Amah chu US-a mi hausa ber leh thil ti thei ber zínga mi a ni thìn—USA-a company lian ber mai, Standard Oil neitupa chu. A hming chu John D. Rockefeller Sr. a ni. Amah hi i hre lo a nih paw’n a hming tal hi chu i hre tawh ngeiin ka ring—mi hausa êm êm mai, thil phal êm êm bawk si kha.

US ram chhúnga billionaire hmasa ber a nih khán Rockefeller-a hausakna chu an ram economy za-a 2 ang vêl zu tling pha hial a! Kum 1913 daih tawha a mimal hausakna chu dollar mtd. 900 vel nia chhût a ni a, chu chu kum khat chhúnga US sum deh chhuah (Gross Domestic Product) dollar tld. 39.1 atanga 3% vêl a tling pha hial bawk! Khatih lai khawvêl ngaihtuah chuan, chutiang zah zah pawisa chu, khawvêla mi pakhatin a nei zozai thei dáwn em ni, tih hial tùr khawpa tam a ni ngei ang! Kum 54 bâk daktawrin dam tùra a rin loh kha, kum 98 thleng a dam tlat mai a! Kum 1937, May ni 23-a a thih khán, a hausakna chu US dollar vbc. 1.4 vêl a ni a; chu chu vawiin pawisa hlutnaa chhûtin US dollar vbc. 25.6 vêl a ni tawh hial ang chu! India pawisa phei chuan …

Chutiang khawpa sum lama buai lo chu mi thilphal leh mi dangte tána malsàwmna thlentu a ni thei tlat a—chu chu mi tam takin an ngainatna chhan leh, a thih hnu thleng pawha an ngaih sànna chhan ber zâwk chu a ni. Hrisèlna lam leh zirna lam tih hma sâwn nánte leh kohhran tán chuan a sum leh a neih a ui ngai lo; “Ani aia mi inphal leh luang chhuak nasa hi an awm àwm lo e!” an ti hial thìn rëng a ni.

Tuialhthei thli fímtu chu

William A. Rockefeller Sr. leh Eliza Davison te fa paruk zínga a upa ber dawttu, John Davison Rockefeller hi July 8, 1839-ah New York-a chhúngkaw hung tak atanga lo piang chhuak a ni a. A pa hi damdawi lam thiam leh a thil thiam chu sum siam nána hmang thiam tak mi a ni. US hmun hrang hranga chhúngkua a pèm kualpui hnuin kum 1853-ah Cleveland, Ohio-ah a inbén belpui a. Hetah hian Rokefeller chuan zirna a chawlhsan thleng Central High School-ah lehkha a zir. Kum 16 mi a nihin a hna hmasa ber, sum ziah fel hna (assistant bookkeeper) chu ni khata cents 50 hlawhin a thawk thìn. Heta tanga a sum khâwl leh a loan lâk atangin sumdàwnna hmasa ber—bungraw hrang hrang lâk khâwm leh zawrh hna chu kum 1859 khán a thawk tan a ni.

Hetih lai hian an awmna kiang lawka awm, Titusville, Pennsylvania vêlah, Edwin Drake leh Seneca Oil Company chuan tuialhthei khur an hmu chhuak a; Pennsylvania leh Ohio vêla mite tán oil company dinna remcháng a inhawng ta a.

Kum 1870-ah Rockefeller chuan “Standard Oil Company of Ohio” tih hming puin tuialhtheia sumdàwnna bul a tan ta a. A tìr chuan a unaute—William, Samuel Andrews, Henry M. Flagler leh Stephen V. Harkness te nèn an thawk ho. Tuialhthei zawn leh a khur verh lam ai mahin a thlit fìm lam chu sumdàwn nán an hmang mah zâwk a. A hnuah chuan Standard Oil chuan an theih ang tawkin research and development team dinin anni rinchhan hian oil bawlhhlawh paih dàn an duang thar zêl a. Mi hman duh loh, oil chhia anga an ngaih chu thli fímin sum hnár berah an hmang ta a ni.

