• Natalie Portman: Oscars Awards hûm pha chin ngat, zirna lama duai chuang si lo kan sawi dâwn chuan Natalie Portman hming hi sawi hmaih a thiang lo ang. Thiam taka lem a chan piah lamah tha takin Harvard University-ah ngat Psychology-a graduate a ni. A hnuah The Hebrew University of Jerusalem-ah a zir chhunzawm leh. Lemchan avânga a lâr hnûa Harvard University-a lehkha zir chhunzawm leh tûra inziak lût a ni a. Mahse, miten tunge a ni tih an hre lo hlauh! A hming chu a pianpui hming (birth name) — Natalie Herslag tia a ziah daih vângin! A-list actress hian tawng hrang hrang chi nga lai a thiam bawk. A lehkha zir lai hian lem a chang tho a; mahse, zirna a uar viau a; a thlahthlam ngai chuang lo. Stars Wars: Episode I an tlângzarh (premiere) hun leh a exam hun a innang a; primiere-naah hian a kal lo hmak ngam a nia!

• Ken Jeong: The Hangover movies hmuhnawm zet maia mi sualpa Chow-a lem, hneh êm êma changtu Kim Jeong hi medical doctor ngat a nia aw! Kum 16 mi a nihin pâwl 12 a zo dêr tawh! Greensboro’s Youth of the Year-a thlan niin an school-a High IQ team member ni pha chin ngat a ni bawk. University of North Carolina School of Medicine atangin MD (Doctor of Medicine) a zir zo a, New Orleans Ochsner Medical Centre-ah a thawk zui. Doctor a zir hma hian lemchan sikul lamah a inzir hriam hman a. Tin, doctor hnâ a thawh lai atang tawhin mipui hmaa fiamthu thawh thin (stand-up comedian) a ni tawh bawk. Kum 1998 khân Los Angeles a pan a. Mahse, hun rei tak chhûng a hna ngai a thawh chhunzawm tho a; a kârah lemchan a buaipui chho tel bawk a. Kum 2006 khân a doctor kawr hlîpin Pineaple Express, Transformers: Dark of the Moon, Avengers: Endgame te leh movie dang danga inlan tûrin Hollywood lemchan tualah a zuang lût ta chauh a ni.

• Dolph Lundgren: The Expandables leh action movies hrang hranga che pâ thin tak Dolph hi a sekin a lang pâ satliah ngawt lo a nia… University of Sydney atanga Chemical Engineering-a Master degree nei pha ngat a nih hi! Film-a kan hmuh anga a che super star ang tho hian zirna lamah pawh super smart a ni pha tho—Fulbright Scholarship to MIT dawng pha chin ngat a ni. US-a lehkha a zir lai hian Dolph hian drama coach, Warren Robertson a tawng a. Ani hnuaiah lemchan zir telin tûn thleng hian action film 50 chuangah a inlan tawh a ni.

• Mayim Bialik: Big Bang Theory TV series kan tuipui chuan Mayim Bialik hi hriat loh theih a ni lo ang. 90s chhoa TV series lâr tak Blosson, Beaches-ah pawh lo inlan tawh Bialik hi Hollywood actress zînga scientist kan tih mai, mi tlêm tê zînga mi a ni. Hollywood stars zinga zirna lama mi chhuanawm leh chhuanvâwr bera sawi hial tûr Bialik hi University of California, Los Angeles UCLA) atanga Neuroscience-a doctoral degree nei pha ngat a nih hi aw! Kum 12 mi a nih atanga TV series chang tawh hian kum 1993 khan lemchan tual kalsan hmakin college zawm tûrin a inbuatsaih a. Khawvêla zirna in tha ber zinga mi Yale leh Harvard University-ah te luh theihna remchâng hmu ve ve mah se UCLA a thlang a. Hebrew Studies-ah graduate in, Neuroscience-ah PhD hmu pha hialin a zir chhunzawm a ni. Chu mai a ni lo, hormones (pangti pêng thununtu) lam a chhui zauna behchhanin fa enkawl dân (parenting) lehkhabu, Beyond the Sling a lo ziak tawh bawk. Middle school zirlaiten Neuroscience an zir tûr duang pha chin ngat a ni bawk a nia aw…

Kan la sawi loh pawh…: Kan sawi bâk mi lâr, zirna uar tak tak sawi tûr an la awm tûn mai. ‘An awmna a hla êm mai,’ kan ti a ni maithei; Kirori Mal College, DU atanga Science leh Arts-a Bachelor’s degree, a double-’ble-a nei thei ngat Amitabh Bachchan te, Shah Rukh Khan te, John Abraham, MBA te pawh kan la sawi hman hlei nêm!

Lemchan thiamho kan han thlûr deuh bîk a; basketball star, tum 15 ngawt NBA All-Star Game-a inlan tawh, Dr. Shaquille O’Neil te; Queen guitarist, arsi lam mi thiam Dr. Brian May te; a hunlaia supermodel leh fashion icon Christy Turlington te; National Football League Hall of Famer, Dr. Alan Page te; Electrical Engineer-a Master degree nei pha ngat Rowan Atkinson @ Mr. Bean te; Mathematics-a Master degree nei pha, folk singer Art Garfunkel te; rock band lâr thin The Offspring vocalist Dr. Dexter Holland te leh mi dang dang, an chanchin chipchiar kan ziak hman ta lo. Remchâng dangah aw…

Anni chu an vêng leh an khua mai ni lo, khawvêla mi lâr a nih tawh hnuah pawh, hming thup ngai hial khawpin lehkha an zir chhunzawm leh zêl duh a nia! An nih ang nih ve châk ringawt hian awmzia a nei ber lo a, an nih ang ni ve tûra taimâk chhuah a, tuar chhel a, tei rei peih a, thawhrim a ngai hmasa zâwk alâwm. Lâr nia inhriat veleha zirna tâwpsan daih hi… an style a ni ve tlat lo! Anni chu lâr mah se ‘Zirna An Uar Tlat’! ‘Zirlai tân Zirtâwpni a awm ve lo a; ni tin hi, Thawhtanni leh Thawhlehni a ni zêl’ tih hi an thupui a ni miau a…