhuah phal a nih lohna turin hma a lak a ngai ta a ni ber. Silhfen lam thil mai bakah kan ram hmul (kan rama tualto thing, thlai leh hnim) chi hrang hrang damdawi leh thil dang atana kan hman thinte hlei hlei hi humhalh a hun. Mizoramah hian ramhmul damdawi (medicinal plant) tam tak a awm a, la hmuhchhuah loh pawh thahnem tak a awma ngaih a ni. Kan hriat tlanglawnho chauh pawh hi zir chian tham a ni. Thisen sang enkawlna atan Phuihnam/Sertawk mu kan hman te, pem enkawl nan thasuih, pum na leh kawthalo enkawlna atan ailaidum leh Sai thatzia te hi kan hre vek awm e. Heng kan tualchhuak damdawi hlu tak takte hi damdawi siamtu company-ten an la rawn hre fuh anga kan hriat loh laiin sumdawnna atan an hmang mai ang tih a hlauhawm hle a ni. Kerela-a cheng, Kani hnamte chuan hun rei tak chaw ei mumal lo a awm chungin hna rim tak an thawk thei a, an taksa a chak reng tho tih an sawi thin a. Chutianga an awm theihna chhan chu ni tin thei chi khat ‘Aarogyapaccha’ an tih mai chu an ei thin vang a ni. Chu chuan Tropical Botanic Garden Research Institute (TBGRI) a thawk scientist-te beng a verh ta hle a. An han zir chian hnu chuan damdawi tha tak a siam theih tih an hmuchhuak a. Chu damdawi Jeevani siam phalna chu kum 1995 khan Arya Vaidya Pharmacy, Coimbatore hnenah pek a ni a, hmasang atanga chu thei neitu Kani hnam chuan an hriat loh karin an rohlu tak mai chu an chân ta daih mai a. Mi thahnemngaiten hma an lakpui chung pawhin tih vak ngaihna a awm tawh lo. Keini pawh hian kan rama tualto, hmun danga awm ve lo thing leh hnim chi hrang hrang, pipu atanga kan inrochun te hi fing taka kan venhim a ngai tawh. Kan ramah hian hmun dang atanga lokal scientist an lo lang leh hlawl thin a, khualtha thlenin kan lo thleng fo a, an duh duhnaah an tei vel a, restricted area thlenga kalte pawh an awm thin. Hetia kan inphalrai viau lai hian kan thil neihte hi ngun takin an lo zir ru reng mai thei a ni. Ram danga atanga lokal mi thiamte laka kan ram leilung, nungchate, thing leh mau leh hnimte kan phalrai tawh lo ila a tha ngawt ang. UN hnuaia mi pawh nise, Japan atanga lokal mi thiam turu tak pawh ni raw sek sek an cham chhunga uluk taka vil reng a, kan nungcha leh thil dang an paipawn ruk leh ruk loh thleng a endik vek ni a tha. Chutiang chu bio-piracy venna atan ram dangah pawh an tih dan tho a ni. Kan hnam nunphung, kan hnam ziarang, incheina chi hrang hrang, kan hnam lam te bakah kan tualchhuak damdawi hmakhaw-sang atanga kan inrochun chhawn zelte hi dan hmanga kan humhalh ve a tul ta khawp mai.