Thi tùra ngaih!

Kum 38 mi a nih meuh chuan US-a tuialhthei thlit fìmna za-a 90 chu Standard Oil thu hnuaiah an kün hmiah a ni tawh mai a. Kum 50 mi a nihin John D. Rockefeller chu America rama mi hausa ber a ni thei dêr tawh a ni.

Kum 52 mi chauh a nih laiin a taksaah harsatna lian tak a nei a; hrisèl lohnain a tlâk buak tan a. A chhan ni bera an sawi chu, a hna thawk nasa lutuk chu a tha (nerve)-in nasa takin a tuar a ni ber.  A taksa pum pui chu a na hluah hluah vek mai thìn a. A sam zawng zawng, a mit hmul chenin an tla kawlh zo vek mai! Khawvêla mi hausa berte zínga mi—duh duh leia neia ei thei chuan, soup leh chhang khawro chauh chaw-ah a ring thei ta a nih chu!

‘Zàn a mu thei lo a, a nui ngai bawk hek lo! Hring nun hian amahah awmzia pakhat mah a nei lo!’ tiin amah enkawltu chuan a sawi hial! A taksa enkawl tùra mi thiam bîk an rawih daktawr chuan, kum khat bâk a nunna an chelh theih a ring lo hial a ni!

Kum 1896-ah Rockefeller chuan ni tina office kai chu a chawlhsan a, a kum lehah kum 58 mi niin, a hna atangin a chàwl (retired) ta a ni.

Inhmuh chhuahna!

Na tuar ngawt ngawt chungin, muang zet maiin hun a hmang liam ve zêl a. Dam thlâkhlelhna nei miah tawh lo Rockefeller chu, tûk khat a tho chhuak chuan a hun tàwp a hnai tak zet tawh tih a hre chhuak uai uai a. Vànneihna a tawn leh a dinhmun sáng tak maite chu, “khawvêl piah lam ram”-ah a chhawm thei dáwn lo tih a ngaihtuah chhuak ta zêl a. Chutah, sumdàwnna thila khawvêl awptu ang maia mi lian chuan, ama nunna thu-ah thu neihna pakhat të mah a neih lohzia a inhre chhuak ta! A hnuaia thawk—dàn hre mi te, a ro sum vawnga a sum leh pai chêt vêl dàn viltute leh company inrël bàwlna lam buaipuitu zawng zawngte chu a ko khâwm a. An hnênah chuan, a hausakna zawng zawng—a sum leh pai leh a neih rohlute chu, mi harsa te, damdawi in leh hrisèlna lam thila beihpui thlâk nántea hlàn tùrin a ti ta a. Chutah chuan a ni, khawvêla mi dangte tána luang chhuak nasa ber zínga sawi hmaih ngai tawh loh tùr, “The Rockefeller Foundation” chu May 14, 1913 khán din a lo nih tâk ni.

Hna tha thawktu

The Rockefeller Foundation hna thawh tam tak zínga pawimawh deuh pakhat chu, kum 1928-a Scottish scientist, Alexander Fleming-a’n penicillin a hmuh chhuah theih nána an hna thawh kha a ni. 

Kum 1900 John D. Rokefeller hian Rockefeller hian University of Chicago din nán US dollar mtd. 80 a thawh a. Baptist college te reuh të ni thìn chu khawvêl puma zirna in thaa sawiah a din chhuak thei ta a ni. University of Chicago a din hi, ‘Ka dam chhúnga sum ka peipunna tha ber,’ tiin a sawi hial rëng a ni.

Hemi hnu lawk, kum 1903 khán zirna lam tih hma sâwn nán Rockefeller’s General Education Board a din a. US-a university tha ber ber ni ta, hêng—Yale, Harvard, Columbia, Brown, Bryn Mawr, Wellesley te leh Vassa University din a nih theih nána sum leh tha thawhtu ber a ni. University of Chicago leh Rockefeller University a din bawk a;  Philippines-a Central Philippine University din nána sum leh pai thawhtu a ni bawk.

