Zawhna: Ka pu, kum 30 mi ka ni a, hun rei deuh hlek atang khan lu na ka nei thin a. Puipunnaa ka kal te, boruak inthlak danglam deuhah leh ka stress deuh chang apiang hian a chhuak thin niin ka hria a. Tin, vah chhuah veleh ni saa han awm hian ka mit hi a vung deuh bakah a kham nghal thin bawk a. A nat chang apiang hian nachhawkna ka ei thin. Damdawi ei ziah hian pawina a nei em? Min tanpui theih chuan ka lawm hle ang.

Chhanna: Lu na hi a chhan a tam thei khawp mai a, natna chi hrang hrang rawn lan chhuah dan (symptom) a ni a. Upat dan azir te, mipa leh hmeichhiaah te a chhan a hrang thei bawk a, mipa nge i nih hmeichhia i rawn sawi tel lo va; chuvangin, a chhan ni thei tur han ngaihtuah hmasa dawn ta ila.
Lu na hi a chhan a awm chuan a common pawl chu mit lam fel loh vang a ni fo thin. Chutiang avang chuan lu na nei fo chu mit check kan chawh hmasa ngei thin a ni. Mit check pawh hian refraction test a tul ngei bawk. Tarmit vuah thinah chuan mit power a lo danglam hian lu na a thlen duh hle. Mit stress nasa, computer khawih nasa, mobile phone en nasaah hian mit lam insawiselna a siam duh a, lu na a thlen fo bawk. Mit power inthlak danglam a awm fo chuan blood sugar fluctuate vang a ni duh hle a, zunthlum nei an nih chuan inenkawl uluk a tha.
A dang lehah chuan BP sang vang hian lu na a awm duh viau. BP sang control loh emaw, control tha lo emaw chuan lu na hi an sawi ngun pawl a ni. A thenah chuan lu na bakah hian luhai an sawi tel fo bawk a ni. Hmeichhiaah chuan thineih buai emaw, fel lo emaw vangin lu na an nei fo. Thyroid lam harsatna, a bikin Hyperthyroidism neite hian lu na an sawi ngun bawk. Stress nei nasa te, zan mut harsat leh TV en nasate hian lu nat an nei duh hle.
Migraine lu na erawh a dang leh thung. A nei laklawh chuan hunbi nei ang deuh hian an nei fo mai a, a intan dawnte hian hriat lawk dante a thenah chuan a awm a, a chang leh mitvai arsi thlawk angte an hmu lawk a, rim hriatna dangte a awm thei bawk. A chhan tak hriat a ni lo va, a chhuah laklawh chuan nachhawkna chak deuha control a ngai deuh reng thin; invenna damdawite pawh a awm chungin a effective em em lo.
Lu nat chhan hriat hmasak hi a pawimawh viau. Chuvangin, blood sugar, BP, mit checkup a tul ang. Thluak lam fel lo rule out a ngai a, chumi atan chuan CT Scan emaw, MRI Scan emaw pawh tih a tul thei bawk ang. Lu na vanga nachhawkna ei fo ngai a nih chuan pum lam ven tel a pawimawh viau mai a, pum acid tam lutuk tur ven nan PPI damdawi – Pantoprazole, Omeprazole lam chi hi ei tel theih nise. Pawimawh chu uluk takin doctor-ah lo in-check up-tir ngei rawh.