Thla hmasa (February) ni 21 kha International Mother Language Day a ni a, khawvel pumah pianpui tawng pawimawhna inzirtirna ni atana hman thin a ni. 

UNO peng pakhat UNESCO chuan India rama tawng hrang hrang 197 chu ral mai thei dinhmuna ding (endangered language) ah a ngai a, chung zingah chuan Mizo tawng pawh a tel a ni. Hetia ngaih mai chuan mizo tawng te chu hmangtu kan la tam a, Mizoram chhung leh pawna mizo hnahthlak tam zawkin tawng tuallengah kan la hmang a, chuti mai chuan a ral lo ang. Amaherawhchu, kan tawng, mizo tawng hi kan ti hausa tial tial em, nge kan ti dal tial tial zawk tih erawh chhut tham tak a ni. 

Khawvel hmasawn rualin mizo te pawhin hma kan sawn zel a, kan pi leh pu te’n an hriat ngai loh leh mizo tawng pawha awm ngai lo thil thar kan hmelhriat zel a. Chutiang hnam dang thil kan hmelhriat thar te chu mizo hming put tir talh emaw mizo tawnga dah vak ngaihna awm lo te a ni hlawm a. Entir nan, pen, pensil, motor, google, baptisma tih leh thil dang tam tak hi mizo tawnga dah a, tawng kauchheh thar chher tum talh ai chuan a nih ang ang kan tawnga kan seng luh mai hi a hahdamthlak a, kan tawng tih hausak nana kan hman mai hi a tha a ni. Sap ho pawh hian an tawng tam tak hi Greek tawng te, Latin tawng leh tawng dang atanga an lak a ni ve nawk bawk a, tlawmah an la lo a, an tawng tih hausak nan an hmang hlauh a ni.

Hetih rual hian thil tam tak, mizo tawnga kan neih reng si, sap tawnga kan sawi zel mai erawh a fuh chiah lo. Hetiang a nih chuan kan tawng kauchheh tam tak hi sap tawngin a luahlan hlen thuai ang. Kan neih sa pawh kan tih riral zel chuan kan tawng hi kan ti hausa thei hauh lo ang. Entir nan, bathroom tlukpui bual in kan nei a. Mahse, tumah bual inah kan inbual duh tawh lo, bathroomah kan inbual ta vek mai. Inkhawmpui tih te hi a mizo a, a that teh reng nen conference in kan thlak zo a, chhun chaw aiah lunch/tiffin kan pai a, ‘chhun chawlh’ chu ‘lunch break’ in kan thlak a, ‘zanriah’ aiah ‘dinner’ kan ei a, ‘tukthuan’ te pawh breakfast in kan thlak zo ta. Kan tawngkauchheh mawi tak tak, sap tawnga kan luah lan tir tithih hi a tam ta khawp mai. Hetiang a nih chuan kan tawngkauchheh mawi tak tak hi tun atanga reiloteah a la thi sawn ngei ang. 
    
Kar kalta Pathian ni zan khan kan biak inah speaker pakhat, Pathian thu sawi thiam takin thu a rawn sawi a, darkar chanve tling mang lo hun a hmang a, sap tawng thumal 41 a hmang hman a ni. Sap tawng thumal a hman zinga 11 chu mi nawlpuiin kan pianpui tawng ang maia kan hmang tlanglawn tawh- sermon, crusade, google, pastor, baptisma etc. tih te a ni a, a ngaihhnathiam theih viau a. Chutihrualin, a thusawi karlakah  sap tawng thumal 30 dang a rawlh te erawh mizo tawnga kan neih ve tho te an ni a, saptawng-a accent, atheism, polite, discount, loneliness, devastation, illustration, religion, footprint, beach etc. a tih avang khan kum upa lam tan chuan a fiah lo zawk mah mai thei. Kum 2023-a pulpit atanga Pathian thu sawituin sap tawng thumal 41 a hman tawh chuan kum 2050 a Pathian thu sawitu chuan sap tawng thumal 100 a hmang tawh mai thei a ni.

Thangthar te’n kan pianpui tawng (mizo tawng) kan thiam loh telh telh chhan hi sap tawng kan ngaihsan vang niin a lang. Sap tawng thiam hi changkannaah kan ngai a, sap tawng thiam tir tumin kan fate pawh sap sikul (English medium school) ah kan kal tir hram hram a, sap tawng an thiam chuan lehkha thiamah kan ngai a. School ah nise mizo tawnga tawng hlek chu zirtirtu te’n an hrem zel mai bawk si. Mizo tawng zir tir leh thiam tir naupang te mizo tawnga tawng kan phal loh miau chuan an pianpui tawng an thiam lo tial tial hi a awm viau a ni. Khawvel pum huapa mithiam langsar te chuan naupang hian pawl hniam lamah chuan an pianpui tawng ngeiin lehkha zir se, an thil zir an man chak bakah an thiam a nghet bawk a, hnam dang tawng an zir hunah pawh an thiam chak zawk bawk an ti a, a pawm awm khawp mai. Kan mi hmasa, Central Service leh All India Services a inziak thing, kan hranghlui te kha A AW B a zirna bul tan vek an ni a, sap tawng an thiam lo chuang miah lo. Khawvel ram dangah hian mahni pianpui tawnga naupang tawng phal lohna school hi awm ve tak maw?

Sap tawng te, vai tawng te hi thiam kan tum tur a ni a, theih phei se anmahni tluk hialin thiam ila a tha hlei hlei. Chutih rualin sap tawng ngaihsan luat avanga kan tawng ngainep nan leh thlauhthlak nana kan hmang erawh a fel lo khawp mai. Kan tawng mawi tak hi Pathian min pek a ni a, kan tawng kan humhalh hi a Pathian thu em em a ni. A chhan chu Pathian hian hnam tin hi ze hrang hrang leh tawng hrang hrang neiin min siam a, kan awmna turin ramri te nen lam min kham sak bawk a. Chuvangin ramri humhalh te, tawng humhalh te, hnam ziarang humhalh te hi a Pathian thu lohna a awm miah lo. Vanramah pawh khian mizo tawng thoin kan tawng mai law’ng maw? Vanram tawng a awm hrang te a nih loh chuan vai tawng emaw sap tawng emawa kan tawng thutna chhan tur a awm dawn em ni? Hmangaih Johana’n Pathian lalthutphah hmaa mipui tam tak, chhiar sen rual loha tam a hmuh pawh khan hnam tin zinga mi te, chi tin zinga mi te, tawng tin zinga mi te (Thupuan 7:9) tih a ni tlat a ni.