Kan khawvel changkang zelah hian mihring kan buai tial tial a, kan buaina chhawk thei tur ni awm tak Information Technology (IT) hian mi tam zawk chu kan buaina a belhchhah a ni thei mai ang em tih awl tak a ni. Zan mu tha thei lo tana advice kan pek fo thin mut dawna lehkhabu chhiar te pawh IT khawvel hian a rawn thlakthleng a, lehkhabu aiah mobile emaw TV emaw computer kan ban zawk ta fo mai. Kan ni tin hun hman kawngah rilru tihahtu emaw taksa tihahtu kan tawng tam tial tial a. Puitling lamah phei chuan mi mal mai ni lovin chhungkua leh hnathawhna hmunah te, khawtlang leh kohhran mawhphurhnate hian hahna min thlen fo mai. Chung kan thil tawn hrang hrangte chuan hah (stress) a rawn siam a, chumi inkhawl khawm chu a dawngsawng thiam lo chuan taksa nat phah nan te an hmang fo mai a, a rawn lan chhuah dan common tak chu mut that theih loh hi a ni.

Mut hi kan taksa hian chaw, tui leh boruak kan mamawh ang tho hian a mamawh a, kan mut hian kan taksa a pem leh hliam (kan hriat phak loh thlengin) a insiamtha a, nilenga hah taka hnathawk tan phei chuan taksa a chawlhna hun pawimawh, a insiam that hun mut hun hi a pawimawh em em mai a ni. Kan mut that loh chuan kan thluak hnathawh a mumal hlei thei lova, thluak hman ngai hnathawk chi kan nih phei chuan mut that loh hian kan theihna a tihniam nasa thei hle. Chuvang tak chuan ni tin eichawp zawng, chawlh mai rem ve lo tan phei chuan zan mut that hi a pawimawh zual em em mai a ni. Mut that loh hian damlohna chi hrang hrang, thisen sang (hypertension), lung lam natna (cardiovascular disorder), zunthlum (diabetes), thau lutuk (obesity) leh thluak lam fel lohna chi hrang hrang (mental disorder) a thlen duh hle.

Kan muthilh hian sleep stages pali (4) kan paltlang thin a, chu chu Rapid Eye Movement (REM) leh Non-Rapid Eye Movement (NREM) sleep tiin an sawi a, NREM ah hian stage 3 a awm leh bawk a ni. NREM sleep bikah hian a stage thumna ber hi kan taksa hahchawlh theih dan sang bera a awm hun a ni a, kan marphu, BP, thawk zat (respiration rate) a lo tlahniam duai a, tihrawl zawng zawng deuhthaw hi a zawi (relax) vek bawk a ni. Chutiang avang chuan BP sang nei, damdawi ei lai te hi an BP control a that a, zan lama an damdawi an ei chuan duh aiin an BP hi an mut laiin a tlahniam thei niin mi thiamte chuan an sawi a, chu chuan BP drop nasa vanga stroke pawh a awm ve thei niin an sawi bawk. Chutih rualin BP damdawi zan mut dawna ei hian a tuk lama rawn sang thei lakah a veng niin an sawi bawk. REM sleep ah erawh hi chuan mumang kan neih hun lai a ni thin a, mit a phu rang a, marphu leh thawk lak a lo tam thung a, tihrawl te pawh a tang tel thin bawk.

Engpawhnise, kan sawi tak angin mut that hi kan mamawh em em mai a, mut harsat neite tan a manganthlak duh hle bawk a ni. Chutih laiin mutna damdawi doctor te’n kan chawh hian, kan chawh chin bak lo ei mai thin an awm fova, chu chuan a ngawlveina (dependency) a thlen leh fo mai. An han nghei khan mut that theih loh a lo thleng leh mai thin (rebound insomnia). Chuvangin, loh theih loh a awmte a nih loh chuan mutna damdawi hi ei mai mai loh a tha ber a, a tul a nih pawhin mahni thu ni lovin doctor te rawn hmasa ngeia ei ni thei se a tha ber a ni. Mut theih loh chhan kha eng emaw tak a lo awm a nih phei chuan chu harsatna chu enkawl hmasak a tul tihna a ni a, mental disorder (depression hi a chhan zingah a common ber pawl a ni) an neih phei chuan Psychiatrist te enkawl an mamawh hmasa ngei thin.

Mut that theih loh enkawlnan a damdawi an hman common zualte chu Zolpidem (Zolfresh), Benzodiazepines (Diazepam, Lorazepam, Alprazolam etc) te hi an ni a. A tam zawk hi chu controlled drugs an nih vangin mahni thua damdawi dawra lei mai theih an ni lo va, doctor prescription a ngai. Alprazolam bik hi kan hmang sual nasa khawp mai a, ngawlvei an tam khawp ta mai a, a ruka lo hralh/ zuar an awm fo vang hian kan hman sual common tak a ni ta. Mut pui tura damdawi kan tarlan (a dangte pawh) te hi hmansual a awl em em mai a, mahni thua inchawh chi a ni lova, doctor rawn hmasak ngei tur a ni. Damdawi tel lo hian Sleep Hygiene an tih mai hmangin tam tak chu enkawl theih an ni bawk. Chung zinga pawimawh tak chu kan tarlan tak IT (mobile, TV leh Computer) laka insum hi a ni. Mut hma darker khat tal chu khawih lova awm theih nise, chu chuan harsatna tam tak a chhawk thei a ni.