Pawisa kum kal mek zatve kan thlen hnuah kum khat chhung atana sorkar sum ruahmanna Mizoram budget kim chang chu finance minister-in a pharh ta a. Regular budget a pharh theih loh chhung hian sorkarin sum a tih chet reng a ngai si a, chuvang chuan March 19 leh July 7 khan sum ruahman lai lawk (Vote on account budget) pharh a ni nghe nghe a. Budget pharh ruala a thusawiah finance minister chuan, “Kan hriat theuh angin kumin 2015-16 hi Fourteenth Finance Commission recommendation anga State ten sum kan hmuh tan kum a ni a. He Fourteenth Finance Commission recommendation hian State kuta sum luh dan a thlak danglam nasa hle a...central sorkarin Planning Commission a thiat a, a hmunah NITI Aayog chu a din thar a. Hemi avang hian Five-Year Plan leh Annual Plan chhunga State ten Plan Fund kan hmuh thin Normal Central Assistance (NCA), Special Central Assistance (SCA) leh Special Plan Assistance (SPA) te hmuh a ni ta lova. Mizoram tiama State thenkhat Special Category State nihna pe a duhsak bikna pek thin chu tihbo a ni ta bawk a,” a ti a. Hei hian kan tuna state dinhmun leh kan hmabak a hril thui hle a ni. Kan hriat angin sum hman tur daihzai nei ve lo (resource deficit state) Mizoram ang te hi chu sorkar laipuia ministry hrang hrang atanga pawisa lo kal hi an intunnunna ber a ni thin a. Mahse, sorkar laipuiin kalphung thar a siam tak, sum lak luh leh hman ralna lama state thuneihna pek (fiscal federalism) chungchang hian ngaihtuah a tithui khawp mai. Sum hmuhna tur tlachham deuh, hmasawnna tur sum indaih bawk si lo state pachhe zualten harsatna an tawk nasa dawnin a lang a, state sorkarin ruahmanna tha tak a siam a ngai a, chung chu fel fai taka a bawh zui a ngai bawk a ni. Chuti a nih loh chuan indaih lohna a tam tial tial dawn a ni. Kum hmasa lam nen kalphung a inang thei tawh lo tih a chianna chu finance minister ngeiin sorkar laipui atanga pawisa lo kal lawih thin CSS chungchang a sawi hian a tichiang awm e. “Centrally Sponsored Schemes hrang hrang tana Central leh keini Special Category State ten pawisa kan thawh tur intumsem dan tlangpui awm sa 90:10 chu tihdanglam deuh vek a nih tur thu Central Sorkar 2 atanga hriat a ni bawk.” Heng thil hrang hrang avang hian regular budget a pharh har niin a sawi bawk. Budget thar a langsar tak mai chu sorkar laipuiin state sorkarte hnena sum a pek dan a thlak danglam tak avanga sum harsatna chungchang hi a ni. Special category state-te pawhin vohbik nihna an hloh tak avangin state rethei tan tanlak thiam a ngai dawn khawp mai. Tuna finance minister hian kum 20 kal ta 1995 khan lehkhabu pan te, tha zet mai, ‘Budget Mipui Sum’ tih a lo ziak tawh a. Mizo tawnga budget kalphung ziahna lehkhabu hmasa ber leh tha ber a ni hial awm e. Rei tawh viau mah se tunlai hun thleng hian a la tangkai khawp mai. ‘Tu huat thu mah a ni em lo vang a, sorkar hnathawk leh MLA hlawh thleng hian kan ram retheih ngaihtuahin a sang viau vek mai,’ a tih te hi a dik fu a ni. “Sorkarin motor a ngah zia thu leh heng atanaa sorkar sum sen tam zia chu sawi peih pawh awm mah se ngaithla peih kan awm lo ang...Sorkar officer-te hman tur hian a hmang pha chin a sorkarin a ngaih te hi car loan pe vek mai zawk se. An hlawh atangin thla tin rul leh mai se. A repair man hi sorkarin tum loin thla khat petrol man tur hi petrol litre 100 man vel pe ta zawk se. Motor sorkarin a pek loh theih loh khawp a lian hnenah minister atanga commissioner rualte hi pakhat theuh pe se la,” tih te hi tunlai hunah pawh hian ngaihtuah tham a tling awm e. Sorkar tan pawha pawimawh tak mai chu sum hman danah fimkhur a tul tak zia hi a ni. Nuamtawlna ang chi reng reng mausam hmiah ngam a hun ta. Kan state sum hmuhna hnar ber Planning Commission thiah a ni ta a, sorkar laipui ministry hrang hrang atanga kan hmuh dan tur lah a la chiang hlawm si lo a, kan hmuh pawhin state sorkarin a do letna tur (matching share) tam tak a pek a ngai zel tawh dawnin a lang si a. Kan hmuhna pui ber tur Finance Commission sawmpalinain min ruahmansakte pawh hi a hmanna tur dik taka hman a tul dawn a, tam tak phei hi chu state matching share atana zuah a ngai dawn bawk. Hengte a nih avang hian state sorkarin sum hai luhna kawng a dap chak a ngai dawn khawp mai. Tun hnai lawkah sorkar atanga mipuiin kan lei thin buhfai man te, electric chhit man te, tui man te, etc., a tihsan chhan pawh hei hi a ni. Sorkar hian chhiah leh thil danga mipui chawi tur a la tihpun zel a rinawm nghe nghe. Chutihlaiin, rotling siamna tur leh hmasawnna lam hawi zawnga hmalakna hi ngaihpawimawh ni zel ta se, nakina sum leh pai leh thil danga hlawkna thlen thei tur thil ngaihtuah a tul khawp mai. Chuti chung chuan, kan ram hmasawnna tur atan thil pawimawh tak tak huam tel budget erawh engemaw chen chu a neih theih tho a. Chutiang zawnga chhut a, kan sorkar sum harsatna tawh mek te ngaihtuah tel chuan budget thar hi a tha thawkhat viau awm e. Kan lo beisei fo thin department hrang hrangte thawh tur bituk pawh hmuh tur a awm a, specific budget ziarang a hmuh theih ta. State budget te hi chu union budget anga han chai chiam chi a nih lohna lai a awm a, kawng tam takah sorkar laipui hmalakna zulzui deuha hmalakna kalpui a ngai thin a, sum thawh chhuah nei tam lo tan phei chuan budget changtlung tak, kan mamawh fun kim tur neih a theih loh tih erawh hria ila a tha awm e.