Ka Thiannu a ni ta lo!

Chumi tlai atang chuan ka thian tha ber leh ka kawm ngeih ber, Amber-i chu ka thian a ni ta lo a; thian nihna aia thûk zâwk nun min petu a ni tawh zâwk. Chu nun chu kan pahniha kan intâwm a ni. Tünah chuan ka ngaih ber thin chu ka tä a ni tawh a, ka hlata a awm ka phal tawh lo ang—a taksain ngeih pawh a ngeih lo!

Aizáwla a rawn lêt achinah Amber-i paw’n ngai a awh chak viau. Zirna lamah erawh a laklawh zo vek a. Sikul kai loa in lama lehkha zira kum tàwpa êkzam ve hrim hrim erawh a tum hräm a. Chutianga tih chu private sikul pakhatin an lo phalsak hlauh. Kan chhúngte ve ve remtihnain tlai lam leh zan tìr lamah an inah lehkha kan zir dùn thìn a. Ka note chu la chhäwngin a zir ve mai thìn. Mathematics pawh ka subject thiam ber a ni hlauh a, ka zirtír ve leh chhäwng thìn. Shillong a kal hma aiin Amber-i chu in lamah a tawm-im tam zâwk êm êm a—a hrisèl that tâwk loh vàng te pawh a ni ang e. 

Ngaih That lohna

Zan khat chu note lâk thlâk pahin a tìtî siam siam a. Shillong-a an hostel chanchin tlém a sawi. Hmeichhe hlang awmna a ni na chungin, an “nasat” hlawm thu a sawi a. “Cool” an tih mai, khuh damdawi “Phensedyl” pawh, pawisa nei chuan an duh hun huna an “hit” thin thute min hrilh; amah erawh chu a filhlïm niin a insawi. Zawh chîk zui ka châk hle a; mahse, zir lai lam a sawi zui daih a.

Ina ka hàw hnu chuan ka rilru a nuam thei tlat lo—ngaih that lohna lian tak ka nei tlat a. Shillong atanga a rawn hàw hnua Amber-i mize danglam ta lutuk te, mi dang kianga a inthlahrun dui tâkna chhan te, a hma anga a harhvàn tâk lohna chhan te leh ina tawm-im a duh tlatna chhante chu hriat ka châk zek zek a ni.

Thil hrang hrang ka ngaihtuah a; ka duh loh thil thleng thleng pawh ka ngaihtuah— ka hlauthäwng ru tak zet! Ka tawngtai leh ringawt thìn; Amber-i tán mawlh chuan a ni ka tawngtai mawlh mawlh thin ni!

Hun a liam zêl a. Amber-i nèn chuan kan la inngaizáwng zêl a … ti ila, mite inngaihzàwn anga inngaizáwng pawh kan ni hran lo; tùn hmaa kan awm thin dàn nèn pawh kan awm dàn a danglam hran chuang lo. Kan inngai êm êm a … ti ngawt ila, ka ngai êm êm reng a; chutiang chuan amah chu a awm ve em tih phei chu ka hre chiah lo—huai tak paw’n ka sawi ngam lo.

Zan khat chu, Amber- te ina lehkha zir tùra ka kal dáwnin phone a rawn ri a. Ka la a. Ka nu an biak duh avàngin ka nu chu ka ko a. Ka nu chuan zawi të-in phone chu a bia a. Ka ngaihsak zui lëm lo.

Páwn ka chhuah dáwn chuan ka nu chuan phone-a a tawngna lam chu hup chungin min ko a, chhuak rih lo tùrin min hui zui a. Kawngka bulah chuan ka ding a. Zaizirin an pindana lût tùrin min ti leh a; ngaih tha zân loin ka lût ve leh mai a.

Ngawi teh! Phone ka lâka min betu kha—ka nu biak mék chu … Amber-i nu! A ni chiang mai! A âw-ah ka hai hleinêm. Ka ngaih chu a tha tawh lo tak zet a! Eng thil tak thleng ang maw!? 

Inkawm awih tawh loh!

