Hunpui inher lai kumhlui thlah zan leh kumthar lawmna hunah Aizawl leh Mizoram hmun hrang hrangah boruak a muanawm thu leh thil duhawm lo thleng a awm loh thu Doordarshan-in a puang a. Krismas leh kumthar vuakvetah zu avanga chet sualna leh buaina lian tham thleng sawi tur a awm loh thu home minister pawhin a sawi a nih kha. Kohhranho tawngtaina vang te, tlawmngai pawlte hmalakna vang te, dan leh thupek kengkawhtu te leh police inpekna vang tein boruak muanawm tak hnuaiah Krismas leh kumthar kan lawm thei a, a lawmawm hle. Chutihlaiin, halpuah khap erawh a hlawhtling lem lo thung. Sorkarin halpuah zawrh leh hal khapna a chhuah a, home minister hoin beihpui an thlak thu leh police pawhin engemaw zat an man thu te kan hria a. Mahse, kumhlui thlah zanah nasa takin a puak a, hal mawi chi hrang hrang an hal nasa hle a, sorkar officer thenkhat in atanga hal te a ni hlawm. Hei hian dan leh thupek lek kawhna lamah thuneitute inen letna tur pawh a tarlang chiang hle a ni. MLPC Act hian khawlai leh puipunna hmuna zu in leh ruih a phal lo a, mahse, Krismas vuakvet ah hian chutianga langsar taka rui chu hmuh tur an tam hle a, chutiang mite chuan buaina siam lo mah se dan bawhchhia an ni tho a, kawng kam vela langsar taka zu in ta mai mai hmuh tur an awm thin hian khawpui a tihzahawm loh bakah naupang zawkte hmuh atan a him lo. Chuvangin, danin a phal loh thil leh sorkarin a khap thil hi mipuiin zawm that kan tum tur a ni a, thuneitute pawhin an lekkawh tha tur a ni ang. Kumthar kan hmang tan chauh a, January 4,2016 (thawhtan) zing dar 4:35 ah lirnghing na ang reng takin Mizoram a sawi a, a intanna Manipur-ah chuan lirnghing nat zawng tehna 6.8 vel a ni a. Kan ralkhel tlang hle a, leilung chanchin zir miten lirnghing hlauhawm dan an then hrang thliah thliah a, India ramah hian hmarchhak pumpui hi a hlauhawm berah an ngai a, lirnghingin a sawi theih reng dinhmunah kan ding mek tihna a nih chu. Mahse, hei vang hian thlabar ngawt chi erawh a ni lo. Japan ram hi lir a nghin ngunna ram a ni a, chhiatna lo thlen palha lo hmachhawn dan tur leh a theih anga lo inven lawk theih dan tur te sorkarin ruahmanna mumal tak a siam a, zirna inah naupang te te pawh uluk takin an zirtir thin a. Kum 2011 a lirnghing na tak a leh tuifawn nasa (tsunami) tak an tawrh tum pawh kha puitling chu sawi loh school naupang te te thlenga chiai buai miah lo a an awm thei kha mi maktih a hlawh a, khatiang chhiatna namen lo tak an tawh laia mipui nawlpui an chiai loh chhan kha an inzirtir that vang leh sorkar hmalakna an rin ngam vang a ni. Keini pawh hian chutianga hmalak chu kan mamawh khawp mai. Sawi tak zelah chuan lirnghing leh chhiatna dang laka Aizawl him loh turzia hi kan ngaihtuah tlang vekin a rinawm a. Sorkar hian insak dan tur (Building code/regulation) a siam tawh a; mahse, mipuiin kan zawm tha lo khawp mai, thuneitute pawhin an lekkawh tha lo bawk niin a lang. He khawpuia building nghet bera kan ngaih pawh hi lirnghing tuar thin Japan ramah chuan an vuak thiahtir vek mai thei a ni. Kan chenna hmun hi awihpang leh chhengchhe tak a ni bawk si a, hmunhma rem lo leh zim takah in lian tak mahni duh dan dana sa leh ngawt thin kan ni bawk si a. Leimin, lei tawlh, ko chim, etc., a awm fo chhan pawh in sak fimkhur loh vang leh bawlhhlawh leh tuichhe paih dan fimkhur loh vang a ni tlangpui. Kumthar chawlhkar hmasa bera mipui barakhaihtu langsar tak mai chu Tuikukte hamthatna tura sorkarin hmalak a tum thu kha a ni awm e. He thu hi sorkar laipuia Niti Aayog (planning commission thlaktu)-in 6th schedule area-te hmasawnna tur atana sum a dahte hai chhuah dan tur ngaihtuaha Mizoram sorkar mi pawimawhte thutkhawmnaah sawi lan a ni a. Sorkar thuchhuahin a tarlan dan chuan 6th schedule hnuaia mite hmasawnna tura sorkar laipui sum dah hai chhuak tur hian project rang taka duang a, sorkar laipuia theh luh a ngai a, chumi a hmalakna turah chuan Reang Development Area a lo lang ve ta nawlh mai a. Hei hian mipui a barakhaih hle a, sorkarin Tuikukte pual bik (Reang development area) a hmalakna tur a lo ruahman ru reng tihna angah pawh a ngaih theih ang. Hachhek Constituency Development Committee leh MZP sorkar thiltih tum chungchang hi an duh loh thu an puang nghal a, sorkar pawhin Reang development area chungchang hi tihsual palh thil a nih thu chhuahin an pha leh bawk. Engpawhnise, kan hnam himna hi sorkar kutah thui tak a awm avangin thuneituten hnam hmangaihna an neih a pawimawh hle tih hi phat rual a ni lo. Kumthar kan chuankai mek lai hian hnam hmangaihna thinlung kan put thar a pawimawh khawp mai. Kil hrang hrang atangin kan hnam tana pawi thei turten min hual vel reng a, mipuiin mahni hnam humhim duhna thinlung kan put deuh deuh a tul a, thuneitute pawhin he hnam tan hian mawhphurhna sang tak an nei tih an inhriat a tha khawp ang. Kumtharah hian rilru thar kan pu thin a, hmachhawp thar te kan nei a, thutiam (new year resolution) neih te kan ching ta viau mai. Kumin hian nasa zawkin hnam hmangaihna thinlung pu ila, min awptu India sorkarah hian kan la him viau a ni thei a, mahse, hma lam hun a hriat lawk loh a, kan sakhua a him lo tial tial thei a, kan hnam zia a ral tial tial thei a, kan ram ngeiah hian ram neitu zawkte hi kan chep tial tial thei a, hnam dangte laka kan ram kan chan thei. Ngun taka kan hnam hmabak ngaihtuah nachang kan hriat a hun ta khawp mai. Kan hnam himna atan hian kumin hian inhlan thar theuh ila, ram hmangaihna rilru pu thar ila a duhawm khawp ang.