Mizoten Chanchin Tha kan hriat hma, kum 1893 daih tawh kha a ni a. Kum 37 mi James Milton Black chu Pennsylvania, USA-a khaw pakhat  Williamsport-a Methodist kohhrana thalai Pastor (Youth Pastor) leh Sunday sikul zirtírtu a ni. Ni khat chu dâk inah a kal dáwn a. Kè-a kal a ni bawk a, ni danga a kawng zawh ngai loh kawng të (alley : in leh in/bang leh bang inkára kawng/kawtthlër zim të) chu a zawh a. A kawng zawh thin ai chuan chu kawng chu zímin kîkawi zâwk fé mah se a tàwi a ring zâwk tlat a, chu vànga zawh chu a ni ber.

Shortcut a zawnna lama a kawng zawh chu a lo tawi zâwk nangiang mai. Tin, tùn hmaa a la hmuh ngai loh leh Williamsport khawpui chhúnga awm thei pawha a lo rin ngai loh a hmuh phah hlauh bawk. Chu chu retheihna namén lo tuartute dinhmun retheih thlâkzia a ni.

Chutia mi retheiho khawsakna kawtthlèra a kal mék lai chuan hmeichhe naupang tawp zet mai, pawnchhe zawm khâwm ni àwm tak kawr tawp leh pawr chhe zet mai hà hi a va hmu a, an tualzáwl a lo phiat fai tûrh tûrh a. James Black chuan a pan ding nghâl chat a.

‘Mami, tu nge i hming min hrilh thei em?’ tiin a zâwt.

Chu hmeichhe naupang chuan inthlahrung zetin, ‘Bessie,’ tiin a chháng a.

‘Kum eng zât nge i nih min hrilh leh thei em?’

‘Kum 14.’

‘A nih leh, Biak inah i inkhâwm ngai em?’

Chu zawhna chuan Bessie chu a ti tímin a ti ti zual emaw tih tùr hian hreh zetin, ‘Inkhâwm ngai lo,’ tiin Black-a zawhna chu a chháng a.

‘Engati nge i inkhâwm ngai loh a?’ a ti leh kher.

Bessie chuan, ‘Inkhâwmnaa hâk tùr kawr hâk thlâk emaw kawr hâk tlâk emaw ka nei lo a …’ a ti chuai ta raih mai.

Chutah James chuan, ‘Bessie, ka nupui leh a thiannute an rawn léng thuai ang. Inkhâwmnaa hâk tùr kawr pawh i nei thuai ang,’ a ti ta a. Dâk in pan chuan a kalsan ta a.

James-a chuan a naupang hmel hriat thar, Bessie chu a taksain kalsan mah se, a rilru erawh chuan a kalsan ve thei hauh lo mai a. A hnu lawkah Bessie pa chu nasa taka zu in thìn, zu ngawlvei a ni tih te a hre leh zêl bawk. Bessie chanchin chu a nupui, Lucy Love Le­van pawh a hrilh ve zêl a.

Pathianni chawhnu tum khat chu, a nupui chuan Biak ina a thiannu pakhat hruaiin Bessie chu an tlawh chhuak ta a. Biak ina a hâk tùr kawr thar pawh an kensak nual bawk. Anni pahnih chuan Bessie chu Pathianni tûk Sunday school leh tlai lam inkhâwmnaa kal ve thìn tùrin an sáwm chhuak thei ta hial! An lãwm kher mai.

Pastor James Black-a nupui, Lucy leh a thiannuten Bessie an tlawh atanga Pathian­ni lo thleng leh hmasa bera Bessie-i’n kawr thar haa Biak in a rawn pan lai chu Black-a te nupa chuan Biak in kawt atangin an lo thlír reng a, an va hlim tehlul êm! An rawng bàwlnaah pawh phûr tharna nasa tak a pe a ni.

Pathianni tlaia kohhran mipui inkhâwm tan hma darkár khat la awmah, Pastor James Black chuan naupang leh thalaiho chu a thut khâwmpui thìn a. Hming an lam ziah a, chu mi hnuah thuvawn an sawi rual leh a, Pathian thu an zir ho leh thìn. Hei hi tih dàn phunga an lo neih tawh a ni. 

Hun a liam zêl a. Kár khata ni khat, Pathianni tlai inkhâwm tan hmaa naupang leh tleirãwl inkawm khâwm paha Pathian thu zir ho chu Bessie chuan nuam a tiin a thlahlel ngawih ngawih thìn. A nun pawh a hlim sawt a; chhúngkaw rethei tak—chutah pawh a pa zu ngawlvei lehnghal ni mah se, Pathian Thu nung chuan a nun a “èi” miau avàngin a nun khua a ngui ngai lo a, amah pawh a nguai ngai hek lo. Biak ina a thu hriat leh zirte chuan kár tluanin a nun a vawng ni hian a hre thìn a, a nun kai hruaitu atán a Pathian Thu hriat leh zir thinte chu a hmang chho zêl a ni ber mai.

