Dr Ka Zawhna

KUM THARAH HRISELNA ATAN THIL PAHNIH

Dr. Chawnglungmuana - Jan 19, 2023

Lirthei kan intihhmuh a, hnai te kal dawn pawhin lirthei kan chelek zel tawh mai a. Zan lamah kan meng rei a, chaw kan ei hma si a, ril a tam leh a, zan reiah thil ei kan ching leh a. Zu in mi lah zanriah ei tawh hnua zu in leh ching an tam si, hnam hrisel lo tak kan ni chho tial tial dawn tih a chiang....

Dam tein kumthar kan chuangkai ta hlawm a. Titi na a mi sawi common ang reng tak mai chu thalai deuh deuh thi kan ngah tih hi a ni. A bik takin mipa thi kan tam niin a lang. Kan dinhmun han en hian Aizawl ah ringawt pawh mi awm tha duh lo, ruihhlo/ruihtheih thil ngawlvei enkawlna hmun hi a tam khawp mai a. Man chawi lem lova awm theihna emaw awm man tlem deuhna, a bikin TNT, Zuangtui leh TBCC, Sakawrtuichhun ah te hian an capacity aia tam an awm deuh reng mai a, a tam ber chu mipa, thalai rual, hna thawk rual an ni a. Chung mite chu hnathawk thei lo, enkawl ngaiin an han awm ania, uiawm tak a ni. 

Whatsapp leh Facebook lamah hian group pakhat, “All Mizoram Drinkers Association (AMDA)” tih hi a awm a, fiamthu nawi deuh deuh bakah zu leina tur inzawhna te, an zu in dan leh a kaihhnawih fiamthu te an post nasa bawk a, a then chuan an zu in nasa kulcho inenkawl dan tur te thlengin heng group ah hian an zawt thin bawk. Facebook group dang pakhat leh chu “Comedian FTH” tih a ni a, thu ho deuh deuh, a then chu zahmawh rawngkai leh ngialngan deuh deuh te pawh a awm nawk. Intihhlim nan a hmang, timepass nana hmang tam tak an awm ngei ang. Mahse heng group te hian hma min sawn tir lem lo khawp mai nia! Chutih laiin Pu N.K.Chakma, MLA chuan Chakma thalai te chu Mizo tawng zir uar turin a lo fuih mek bawk a. 

Kum a han thar chho a, Krismas leh Kumthar hmang uar uchuak deuh vanga taksa chak lo, damlo, a bik takin thin lian leh thin tha lo damlo an kat leh nuk ta mai. Fiamthu ti tak deuhin hetiang damlo ka en te hi “Liver of the Year” ka ti mai thin a, a awmzia ah chuan an thin a len hlawm avangin thin len lamah an intihsiak a ni ber e ti mai ang. Chung zinga a tam ber chu kum 25-40 inkar mipa an ni deuh vek bawk. Heng damlo ka en tam ber hi chuan chuti maiin an zu ngawlvei hi an sim dawn lo tih a chiang bawk a, thahnemngai deuha han zilh te pawh ka nei a, a sawt lem hlei lo thung. Kan hnam future hi a bright fahran lo niin ka hre ta deuh.

Zu leh ruihtheih thil dang ti lem lo pawh, sa leh hmuihmer ei nasat vanga thinlian, thau thin bawh (Fatty Liver) nei te, pum tha lo, zunthlum/thisen sang nei thar an awm nual bawk. Police a tang lai damlo ka en pakhat phei chu a overweight bakah a thin kha a han lian nasa khawp a, a chhan ka zawt a, zu chu in tho mahse in nasa han tih tur chu a ni lo, sa leh hmuihmer a lo ei nasa hle mai a lo nia, chu bakah a thatchhia a, taksa sawizawi lam engmah a ti ngai lo bawk A hnathawhna hmunah scooty in a kal/haw a, ke a kal chang a nei ngai hek lo. Misual um ngai hmachhawn se a va han um pha dawn lo nasa tak! 

Heng ka han sawi duah nachhan chu ei leh in lamah kan inthlahdah zual zia te, kan taksa kan sawizawi tlem si zia te hi vei tham a tling tawh nia ka ngaih vang a ni. Lirthei kan intihhmuh a, hnai te kal dawn pawhin lirthei kan chelek zel tawh mai a. Zan lamah kan meng rei a, chaw kan ei hma si a, ril a tam leh a, zan reiah thil ei kan ching leh a. Zu in mi lah zanriah ei tawh hnua zu in leh ching an tam si, hnam hrisel lo tak kan ni chho tial tial dawn tih a chiang a. Thin tha lo kan tam tial tial a, a enkawl nana kan sum sen zozai te hi a uiawm. Zunthlum leh thisen sang nei kan pung chho leh bawk anga, quality of life kan nei chhe tial tial dawn a ni.

Zu kan in lo thei lo anih pawhin ei leh in lam tal uluk ila, mawm leh hmuihmer ei tlem ila, office kal kan nih pawhin chhunah fastfood ei aiin mahni ina siam tiffin ah pai intihhmuh ila, lirthei kan nei anih pawhin hawl chhuak tlem ila, kan peih chen chen ke a kal intihhmuh ila, a bak chu taxi/2-wheeler taxi te emaw bus te pawh chuang leh mai ila. Chu chuan kan rilru a ti fresh anga, harsatna lian zawk lakah min veng thei dawn a ni. Sap thufing pakhat hi hriat reng atan a tha hle – Eat your food as your medicine, otherwise you will have to eat medicines as your food. Weight loss nan pawh hian ei leh in uluk hi a lo pawimawh ber. Damchhunga damdawi ei/rin ngai lo turin kan ei leh in uluk ila, taksa sawizawi i uar sauh sauh teh ang u! 

Share now