Khawvêla poetry lãr ber zíng chhiar tel reng tawh tur, “Kubla Khan” phuahtu English poet lãr, Samuel Taylor Coleridge (1772 —1834) pawh khân kha a masterpiece kha a mumanga a ziah lâwk a lo ni. Chhùnah a muthlu a; a mumangah chuan mi pakhat hian poem a lo chhiarsak a. Tlar 50 chuang a mumangah vêk chuan a lo ziak tawh a. A thian pakhatin a mu chu a ti harh hlauh mai a; tichuan a ziak chhuak leh ta a ni.

Scottish writer lãr, RL Stevension ( 1850—1894) kha kan hre fur àwm e; “Dr. Jekyll and Mr. Hyde” ziaktu kha. Kha lehkhabu kalhmang (plot) pawh kha mumanga a hmuh lâwk tho a lo nia! Ngawi teh, High School-a English Rapid Reader-a zir hman kha chu kan nau chhe tawh bîk vak lo a nia! English novelist, Marry Shelly (1797—1851) lehkhabu lãr leh hralh la kal reng, kum 1818 January ni 1-a tih chhuah, gothic horror lehkhabu, “Frankenstein” thawnthu pawh kha a mumang lama a ziah a ni ve tho bawk.

Guiseppe Tartini (1692 —1770), Italian Baroque composer leh violinist pawh khân zan khat a mumangah Setana hian violin a lo tumsak a. Mawi a ti êm êm mai a. A harh zawk a, violin-in a tum ta nghâl a. A kut chhuaka ropui ber (masterpiece) “The Devil’s Sonata” chu a phuah chhuak thei ta a ni.

John William Dunne (1875 — 1949) kha British sipai, aeronautical engineer leh philosopher a ni a, a lehkhabu ziah, “An Experiment with Time”-ah a mumang a taka thleng dik chanchhin a ziak a. 1898 kum khán, zan khat chu a mumangah Martinique thiarkár tláng kàngin Paris-a factory a tih kan hi a lo thlír a. French sawrkar hnênah mi 4,000 thi mék chhanchhuak tùrin a lo ngèn chiam mai a. A hnu 1929–1932 chhúngin Martinique thiarkár tlángkàngah mi 36,000 teh meuh an thi a ni.

US President ngaihsanawm ber zínga mi, an President 16-na Abraham Lincoln-a pawh khân kah hlum a ni dáwn tih a hre lâwk tlat—a mang lamah! Zan khat chu a mumangah White House hi a lo reh ruih a. East Room lam atangin tap thãwm a hria a. A va a phei a; a thil hmuh chu a mak rêng lah taka. Kuang chhúngah chuan amah chu an lo zalh a, mitthi puanin an lo tuam hlûn mai a lo ni! Sipai véngtute chu tunge thi tih a’n zawh chuan, ‘President mi sualin an kâp hlum a,’ a ti ta mai a! A ruang chu a inhmu ta ngei a.

He thu hi a nupui, Mary Todd Lincoln leh a thian tha te a hrilh a. Anni chuan, ‘Mumang mai mai, theihnghilh tum rawh,’ an lo ti sam êt a, an lo lâk thutakpui dèr si lo. Mahse, a hnu lawk April 14, 1865-ah Lincoln-a chu stage actor lãr John Wilkes Booth-an “Our American Cousin” lemchan (play) Ford’s Theatre, Washington, DC-a a en lai chu a kâp hlum ta rêng a nih kha. Mak ve deuh mai chu, a mumanga a inhmuh ang chiahin a ruang hi White House-a East Room-ah an dah ve chiah mai nia!
    
DejaVu kan sawi tam hman ta lo. ‘Hmãnah hetiang hian/hetah hian ka awm tawh thãnin ka hria,’ kan tih thin ang hi a ni. Mi thenkhat chuan, ‘Mumanga kan lo fan tawhnaah kan kal leh a ni duh,’ an ti a, ka awih deuh. Kal/fang tawha inhriatna kan neih tlatna chhan hi a awmin ka ring tlat.

A tàwp nána ka sawi duh chu hei hi a ni: Pathianin mihring min siam sipisial-zia hi! Nunna nei ve dang—ran te leh thlai te aia kan chungnunzia ti chiangtu niin ka hria.