‘A nih leh phawt u le. Lo dam zêl rawh se …’ tia ka nu’n phone-a inbiakna a tih tàwp lai chu ka hre pha. Amber-i chu a dam lo a nih leh ngei ang. Ka thâw chu a veng deuh huai … zâwk!

‘Mama, lo thu teh,’ khuma thut pahin min ti a; an khum síra thu ve tùrin min hui zui a. ‘Amber-i saw … i kawm a rem tawh lo ang.’

‘Eng a!? Eng vàngin? A dam lo leh em ni?’

‘Nasa takin!’

‘Eng ná nge?’

‘Mipa a kawm nasat avànga rilru buai a ang ka ti tawh!’

‘Eng maw!? Chutiang natna chu a awm ngai em ni?’ ka ti hluai a.

‘A! Kàwm tawh lo la a tha ber. Chu chu i tán a him. ’Bâkah, a chhúngte paw’n an remti tawh lo!’

Chu thu chuan min va’n déng na teh lul êm! A chhúngten Amber-i nèna kan inkawm an phal tawh lo … maw!? Tak tak em ni ang? Ka ring. A nu’n ka nu a rawn phone zo chiah a nih kha. A mize danglam tâkna chhante hi—a chhúngte hian an hre bîk ang a, keimah vàngah an ngai … tihna em ni ang? 

Mipa dang kawm an phal ngai lo—patil-a a chhuah an hlau tlat thìn kha a ni a. Hmeichhe hlang sikulah an kal luihtír a. A awm thei lo … a ni ber a. A dam lo a. Eng natna vànga dam lo nge a nih? Chu chu ka hre ve tlat lo! Keia hriat ve chhun chu khîng zawng khi a ni—“A chhúngte hian an ti mah mah em?” tih zawhna nèn!

Chumi zàn chuan rei tak ka meng—ka u Valpuia léng lo hàw pawh ka hria. Sitting room-a ka pa nèna an tìti thäwm pawh ka hre pha vuai vuai. Amber-i chu damdawi inah an dah lût leh a; VDP duty-ten a pindan an check … Chûng chu ka hriat belh bawk!

A ä a!?

Sikul chhùn chawlh hian canteen-ah ka chàwl ngai mang lo a. Chumi ní ber kher chuan, rilru tâwt mup e ti lo chuan zirlaiho chawlhna ber canteen-ah ka chàwl ve teh tlat a. Thil ka ei zawh chuan ni danga ka chìn ngai miah loh, canteen chhaka thiante mei zûk rûkna lam chu ka pan ve ringawt a.

Kan class-a insual hrât ber, Lalthana chuan min hmu thut chu mak min ti ngei mai! ‘Khai! Isua nau chu!’ min lo ti teh hluai a. A Charminar cigarette báwm a phawrh a, tlâwn khat mi pêk pahin, ‘Kha! Neih pawh i nei em ni?’ min ti a. A nawh-alh ka hmansak zui a.

Piah deuha lo khu hlat hlat, Robert-a, “Lalbât” tia kan koh thin, Primary sikul atanga ka páwlpui ni chho char char chuan ka thin khei zar thu a chhâk chhuak a—‘I thiannu, oh! “in nu” chu tuition pawh i pe thei tawh lo ang a? A ä si a!’

Min va’n ti phu chiang kher êm! A men pawh ka meng phâwk hlein ka ring! Lalbâta kianga ding Lalchhana chuan, ‘ 'Ngati nge a? I thiannu … tù? Amber-i … maw!?’ tiin min lo zâwt ve nghâl chat a.

‘Ka va hre lo ve,’ ka ti ringawt.

Kan mei zûk rûknaah chuan páwl 10 zir lai, u Rohminga pawh a rawn lang ve a; min hmu thut chu a phâwk ve viau. Kan tìtì lai chu hre sa ni àwm takin, ‘Amber-i a tha vak nange? Damdawi in lamah a awm leh a ni maw? A rilru lam a ni tawh e lo?’ tiin Gold Premium cigarette tan pah chuan min zâwt ve nghâl chat a.

‘Ka hre chiang ve miah lo … Hei … an lo sawi a, ka hre ve chiah,’ ka ti leh ringawt a.

