Lem ziah khawvêla Zofate zínga “Arsi lian” tih loh theih loh, Tlángrokhûma chanchin hi, sawi leh ziah tam a phù angin hriat tùr leh chhiar tùr a tam lo hle mai; ani aia Zofate tána lem ziah lama sùlsutu, hma hruaitu leh lem ziah khawvêla Zofate min pho chhuaktu hi an awm chuang àwm lo e, tih ngam a nih lai hian! Baihvaia vài, lem ziak mi Tláng­rokhûma hi Mizorama Chanchin Tha thlen ní tak, January ni 11, 1950-ah Champhaiah a piang a. Naupang të a nih lai atangin milem ziah nuam a ti hle. A pu, Neivêla lem ziah a hmuh atanga tui tan a ni. Kum 16 mi a nihin ram veina rilru (nationalism) a pu tan a; a kum leh, kum 1967 April thlaah ramhnuai sipai (MNF) a zawm a. Kum 1968-ah sipaiin an man a, kum hnih chhúng lung inah a táng.

Lung in atanga a chhuah hnu hian a tuina ber lem ziah zir dàn kawng a dap tan a. Chhúngkaw khawsak harsat chu thuhran, chutiang lama kai hruai thei tùr tù mah a nei si lo. Kum 1971-ah baihvai takin Mandalay, Burma a pan ta tawp mai a. Tawng pawh thiam loa han chho ve tawp a ni a, bo pawh a han bo nasa viau rëng a. Vànneihthlâk takin Mandalay-a lem ziah zirna sikul tha, State School of Fine Arts-ah a interview thei ta hlauh.

Chawlhkár thum lai interview result a nghah hnuah a result a lo chhuak a; mi 143 interview zíngah pahnihna a hauh pha hial. Mandalay-a khawsa, Dr. C Khuanga te bèlin anni hnên tangin a thiam châk ber lem ziah chu kum thum chhúng a zir a; kum 1974-ah an class-a ti tha ber ni chungin diploma a zir chhuak ta a ni.

‘Lem ziah zir leh a zir ve lo kut chhuak chu a inang thei lo. A zira zir na nâ nâ chu an lem ziah a dik thlarh bîk a; zir miah lo lem ziah chu, angin nalh viau mah se, dik lohna leh famkim lohna lai—a bîk takin composition-ah a awm leh thìn. A lem ziaktuten a dik lohna lai tak an hre thei leh thìn si lo a,’ tiin Tlángrokhûma chuan lem ziah chu a talent dawn a nih piah lamah, a zira zir a hlâwkpui thu a sawi.

Ei zawnna bul tanna

Fine Arts a graduate hnuah Champhai lamah a haw thla a, “Dingdi Art” dàwr a siam nghâl a. Chutih lai chuan Mizote rilruah lem ziah ngaih hlutna rilru a la awm miah lo tih theih a ni. ‘Lem ziah ngai hlu tùrin Mizoten artist lem ziah kan la hmu ngai lo! Magazine pawh kan hmu pha mang mang lo!’  tia sawiin Tláng­rokhûma chuan, ‘Sorkar office leh dàwr signboard te, name plate leh thlânlung ziah te kha kan hna ber chu a ni a. Pathian zárah hna neih loh ka nei ngai lo,’ a ti. ‘A square feet emaw, hawrawp zât emaw ten signboard ziah man kan chhìar thìn a. Inchi khatah duli te ka chhiar ve thìn. Thla khatah Rs 1,000/- lai te chu ka la lût ve thìn,’ tiin bul a tan laia a sum hmuh dàn a sawi.

Kum 1986-ah tùna an khawsakna, Zemabâwk, Aizáwlah an rawn pém thla a, Upper Bazarah studio a hawng nghâl. A dàwrah chuan signboard ziah bâkah thlalâk te pawh a khawih tel a, hlâwk pawh a hlâwk chho ve hle. ‘Thlalâk kha a hlâwk a. Signboard ziah nèn, mahni chauh chuan ka khawih séng ta lo a, mi dang ka ruai hial thìn,’ Pu Tlánga chuan a ti.

Rethei chungin lem ziah khawvêlah

Pu Tlángrokhûma hian kum 1987 atangin ei zawn nán lem a ziah tan tak tak thu a sawi a. ‘Kum 1988-ah Mizorama a vawi khat nán Art Exhibition a awm dáwn a, chumi atána ka inbuatsaih­na chu a ni,’ a ti a. Chutih lai chuan signboard leh thil dang a ziak pah reng tho. Mahse, a tum ber leh a suangtuahnaa lian ber erawh, lem ziah tho a ni.

