Assembly session zawh takah khan Mizoram Economic Survey pharh a ni a. Kum hmasa lam zawng aiin Economic Survey hi a bu a chhah a, a kim chang zawk bawk a. A buaipuitu Planning & Programme Implementation Department an fakawm khawp mai. Mizoram Economic Survey ah hian tun hnai kum hnih khat chhunga Mizoram economy dinhmun kim chang taka tarlan a ni a, kan ram dinhmun zir chiang duh tan a chhenfakawm khawp ang. Mizoram economy hmasawnna kum 2015-16 chhungin za zela 9.18 leh 2016-17 chhungin za zela 9.06 tling tura chhut a ni a, hei hi India ram pum (economy) thanna aiin a sang zawk a. Kum 2015-16 chhung khan state sum thawh chhuah zawng zawng (GSDP) Cheng vbc 13,277.78 tling tura chhut a ni a, chu chu mi tinin kan insem theih zat/mi pakhat thawh chhuah zat hisap (Per capita income) chu Rs 95,317 a ni a, India ram pum huapa mi pakhat sum thawh chhuah zat Rs 93,293 aiin a tam zawk nghe nghe. State sum indaih lohna leh leiba hi ngaihthah mai chi a ni ta lo. State sum thawh chhuah (GSDP) atanga za zela chhut chuan tun hnaiah a tlahniam viau a, mahse, leiba zat tak erawh a pung viau thung. Kum thar (2017-18) chhunga leiba zat hi Cheng vbc 7,177.99 ni tura chhut a ni a, chu chu state sum thawh chhuah zawng zawng (GSDP) atanga chhutin zaa 40.87 a ni. Budget-a a lan danin kum hmasa lama kan leiba dinhmun atang pawh hian leiba hi a veiawm hle tih a lang thei awm e - kum 2013-14-ah Cheng vbc 5,608.38, kum 2014-15-ah Cheng vbc 6,550.39, kum 2015-16-ah Cheng vbc 6,407.39, kum 2016-17-ah Cheng vbc 7,290.17. Sorkar laipui atanga sum dawn a tam zel a, sorkar hnathawk hlawh a pung zel a, NLUP leh thil danga sum tam tak hman belh zel a ni bawk a, kum hmasa lam aiin sum lo luang lut a tam zel avangin a chunga sawi tak state sum lak luh/thawh chhuah (GSDP) pawh khi a pung zel a. Finance minister-in budget pharh ruala a sawi danin kum 2017-18 chhunga GSDP thanna tur zaa 13.05 ni tura chhut a ni. Heti khawp hian state sum thawh chhuah hi a pung a, a lawmawm khawp mai. Mahse, pawisa pung hi tute kutah nge luh? A insem rual tha em? tih hi ngaihtuah ngai chu a ni. Heng pawisa hian mi rethei zawkte hnen a thleng phak lo a, a nei sa te hausakna tipungtu lek a nih chuan hmasawnna tak tak a thlen chuang lo tihna a ni ang. State sum thawh chhuah leh mimal tin thawh chhuah zat chhut a (GSDP leh per capita income) a punna hi hmasawnna tehfung pawimawh taka ngaih a ni na a, a insem rual that leh that loh erawh a hril tak tak lo thung. Chuvangin, mi thiam tam tak chuan sum leh pai pung zel hian mi rethei leh harsa zawkte hnen a thlen mumal loh thin avang te, mi hausa tlem tete hausakna tipungtu mai a nih theih avangin hei hi tehfung dik berah an ngai lo a. Kan ram dinhmunah pawh hian mi rethei zawkte hi an bet rengin a lang a, state chhunga sum che vel a pun zel vanga hmasawnna chak taka a kal anga ngaih hi a dik tawk lo thei tho a ni. A tawi zawngin, state sum lak luh pung zel hi mi rethei zawkte hnen a thleng pha meuh lo a nih chuan hmasawnna a kai rual tawk lo tihna a ni a, mi tlemte sahmim tihpuarna mai a ni. Economic survey-a a lan danin eizawnna peng hrang hrang (economic sector) zingah Service Sector hian a thawhhlawk ber a. Service sector chu thiamna leh hriatna hmanga eizawnna hi a ni mai awm e, Mizoramah chuan service sector a thawhhlawk ber chu sorkar hnathawkte hi an ni a, sumdawnna peng hrang hrang, hotel/restaurant, damdawi in, zirna in, media leh a dangte a huam bawk. Kum 2015-16 chhunga state sum thawh chhuah/lak luh zawng zawnga a zatve aia tam 55.64% chu service sector thawh chhuah a ni. Sorkar hnathawkte hlawh hian a thawhhlawk viau a ni. Lo neih lam leh a kaihhnawih eizawnna hna (Agricultural/primary sector) hian kan ram economy-ah 18.75% a thawh ve a, thilsiamna tenau kan neih ve te (industry, quarrying, manufacturing) hi Industry sector an ti a, kan ram