“Min ngaihsak lo, i nupui leh i fate piancham pawh i hriat loh kha..,” tiin a tum bar bar ta mai a. An han inhnial chho rap rap a, huat thu lian tham sawi tur a hre lo. A pasal chu a buai ve a, zing atanga zan thlengin tih tur a ngah reng a. Ama hna bakah khawtlang nun siam thatna bawhzuiin a chhuak tam a, chanchintha hril buaipuiin ‘evangelism cell’ an vakchhuak zan tin a. Nu leh naupang an khua a har a. Han sawisel leh ho mai maia chhuak pawh ni lo, ‘chhan thaa chhuak’ an ni bawk si! Nu ber tan chuan khawtlang chu a ngeiawm a, chanchintha hril pawh chu khawharna mai mai! Chhungkaw buai leh nupa inkar fel loh chhan ka hriat zin ve thin tak chu, “A chhuak tam, kan tan hun a nei lo,” tih hi zu ni ve a! Mihring inlaichinna siam tha tur hian awmho tam a tul thin. Inngaihsak dan tha te, inbiakpawh tawn dan duhawm zawkte hi zir a tul khawp mai. Mi dang ngaihsak hi a pawimawh tak zet. Buai lutuk avanga kan nuna mi pawimawhte ngaihsak hman loh hi a pawi khawp. Chhungkaw kehchhiat phah khawpa khawtlang leh kohhrana kan inhmang a nih ngat phei chuan khawtlang nun siam that leh chanchintha hril nen a inhmeh tawh hauh lo. Khawtlang nun siam that leh ram hmangaih dan tha ber chu mahni chhungkua theuh enkawl fel hi a ni. Pawn lam leh kohhran leh khawtlanga mi tha em em, veng mipuiin an fak luai luai tam tak hi an chenpuiten an fak vek kher lo thei. Pawn lama ngainatawm em em, inchhungah ngaihawm lem lohte pawh a awm theih ang. Pawn lama tangkai em em, inchhunga tangkai miah lo ‘nu’ leh ‘pa’ hi a awm theih mai awm e! Khawtlangin a thlamuanpui em em, chhungkuain an thlamuanpui lem loh nula leh tlangvalte pawh an awm mahna! Mi chhungkaw buai kan buaipuina lamah mahni chhungkua a keh chhe daih ang a, mi fa sual kan um laiin kan fate an lo buai ve hman ang tih a hlauhawm! Mahse patling leh nutling hi inah tawm thup ila tunge ram leh hnam leh Pathian rawng bawl chuang ang? Inah awm reng ila tunge ei zawng ang? Kan khawtlang a him theihna tur te, mi dang tanpui tur te, kan kohhran kan chaka Pathian ram a zau nante hian tu emaw chu a chhuah a ngai. Chhuak nazawng kan haw dawn a nih chuan mahni hmasial nun a ni thei. Tu emaw a chhuah a ngaih chuan in lama awm ten a ai lo awh zo tura tan lo lak ve pawh a ngai. Hun hman thiam hi zir a ngai. Tih tur leh mawhphurhna nei vek kan ni. “Ka hman lo,” tih bik rengte hi a dik hauh lo. Thil zawng zawng erawh mi pakhat tan tihkim sen a ni lo. Kan nun kan hman danah hian hun siam rem thiam a ngai. Khawtlang leh kohhrana kan tih tur te, kan hna leh ina kan mawhphurhnate hi inbuktawktir thiam a tul. Chhungkaw thu hi rel fel phawt ila, chhungkua hi inngeih phawt ila, chhungkua hi hlim phawt ila, chhungkuaah khawtlang tana tangkai kan inzirtir thei ang a, chhungkuain Pathian tih dan kan thiam ang. Chutiang chhungkaw tha awmkhawmna khawtlang chu siam that hran a ngai dawn lo alawm. A nuam hrim hrim. Khawtlang nuamin ram nuam a siam nghal mai dawn leh nghal. A inkhaidiat dik chho zut mai le. Khawtlang nun siam that kan tih te, ram leh hnam humhalh kan tih fote hi chhungkua hlim atanga intan tur a lo ni dawn a nih chu. Chu chu ram leh hnam humhalhna hnuk chu a ni. Chanchintha hrilnaa a hnukpui a ni bawk. A khaidiat hmasa ber chu chhungkua chu a ni. A khaidiat hmasa ‘chhungkua’ ber kan buai chuan khawtlang tan leh kohhran tan pawh han pen chhuak ve sateh mah ila a sawt mawh khawp ang.