‘Lem ziah hi ka tuina ber, ei zawn nána hman ka tum ber a ni a; mahse, Mizote rilruah ngaih hlutna pakhat mah a awm si lo! Chu chuan ka rilru hi a ti na thìn. Ka sum hmuhna dang—thlalâkah ka innghat leh lutuk a; chu chuan min ti thatchhia a. Rilru ka siam ta a. Kum 1989-ah, lem ka ziahna tùra min dàltu nia ka hriat ka thlalâkna studio leh bungrua zawng zawng chu ka ti ral ta vek a. Ka hnêna lem ziah zirho hnênah ka sem ral vek! Kut béngin ka awm dèr mai a. Chutih lai chuan ka lem ziah ve chhun chhun lah ka hralh thei si lo! Vaihlo kan zial a, kan zuar bawk thìn a, kan rethei tak zet a ni,’ tiin lem ziah khawvêla bul a tan tak tak dàn a sawi.

Kum thum atán Art Gallery

Mizorama art gallery hmasa ber, Tlángrokhûma din, “Dingdi Art Gallery” chu 1991 September thlaah Aizawl Treasury Square-ah, khatih laia Chief Minister Pu Lal Thanhawla’n a hawng a; hlâwkna ûma he art gallery hi siam a nih loh thu sawiin, ‘Kan hawn nía ka thu sawi pawh record a la awm vek a. Chuta ka sawi chu: “He art gallery hi kum thum atán chauha siam ka ni. Sorkar leh mi hausa, in tha pui pui neihote cho chhuah nán—art gallery tha leh changtlung zâwk din nacháng an hriat theih nána siam ve chauh ka ni,” tih a ni a. Ka sawi ang chiahin kum thum hnu, 1994-ah ka ti tàwp leh a ni,’ Pu Tlánga chuan a ti.

Dingdi Art Gallery hi Treasury Square atangin Dàwrpui-ah an insawn a. A lem ziah leitu hmasa a sawi zíngah, Chief Minister hlui Pu Lal Thawnhawla leh Printing & Stationery Controller, Pu RL Thanzáwna te an ni.

Art Gallery a neih hma atang tawhin Tlangro­khûma hian Mizo thalai, lem ziah lama tuite a zirtír thìn a. ‘Thla khatah chéng 100/- an chàwi thin mai bâkah, an chhùn thingpui man ka kêp vek zêl,’ tia sawiin Pu Tlánga chuan lem ziah zirtír chu hlâwkna ûma ti a nih loh thu leh, lem ziah thiamna tak tak nei se a duhsak thin thu a sawi.

Tuina ber “abstract painting” aiah “realistic pain­ting” 

Tlángrokhûma chuan lem ziah/painting ze hrang hrang zíngah “Abtract painting” chu nuam a tih ber leh a tuina ber a nih thu a sawi a; chutih rual chuan a ziah tam ber erawh “Realistic painting” a nih thu a sawi. ‘Abtract lamah hian ka tui ber a; mahse, ka kal ngam tlat lo! Tin, miten “realistic painting” lam an hlamchhiah ang tih ka hlau a. Chuvàng chu a ni ang, “realistic painting” lama min zuitu pawh nei tam vea ka inhriat,’ Tlangrokhûma chuan a ti a. A kut chhuak zínga hralh kal ber pawh “realistic painting” a nih thu a sawi bawk.

“Zozeh Art” neitupa

“Tlángrokhûma thangchhuahna” tih ngam tùr leh, “Khawvêl mit hmuha Zofate min pho chhuaktu a nihna” ti pawha sawi theih chu, kum 1992-a ama iráwm chhuak “painting style” a duan chhuah leh a chìn zui, “Zozeh Art” hi a ni ngei ang. Mizo incheina leh puan ze mawi tak takte chu, chît chet leh belh chet ngai, abstrct painting nèn belhbawmin “modern art” huangah he a “Zozeh Art” hi a khung ta thìn a ni.

A hming phuahtu chu khatih laia Bangalore-a United Theological College-a Pathian thu zirtírna hna thawk lai, Dr Lalrinawmi Ralte a nih thu Tlángrokhûma chuan a sawi. He a “Zozeh Art” hi hnam dang zínga a hralh tam thu Pu Tlánga chuan sawiin, ‘Painting ngai hlu chin leh composition hre thiam chin chuan min hlutsak ve viau thìn a, hnam dang zíngah ka hralh tha hle,’ a ti.

