Zawhna: Luna han tihah chhip atanga tukhum lam na, a nat dan pawh mi a tham a, khawsik ruk nei ang deuhin ka taksa hi a vawt ru seng seng. Hetianga ka lu lam a nat hian ka khaw hmuh a tawiin a buai deuh a, ka kawchhung lam atang hian ka sa buai deuh thin. Hetianga ka awm hian nikhua hrelo a awm dawn a inhriatna ka neiin hlauhna in min tuam a, ka dawih em em thin. Heng hi engvang nge? Englam Doctor nge rawn tur min hrilh thei em?

Chhanna: Lu na (Headache) hi a chhan hrang hrang a awm thei a, symptoms common tak a ni a, BP sang vang te, zunthlum vang te, khawsik vang te (infection engemaw ber vanga khawsik a ni zual), mit lam fel lo, a bikin mit power dik lo te, hmairuh chhung kaw awm bang vung (sinusitis, sinus kan tih mai thin) te, nghawng lam fel lo cervical spondylosis vang te, tin, lu na benvawn Migraine vang te in a awm ngun a, stress nei nasa, anxiety leh depression nei te hian lu na an nei duh hle bawk.

Mipa nge hmeichhia i nih i sawi lova, hmeichhia ah hian thi neih buai vang te in a awm thei a, thi hul hnuah hormones lam tlahniam buai vang te pawhin lu na hi an nei duh hle bawk. I insawisel dan dang han en hian hmeichhia i nih ka han ring deuh a. Thyroid lam fel lo te pawh a ni thei bawk ang. 

A chhan hrang hrang ni thei kan tarlan atang hian investigation leh check-up i neih a ngai ngei dawn a. A hmasa berah chuan mit entir a pawimawh hmasa phawt anga. Mit power dik lo i nih chuan tarmit an chawh che a ngai anga, regular taka bun pawh a ngai ang. Tarmit vuah ngai kan nih a, kan hman regular loh hian lu na a ti zual duh viau.

Mit lam vang anih loh chuan a chhan dang zawn a ngai dawn a. Thisen test hrang hrang, a bikin Hb leh Blood sugar te hriat a ngai anga, BP check a ngai bawk ang. Zunthlum control tha lo emaw BP sang te i nei a, i control tha lo anih chuan i damdawi ei lai tih danglam te pawh a tul thei bawk ang. 

I insawisel dan han en hian psychological disorder lam te pawh a ang viau mai a. Zan mut harsat te i nei tel em i sawi lova, sleep disorder nei te hian lu na an insawisel fo mai. Hmeichhia i nih chuan period buai te i nei tel em? Neih chuan Gynecologist i inentir te pawh a tul hmel. Engpawhnise, Medicine Specialist pan phawt ta la, a tul angin speciality dangah pawh an lo refer thei ang che.