Pathianni tlai khat chu hming lamnaah Bessie hming an han lam a, chháng tùr a awm ta tlat lo! “AWM!” ti tùr a awm lo a nih chu! Chu mi tlaia Bessie awm ve lo chuan Pastor James-a rilru chu a kap tlat a. A inkhâwm tirh atangin a kal lo ngai si lo a. A pá zu ruiin inkhâwm a phal ta lo a nih a ring ber. Inkhâwm bàn chuan a nupui Lucy nèn Bessie kal loh chhan chìan tumin an in lam an pan ta a.

An in an va thlen chuan Bessie chu a lo dam lo hi a lo ni a. A khua a lo sik hluah hluah mai a, a khuh kherh kherh reng a, vâwt tiin a khùr bep bep reng reuh bawk a. A pa lah chuan a pawisa neih sa zu mana a hman ral zêl avàngin a fanu enkawlna tùr takngial pawh sum a nei zo lo hi a lo ni a. Pastor James-a chuan ama daktawr chu a ko thuai a. Daktawr pawh a rawn thleng thuai a. A thisen te an exam hnuah Bessie chu pneumonia avànga dam lo a ni tih an hmu chhuak ta a ni.

An hàw kawngah chuan Pastor James-a rilruah chuan thil dang a lût thei tlat lo—tlaia thalaiho inkawm khâwmnaa hming an lam laia Bessie-in “AWM!” a ti ve lo mawlh khân a rilru a mawlh a ni. “Nunna Bu keua hming an lam hunah ‘Awm!’ a ti ve ang em?” tih zawhna chu a rilru kamtu ber a ni.

In an thlen hnu pawh chuan a rilru chu a la chàwl thei chuang lo. Chutah, a dawna a dawn, liam zawih zawih ang mai hian hla a rawn thleng ta! He hla, “Lalpa tawtawráwt a rîk hunin hunbi a awm tawh lo’ng” (“When the roll is called up yonder”) tih cháng khatna hi, baw hawk hawka kawra tui a luang ang mai hian a ziak-loh-puanah pen-in hla thu a ziak chhuak nghâl zung zung a. Piano a thut chilh a, a thlûk pawh—vawiina kan sak ang chiah hi—chawp leh chilhin mittui parawl kuang chungin a phuah chhuak nghâl bawk a ni.

Pneumonia natna a vei tih an hriat chhuah atanga ni rei lo te hnuah Bessie chu a thi zui a. A vuina inkhâwmah pawh Biak ina thalai inkhâwmnaa a thianten an Pastor hla phuah thar chu mipui hriata a vawi khat nán an rem nghe nghe a ni.

“When the roll is called up yonder” hla hi “Songs of the Soul” tih lehkhabu/hla bu, kum 1894-a tih chhuahah telh a ni a, chu chu tih chhuah (publish) a nih hmasak berna a ni. Tawng chi hrang 14-a lehlin a ni tawh a; Mizo tawnga min lehlinsaktu hi Zosaphluia (Rev. DE Jones) a ni. Zai thiam lãr, a bîkin country superstars—The Statler Brothers te, Brenda Lee te, Loretta Lynn, Johnny Cash, Alan Jackson, Reba McEntire, Jim Nabors te leh mi dang dangin an lo sa lär tawh.

Kum 1938, December 21 khán Rev. James M. Black hi motor accident avàngin Colorado, USA-ah a thi a; mahse, khita hming an lam hun chuanin, Bessie rualin, “AWM!” a ti ve ang.

Nang ve le?.......

Kristian Hla Bu No. 239

Lalpa tawtawráwt a rîk hunin hunbi a awm tawh lo’ng,
Kumkhuain chiang takin khua a vár tawh ang;
Lui ràlah khian leia mi chhandamte an awm khâwm hunin,
Khita hming an lam hunin ka awm phawt ang.

       Khita hming an lam hun chuanin ka awm ang.

Chumi ní-ah chuanin Isua hmingin mitthi an tho vang,
Ama thawhlehna ropuina an chang ang,
Vàna an awmnaah ama mi thlante an awm khâwm ang,
Khita hming an lam hunin ka awm phawt ang.

Zíng atã ni tlâk thlengin kan Lalpa tán i thawk ang u,
A hmangaihna mak zawng zawng i hril ang u;
Tin, kan ni kan tum tawi zawh hunin, kan thawh rim zawh hunin,
Khita hming an lam hunin ka awm phawt ang.