Kohhran mi

John D. Rockefeller-a nu, Eliza Davison Rockefeller kha Pathian tih mi leh mahni inthunun thei tak a ni a. A fapa hnêna a zirtír tam ber chu: hna thawh, pawisa khâwl leh tanpui ngaite tanpui a ni. Chu chu Rokefeller hian a nunah a vawng reng tih a chiang hle. Amah hi Baptist kohhran mi leh sa niin Cleveland, Ohio-a The Euclid Avenue Baptist Church member rinawm tak a ni.

A naupan lai atang rëngin Rokefeller hian Pathian ram thilpêk a ngai pawimawh hle thìn. Kum 16 a tlina hna a thawh tan phat khán, a hlawh atanga za-a paruk chu Pathian ram tán a pe ziah a; kum 20 a tlin kumin, Pathian ram thilpêk chu za-a paruk atangin za-a 10-ah a ti pung nghe nghe a ni. 

Pathiannia inkhâwm a thulh ngai lo a; kár tin vawi hnih tal tawngtai inkhâwmnaah a tel ziah thìn. Kohhranin missionary a chàwmte tanpui leh, kohhran zirna in din nán ke a pên nasa hle thìn. A nupui Burton Folsom Jr. paw’n kohhran tána thilpêka a inhman dàn heti hian a sawi a: ‘A cháng chuan kohhran hnênah hian dollar sâng chuang fé sum a thawh a; chutih laiin a sumdàwnna zauhna tùrin maktaduai tél sum a pûk leh ang lawi si thìn a! Bible-in a sawiah hian a innghat tawp mai a; Luka 6:38-a inziak, “Pe rawh u; tichuan, pêk in ni ang …” tih hi a innghahna a ni reng,’ tiin.

Rockefeller-a chanchina thil mak deuh mai pakhat chu, sum leh pai a neih tam tak atanga tam tak pawh ni lo a theh chhuah chhun chhun chu Pathianin mal a sàwm tlat zêl a ni mai lo a, a taksain a dam phah a, a natnain a kiansan phah hlauh hi a ni! Hun rei tak chhúng khuma mu reng tawh chu, dam leh hrisêl varin a thawh chhuah theih phah tlat a! Kum 54 chauh dam tùra daktawr thiamten an ngaih kha, kum 100 dáwn—kum 98 lai a dam tlat a ni!

Rockefeller chuan a nun chu làwmnaa khat chunga hman a zir cho zêl a; a thil neih leh a dawn malsàwmnate chu, mi dangte pêk ve a duh tlat zêl a. Chu chuan a nunna chu kum rei tak chhúng a chelhsak a—a ti dam tlat a tin ni! Taksa “fit” tha tùra inenkawlna piah lamah, rilru chhúng ril “fit” that leh hrisèl that hi dam rei nán a lo pawimawh hle mai!

Kum 1864-ah Laura Celestia “Cettie” Spelman nèn inneiin fanu pali leh fapa pakhat an nei. An fate leh an tuteah Pathian malsàwmna an dawng nasa hle a. An sumdàwnna leh an Foundation te an enkawl chhunzawm a ni mai lo a, ram tána mi chhuanawm ber ber, US state hrang hranga Governor te, Senator-te leh Vice President hial ni phate pawh an awm nawk a ni. 

Thu chah hnuhnung

John D Rockefeller-a’n a thih dáwn hnaiha a diary-a a thu ziah hi, a sûlhnu hnuhnung a ni ngei ang; a ropui asin: “Engkim mai hi Pathian tâ a ni tih ka zir chhuak a; kei chu a duh záwng hlen chhuak tùra a kawngkhàr mai ka ni. Ka nun hi hahdamna leh chawlhnain a khat a—hlimnaa khat nun neitu chu! Hna thawk leh infiamin, hlim takin hun ka hmang ral a. Ka lungkhamte chu kawng síra thlauhthlain, Pathianin ka nuna thil mak a tih chu, ni tin ka thlír zâwk thìn.”