Fur ruahpui leh thlipui inkawp 'Cyclone Komen' avangin July thla chawlhkar tawp ber khan Burma ram chhung hmun hrang hrangah tui a lian nasa hle a. Chhim thlang lama Irrawaddy/Ayeyarwady luipui lianin khaw tam tak a chim laiin Mizoram leh Manipur hnaih Chin Hills vela Zofate chenna khaw eng emaw zat pawhin harsatna an tawk a, nunna chan engemaw zat an awm a ni. Burma sorkar kalphung hi a inthlak danglam ta khawp mai. Kum 2008-a ‘Cyclone Nargis’ vanga mi 130,000 vel an thih kha chuan an inkharkhip tlat a, ram dangin an puih pawh an duh lo bur a nih kha. Tun tum tuilianah hi chuan military junta hian tanpui turin ram dangte a sawm ruai thung. Chin Hills vela chhiatna lo thlen chhan hi ruahsur nasa vanga Run lui lian leh Yazagyo tuikhuah sah vang a ni a. Lui lian a kuanga leng lo lo fawn let leh a nih avangin anni lam chuan 'tuilet' an ti mai a, khaw engemaw zat a chim a, tui leh chirhdumin chenna in leh leilet tichhe nasa hle tawh. Chung zingah chuan Mizo khua Kanan hi a tuar nasa ber an ni awm e, he khua hi Mizo pa din a ni a, Kabaw phai kuam (Sagain division) a Tamu district, Khampat Township huam chhunga awm a ni. Tuilian hian in 102 a len bo vek a, chhungkaw 750 vel enkawl leilet acre 1000 vel zet a tichhe vek bawk. Zo hnahthlak tamna, pi leh pu hun laia kan ram Chin state-ah hian Kalemyo township a khaw 44 lai tuiin a chim a, leimin leh kawng chhia avangin tlawh pawh theih lohin an awm reng a. Zirtawpni velah khan chenna in nei lo mipui nuai khat vel camp-ah an awm tawh. Tahan chhehvelah pawh tuilian hi an tuar nasa hle bawk. Kan unaute chunga chhiatna thleng hian Mizoram lam a nghawng nghal a. Kohhranin tanpui an rel a, political party hrang hrangin thuchhuah an siam a, chief minister pawhin prime minister hnenah a thlen a. Central YMA pawhin vehbur khawn sak an rel a, Mara Autonomous District Council phei chuan emergency meeting an koh phah hial a. ZONET TV te, Zofa Global Network te, PUMP te leh pawl dangte pawhin mipui hnenah thawhlawm an khawnsak mek bawk. Zofate inunauna leh inzawmkhawm lehna lama theihtawp a bei thin, hnam thil a nih tawh chuan tim miah lo a che thin zirlai pawl lian pahnih (MZP leh MSU te) leh ZORO pawhin a huhoa tanpui dan tur an rel fel tawh bawk. Upain ‘Harsatna han tawh chiah hian unaute an hriat thin’ an lo tih angin Burma lama kan unauten chhiatna an tawrh mek lai a unau, chi khat leh hnam khat kan nih zia a lo lang nghal hi a ropui hle a ni. Rambuai lai khan Mizoram lam hian harsatna namen lo kan lo tawk tawh a, mi tam tak an ral tlan chho a, anni lamin an lo tuamhlawm a, in leh lo an dinpui a, sipai sorkar lakah an hum a, harsatna pawh an tawh phah nual a ni. Hun a lo kal zel a, Mizoram lam hi kan dinhmun a lo tha ve leh ta zawk a, beiseina sang tak nen an rawn chhuk ve thung a. Mahse, zep thu a cheng lo, kum za chuang fe sorkar hrang awpna hnuaia lo awm tawh kan nih vangin mizia leh khawsak phung a lo hrang hle tawh a. Chu chuan kan inkarah harsatna pawh a siam nasa hle a ni. Chutihlaiin, a rilru zau tur zawk leh hrethiam tur zawk keini lam hian kan hrethiam duh lo fo thin a, inti-Mizo bik takin (kan hnampuite ngei chu) hnam dang enin kan en a, sakhaw dang bia vaihote ai pawhin kan hmu mi hrang zawk fo thin, a zia lo khawp mai. Tawng-thu-chhe-loah keini lam hian harsatna tawk ve ta ila kan belh tur leh min tuamhlawmtu tur chu kan unaute tho hi an ni si a. Mahni chipuite hmuhsit a, hnam dang en a en tlat hi chu hnama min dintu pawi hi kan sawi reu reu ang tih pawh a hlauhawm. Mipui nawlpuiin ‘Burma mi mi sual’ kan tih thin te, ram hruaitu luten min chim ral mai an hlauh thu an sawi thin te hi hriatchian loh vang mai a ni. An sorkar kalphung a inthlak atang phei kha chuan mi tam tak an haw chho tawh zawk a, kum 2009 a CYMA-in ram dang mi Mizorama awmte chhiarpui an neih kha chuan (Chakma an chhiar tel lo a) mi 6912 chauh an awm. Chakma foreigner zat te, Meitei leh bengali awm zatte hi han chhiar ve ngat ila an tam ngawt ang. Ruihhlo chungchangah pawh hian khi lam atanga lo lut ai chuan khulai lawk (Cachar) atanga an rawn tawlh luhte hi thalaiten an thihpui tam zawk daih a, pawikhawihna lamah pawh Burma atanga lo chhukte inhnamhnawihna hi mipui ngaih aiin a tlem daih zawk. Engpawhnise, tun hnaia kan hnam nihna lamah kan harh thar tan mek hi a lawmawm khawp mai. A changa mi sual anga kan ngai vek thin te, boruak sosang eng emaw vanga hnawhchhuaha vau ngawt mai te, hmuhsitna tawngkam cheh khum fo mai te hi a reh ta tial tial a, a lawmawm hle a ni. Hman deuha T Melody in Aizawl leh khawpui thenkhat a concert an neih khan boruak a her danglam nasa hle a. Chumi hnu lawkah sipai sorkar kalphung an inthlak a, kum 2012 a inthlanpui an buatsaih hnu atang phei chuan mipui pawh an zalen tan ta. Sorkar hrang hrangte pawhin Burma ram an en dan a danglam tan ta. Mizoram lam pawhin kan unaute kan en dan a inthlak danglam chak khawp mai. Hnam vei sa lem lo zaithiam te, mi lar tak tak te an zin chhoh tak fo hnuah phei chuan hnam thila harh thar fe fe pawh an tam ta. Hetia Burma sorkar khi a inhawn zau zel a, inkalpawhna te a that hunah phei chuan sumdawngte hian Kolkata, Katmandu, etc., vel ai chuan Mandalay vela bazar an la thlang ngei ang a. Chutih hunah chuan khi lamah khian chhungkhat laina, thenrual tha iptepui banna tur neih kan la tum fur ang mawle. Kan unau chhiatna namen lo an tawkte tanpui turin thahnem ngai ila, hnam khat kan nih mai bakah inmamawh tawn reng kan ni tih te ngaihtuah fo ila. Pathian ruat Zofate inzawmkhawm leh hun te, mahni a ro inrelna hun te kan thlir mek lai hian hnam inpumkhatna hi i buaipui zel ang u.