“Zozeh Art” hi a “trademark” a nih miau avàngin Mizo zia lantírna ngawr ngawr ziah a tum vek loh thu Pu Tlánga chuan a sawi a, ‘Hnam dang zia lang thei pawh ka phawrh tawh dáwn. Sari te leh Mizo thuam inpawlh te pawh ka la ziah pawlh ang. Mahse, a Vai thuam hlang ang ngawt kha chu ka peih chuang lo! A awmzia chu: a “style” kha “Zozeh” tih a ni mai a; a chhúng (a painting)-ah chuan Mizo zia chauh kha a lang tùr tihna a ni chuang lo,’ a ti.

Tlángrokhûma hian “Zozeh Art” avàng hian India ram pum huap chawimawina eng emaw zât a lo dawng tawh a; national newspaper-ah pawh a lem ziah leh ama chanchin pawh vawi duai lo a lo chuang tawh. Chûng zínga a ngaihhlut ber chu, India ram hmarchhak (NE India) huapa award tum hnih (2005 & 2018) a dawn tum kha a nih thu a sawi. “Zozeh Art” hi 100 chuang a ziak tawh a; la phawrh miah loh eng emaw zât a la neih thu a sawi bawk. 

‘Order ka la duh tawh lo!’

‘Tûnah hian—duh ila chuan—min dàwr thìntute atang ringawt paw’n “order” chu ka la thei; mahse, ka duh tawh lo!’ tia sawiin Tláng­rokhûma chuan, ‘Demand emaw order emaw a awm chuan pawisa ka dawng dáwn tih ka hre sa a; rilru zawng zawngin lem ka ziak thei lo thìn. Rilru, ngaihtuahna leh mitthlaa awm sa ka ziah chhuah hian nuam ka ti ber a, ka taima zâwk bawk,’ tiin order a lâk duh tawh loh chhan a sawi fiah.

Lem ziah Thangchhuahpuitu

Mizoram chhúng mai ni lo, India ram pum huapa lem ziaka Tlángrokhûma feh chhuah tawhna leh chawimawina a dawn tawh zawng zawng hi ziah vek sèn a ni lo. Heti hian sawi ta mai ila: India ram pum huap lemziak tha entírna (exhibition)-a tel tùrin vawi duai lo a feh chhuah tawhna zínga a ngaih hlut êm êm chu: India rama Fine Arts lama thu neitu sáng, Lalit Kala Akademi-in a buatsaih thin “National Exhibition”-a tum thum ngawt a tel tawhna hi a ni. ‘National Exhibition-a vawi khat tel pawh hi thil har a ni; mahse, Pathian zárah vawi thum ngawt ka tel ve. All India Exhibition of Art 1989-ah award ka dawng ve a; kum 2001-a 44th National Exhibition, Ahmedabad-a neihah Eligible Artits (E)-a ruat ka ni a; kum 2003-a 46th National Exhibition, Kochi Kerala-ah Voter Artist (V)-a ruat ka ni ve leh bawk,’ a ti. Mizoram páwna a lem ziah entírin tum 30 chuang fé a feh chhuak tawh a ni.

“Life time Achievement in Art” chawi­mawina hlàn tawhtu ringawt pawh hi, páwl pali an awm tawh a, chûngte chu: Progressive Mizo Society (2015) te; Rotary Club of Aizawl (2009) te; Aizawl Art Gallery & Mizoram School of Fine Art (2008) te leh North East Television (2005) te an ni.

Mizo lem ziak mite hmasâwnna tùr leh hamthatna tùr a ngaihtuah nasa hle thìn a. Hetiang lam ngaihtuahtu páwl  dintu leh hruaitu pawh a lo ni tawh thìn. Mizoram Artists’ Society (MAS) dintu zíngah telin kum li chhúng (1987-1991) President a ni a. Mizoram Academy of Fine Arts (MAFA)-ah kum 1992 leh 1993-ah General Secretary niin kum 10 chhúng (1994–1999 leh 2005–2010) President a ni a; kum 2000-ah Vice President, 2001-ah General Secy Mizoram Aca­demy of Fine Arts a ni leh bawk a ni.

Kháwl thil thiamna lo sáng zêl kárah, mihring kut them thiamna (art) hi kan chawi nuna kan ngaih sàn deuh deuh a tül chho hle mai. Tlángrokhûma ang—lem ziah lama Mizote tána sùlsutu leh hma hruaitu kan nei hi a vànneih­thlâk tak zet a. Vawiina mite leh thang lo thar leh zêl tùrten, amah leh a kut chhuakte hi kan ngaihhlut thiam a pawimawh hle a ni.