economy-ah 25.61% an thawh ve a ni. Industry sector a thawhhlawkte chu electricity, gas, water supply leh utility service hrang hrangte an ni. Ngun zawk a ngaihtuah chuan Mizoram mipui tam ber, 60% vel te innghahna leh eizawnna lo neih leh a behbawm (agriculture & allied activities) thawh ve hi a bei tham hle. Chumiin a entir pawimawh tak mai chu kan ram sum 19% hi mihring 60%-in an insem a, NLUP leh sorkar hmalakna hrang hrang kalpui hnuah pawh lo neitute hi a rethei ber ber an la ni reng tihna a ni. Lo neih bansan an tam tawh nia an sawi lai hian mipui zaa 60 zet chu an la inhnangfak tihna a ni a, bansan chiangkuang lo an tam tihna pawh a ni thei ang. Engpawh nise, kum nga tal tap NLUP kalpui a ni ta a, lo neitute eizawnna erawh a la hlawk lo hle reng a nih hi. Ram hmasawnna kalphung pangngaiah chuan a tirah lo neih lamah hmasawnna a thleng a, chumi hnuah thilsiamna lam (industrial sector)-in hma a sawn leh a. Lo neih leh a behbawma eizawng tam takin thilsiamna lam an bawh a, industry sector a hmasawnna chuan service sector a chawm a, nasa takin a lo thang thin a. Tunlaiah chuan ram hrang hrang economy khai dingtu ber a ni tawh. Mizoramah hi chuan lo neih lam (agriculture sector) ah hmasawnna a la thleng tak tak lo a, hman atang tawhin sorkarin hmalakna ropui tak tak a lo nei tawh mah se a la hlawhtling tak tak lo. Industry sector-ah kut benna tham hmasawnna a la thleng lo bawk. Chutianga sector hrang hrang a tahtawla thang lo chuan kan service sector hi a thang ta vak a, kan economy innghahna ber a ni ta a ni. Economic survey a a lan dan chuan kum khat chhunga kan state buhfai mamawh zat hi 1,80,000 MT vel a ni a, kan rama buh thar chhuah ve 62,089 MT a ni a, kum khat chhunga kan mamawh zaa 34.49 chauh kan thar a nih chu. Kum 2015-16 chhunga buh chinna leilet zau zawng chu 17,302 hectares a ni a, 12th plan (2012-17) tir lam khan 12,700 hectares a ni a, chumi awmzia chu NLUP kalpui hnuah leilet hi 36.24 % in a zau tawh tihna a ni. Chumai a ni lo a, buh thar pawh 31.54%-in a pung bawk. Tlangram lo neih zau zawng pawh 11th plan (2007-2012)-ah 44,947 hectares a ni a, nasa taka tlahniamin 2015-16-ah chuan 19,851 hectares a lo ni a, kum sawm chhungin 55.83%-in a tlahniam a nih chu. Tun hnai kum ruk kal ta, NLUP hun chhung (2010-2016) hian tlangram lo zau zawng hi 30.50% velin a tlahniam bawk. Hei hi NLUP hlawhtlin vang niin an sawi thin a, tlangram lo neih bansan an tam hle tihna a ni. Lo neiha eizawng pawh hi kum 6 chhung (2010-11 leh 2015-16 inkar) hian chhungkaw 68433 atangin chhungkaw 48417 ah a tla thla a, 29.25% in an tlem tawh tihna a ni. Rei lote chhunga eizawnna danga insawn an tam hle chuan kan economy a nghawng viauin a rinawm a, mipui nawlpui dinhmun pawh inthlak danglam viau tur chu a ni. Mahse, Economic Survey hmasa lama a lan dan chuan (NLUP bul tan lai velah pawh khan) lo neih leh a behbawm a eizawng 60% vel tho an ni a. An tam lam hi za zela chhut chuan NLUP hmalakna tawp tawh lamah pawh a la ngai reng tho hi thilmak tak a ni. Mizoramah hian (MNF sorkar laia bul tan) Oil Palm ching an tam ve ta hle a, chin theihna tur ram 24.78%-ah chin a ni tawh a, tunah hian ram 22,027 hectares-a zauah chin mek a ni a. Chin theihna ram zawng zawng hi 1,01,000 hectares zet a zau a ni. Oil Palm hi nungchate hnawt botu leh a chinna atana ramngaw tha lai tihchereu thin a nih avangin khawchhak lam ram thenkhatah chuan an bansan tan tawh a. Keini chu sorkar hmasa leh tuna kan sorkar hian an tuipui viau mai a, ram tha lai kan chan hnem avang leh nungchaten an tawrh avangin kum 20/30 a vei leh chuan kan la inchhir ngeiin a rinawm. Ram hmasawnna kan buaipui hian hmasawnna tlo (Sustainable development) chauh hi tuipui ila a duhawm khawp ang. Hmunphiah, Rubber leh Oil palm chinna atana ram tha lai vah chereu chiam hi nakinah kan la inchhir ngeiin a rinawm.