Zawhna: Ka Pu, hmeichhe tleirawl kum 18 vel ka ni a. Tun hma chuan cher thei tak ka ni a, Lockdown vel boruak atang khan ka thau ve deuh a, khata tang khan ka lute a hai a, thil ruih nei ang mai hian ka zawi em em reng a, engvanga lo awm nge ni ang le? Chuan, ka ke hi tlem a kan kal nasat deuh hian a zawiin a khur thin a, engvang bawk nge ni ang, min pui thei ang em?

Chhanna: Tun hri leng vanga Lockdown hian mi tam tak hriselna a nghawng a, a tam zawk chu a tha lo zawngin a nghawng nite pawhin a lang. Kan taksa hrisel tur chuan taksa chet tam leh insawizawi ngun te, ei leh in uluk bakah hunbi mumal taka ei/in te, mut hunbi mumal tak neihte hi a pawimawh em em mai a. Lockdown hian mi tam tak min tithatchhia a, zan kan meng rei a, chaw ei hunbi a buai bawk. Mobile phone, TV leh Computer te kan khawih nasat phah bawk a. Heng avang hian kan taksa hriselna mai bakah rilru lam thlengin nghawng a nei thui ngei ang.

Kan han sawi tak atang khan kan mit a rim dawn tih a hriat a, chu chuan luna leh luhaite a thlen fo ang. Taksa kan sawizawi tlem chuan kan zawi lo thei lo bawk ang. I rih belh hi cher thin i nih avangin a lawmawm lamah i ngai a ni thei a. Mahse, awm awl leh eileh in lam tih tam vanga rawn thau ve ta i nih chuan a tha ber tlat lo thei. Kan taksa mamawh ei leh in (nutrition) hi kan taksa chet avanga calorie a ei ral (saptawng chuan calorie burn tiin an sawi mai thin) nen a inmil a pawimawh hle mai a. Chuvangin, i lo thau phah ta deuh a nih pawhin i taksa sawizawi lamah tal tan i lak a tul hle ang.

Taksa a lo chet tlem na na na chuan tihrawl leh tha, thazam thlengin a tichawmawlh ve thei a, kan ruh chuktuah (joints) te pawh a lo chak lo thei thin. Chuvangin, ei lamah pawh thau leh mawm bakah thlum tam lutuk insumte a pawimawh hle. Taksa chet tam, a theih phei chuan insawizawi leh kea kal tamte a pawimawh a, lo tum thei la i harsatna hi a ziaawm phah ka ring hle mai. Tin, i mit check-tir a tha hle bawk. In chhungkua, a bikin i nu leh pa emaw thisen zawm chhungte dangah zunthlum leh thisen sang neite an awm phei chuan fimkhur lehzual a tha hle.