Zawhna: Ka pu, khawngaih takin ka zawh che hi min chhansak theih chuan ka lawm ngawt ang. Kan pa hian ke delh mu ang hian a ke khing hnih hian a hik mup mup a, a ke vei lam hi a nasa leh zual a, a ke ding lam chawn puar lai hi chhungril lamah za ang deuh hian a rawn tham a; tin, a lu hi a hai chuai chuai a, a na tel thin. Lehkha a chhiar leh ziahin a rawn lang thin bawk; TV pawh a en chuan a mitko atangin a rawn na thin. Hei hi engtia tih tur nge ka hrethiam lo. Khawngaihin thurawn min pek theih chuan kan lawm ngawt ang.

Chhanna: In pa chanchin hi hei aia chiang deuh hian rawn sawi thei la chu a harsatna neih chhante pawh kan hriat chian phah theih deuh zawk a rinawm. A kum zat te, thau lam nge cher (overweight viau em tih te), zuk leh hmuam a ti em, zu a in em, infiamna lam (entirnan badminton khel nasa) ti chi ani em, zunthlum leh emaw thisen sang a nei ngai em tih te thlengin han sawi thei ta la. Engpawhnise, a chhan ni thei awmte han sawi dawn ila.

Ke mu, ke hik (hit), tha za kan tih te hi thazam (nerve) lam fel lo lan chhuah dan common tak a ni. Kawng inherh thin te, sciatica neiah te (hengho hian nerve root compression a siam thin) a awm duh khawp mai. Chutiang vang a nih chuan CT Scan emaw, MRI hmangin emaw hnungzang ruh (spine) scanning tih a tul hmel. Nerve root compression-ah hian ke/chawn/malpui eng emaw ti zawng taka chettir, char chunga mu paha ke khai kânte hian a na a rawn zual thin. Na a tih awm i sawi tel lo va; chuvangin, nerve lam fel lo chi dang neuropathy pawh a ni thei ang.

Zunthlum leh thisen sang, a bik takin zunthlum te, zu in nasaah te hian Peripheral Neuropathy a awm duh khawp mai. Hetiang neuropathy hian touch sense (khawih hriatna, vawt leh lum hriatna) a tihbuai theih avangin fimkhur a ngai a, an in ti kang (burn injury) fo a ni. Thau lutuk (overweight) hian harsatna dang dang a keng tel fo a, zunthlum leh thin tha lo (fatty liver disease) te leh kawng tha lote thlenga a thlen theih avangin weight maintain hi a pawimawh hle.

Lu hai, mit na te i sawi tel a, a blood pressure in-check a pawimawh hle. Thisen sang hian luhai leh lu na te a thlen thin a; tin, zunthlum control that loh hian mit power a inthlak sek thei bawk a, chu chuan luhai leh lu na a thlen fo bawk. Zunthlum emaw, thisen sang nei emaw enkawl lai (damdawi ei lai) a nih chuan check chian vat a tul ang a, a damdawite pawh thlak a mamawh thei bawk ang. Kal tha lo vangin ke mu leh hik te hi a awm thei bawk. Duhthusamah chuan CT scan/MRI bakah hian Blood sugar, Liver function test, Lipid Profile leh Kidney function test te lo ti ula, a bp check tha bawk ula. A overweight a nih chuan diet control leh exercise te a tul hle ang.