Khuh kharh kharh pahin, ‘Cool bâkah Optalidon pawh a hmawm ve thìn tlat a—“Nai' ” nèn lehnghâl!’ a ti zui!

‘Eng a!? Damdawi maw!?’ ka ti hú a.

Lalbâta chuan, ‘I hre nang e! Optalidon—na chhâwkna. “Nai' ”—Nitrosun—phûngzáwl damdawi—ât vekna! Cool nèna tih phei chuan … a “bâwng” theih rùra!’ a lo ti zui zat a!

Ka ngawi ta reng a. Anniho chuan an damdawi lo khawih ve tawh leh anmahnia a thawh dàn vêl an sawi zui a. Ka mei zûk lai pawh chu zu chhunzawm loin bung sei deuhin ka paih a. Eng mah sawi set set loin ka kalsan ta a.

Loss in September!

Khatia Amber-i nèna kan inhmuh theih tâk loh zàn atang khán, kan inhmangaihna … ni loin, kan inkára inzawmna zawng zawng chu chhut chahsak vek kan ni ta a! Hrehawm, lung­ngai leh mangang rëng rëngin hun ka hmang chho a; na tak ka ni! 

Damdawi in atanga a rawn chhuak tih ka hriat tlai chuan, ka ngaih tawh êm avàngin Amber-i te inah chuan ka va kal lui ngat a. A chhúngte pawh be hmasa lo chuan a pindanah ka va lût tlang râwih a. 

Min hmuh rual chuan ngawi rengin a mutna khum atanga lo tho kângin, taksa chak lo chung chungin a kut khing hnihin min rawn ban a tum a … Amah viltu a chhúngte chuan an kuai mu leh nghâl thuai a. ‘A biak theih loh. Lo va hàwsan rawh!’ tih chu a chhúngte min lo dawnsawn dàn a ni! Amah chu biak luih tumin ka pan hräm ang nge, a chhúngte thu sawi chu zawm tùr, tiin ka rilru a insual zet a. Páwna chhuahsan rih a, a tûk tlai sikul bàna kal leh chu ka tum ta zâwk a.

A tûk Zirtàwpni chuan sikul kan báng hma a. Inthlâk pawh inthlâk loin Amber-i te in chu ka pan ding leh nghâl a. An in ka thlen hma atang chuan an kawta mi lo awm deuh taih chu ka hmu thei. An in lam pan chuan ka tlän chiam a … 

An in chhúnga Amber-i pindanah chuan ka lût tlang leh nghâl a. Ka thian tha ber; a hnua thian nihna aia thûk zâwk nun min petu, ka hmangaih ber leh ka dam chhúnga ka kianga awm reng atána ka duh ber chu ka hmu leh a. Mahse, “tute emaw” enkawl dik loh vàng te pawh a ni ang chu!—amah chu a awm tawh lo! Inthiar tuma bathroom a pan chu … a chatthla nghâl an ti!

Chü September thla chawhnu lam, Zirtàwpni hnuhnung ber tlai ni tlâk ruai ruai rual chuan, Amber-i chu ka fâwp leh vawng vawng a; mahse, min chháng tùr amah chu a awm tawh si lo a …

A tûk chu September thla liam ní a ni. Chumi nía Amber-i thlahnaah chuan ka tel ve a. Amah ka thlah lehna hmun chu MST bus station kha a ni tawh lo a—thlànmualah a ni kan thlah tâk ni!

A nu chuan Amber-i pangpár ngainat loh ber mai rose par sen duk chu min ken “luihtír” ve a. Leia chhilh hnan mai tùr a kuang chunga thlâk pahin, “September awm tawh lohna vànah chuan—kei leh i chhúngte ni lo, Chhandamtu làwm nán tal, a pár rim tui han tem ve mawlh ang che,” zawi sapin ka ti a … 

Chu September thla ral mék laia ní a tlâk ruai ruai lai chuan, kan huana ka thut thinna Hmáwng küngah chuan ka thu leh a. A dana dan sèn rual loh hian ka mittui chu a rawn súr zung zung a …