Kum 1951 khan India independence hnua a vawi khatna atan chhiarpui neih a ni a. Chu chhiarpuia data lakkhawmte chu National Register of Citizens (NRC)-ah vawn that a ni a. Chutah chuan India khua leh tuite leh an chenna in, an lo ram leh an thil neih te chhinchhiah a ni a. He register hi khua leh tui dik tak hriatna atan a tangkai hle a ni. Chumi hnu atang chuan NRC hi tihthar leh ennawn (update) a ni zui ta lo vang vang a. Kum 1980 chhoah khan Assam-ah ram dang mi (Bangladesh atanga pem lut) ngaihtheih lohna a lian hle a. An zirlai leh thalai rualten hma an la a, ram dang mite zawng chhuaka thawn haw turin sorkar an nawr nasa hle a. Kum ruk chhung zet nasa taka an beih hnuah kum 1985 khan AASU leh sorkar laipuiin thuthlung an siam ta a, chu chu Assam Accord tih a ni. Chu Accord-ah chuan March 24, 1971 hnu lama Assam-a lut ram dang mite zawn chhuah a, an ram a thawn kir tur, tih a chuang a. March 24, 1971 (cut-off date atana) an thlan kher chhan hi a awm a. India leh Pakistan sorkar a lo din hnu khan East Pakistan (tuna Bangladesh) atangin mi tam tak Assam-ah hian an pem lut a. Pakistan sorkar khan Bengali-ho hi a tihduhdah viau a, politics thilah an en hrang hle a, sipai leh sorkar hnaah pawh an duhsak lohzia an tilang thin a. March 1971 atangin Pakistan lakah inlak hran tumin an bei ta a, India a inrawlh vat a. Pakistan sipaite an che rawva hle a, mi nuai 3 atanga maktaduai 3 inkar vel an that niin an sawi. Chutih hun lai chuan Bengali tam tak (Pakistan sipai hlauin an tlan chhia a) Assam-ah an lut hum hum mai a. A hnua Bangladesh sorkar a lo pian takah khan engemaw zat chu an let leh a; mahse, tam tak an cham bang zui a. Heng foreigner-te hi Assam mipuiin an ngaithei ta lo a, zirlai rualte rilru chawhthawhin a awm a, hma an la ta a, an buai luai luai a. A tawpah India sorkar nena inremna an siam a, chu inremnaah chuan a nawlpuia an lo luh tam ber lai 1971 March thla tawp lam hi an hre reng a. Chuvangin, March 24, 1971 hi ni tiam (cut off date) atan an hmang ta a ni. Assam Accord avang hian The Citizenship Act of 1955 pawh siam that (amend) a ni a, January 1,1966 hmaa Bangladesh atanga Assam-a pemte chu India khua leh tui an ni sa a, January 1, 1966 leh March 25, 1971 inkara lut, kum 10 tal Assam state a awm tawh te chu an hming ziah luh  hnuah khua leh tui an ni thei a ni. ASSU leh sorkar laipui inremna thuthlung ‘Assam Accord’ hi tihhlawhtlin loha a awm reng lai hian mi thahnemngaite court-ah an zualko reng a. Kum 2014-a MP election campaign lai khan Modi-a hian an chak chuan dan loa Bangladesh atanga lo lut rute chu zawn chhuaha an rama thawn haw a lo tiam bawk a. Kum 2014 vek hian Supreme court-in NRC hi ennawn thar leh tur a ni, tiin thuchhuah a siam ta a. Assam state chhunga ram dang mi dap chhuah a, thawn haw chungchang hian nghawng a nei lian nghal hle a. BJP hian an thlawp a, an MP pakhat phei chuan NRC updating hi state zawng zawnga kalpui vek a rawt a ni. 1980 chhoa Assam movement avangin Asom Gana Parishad (AGP) a lo piang a, Assamese nationalism kalpuitu an ni a. Tunhnaia Assam-in NRC a kalpui dan hi a hmaa ram dang mite ngaih theih lohna boruak tho kha a la ni a. Tun tuma ram dang mite ngaimawh a, hmalatu hi chu an state sorkar (BJP kaihhruai) a ni a, ‘Hindutvavadi nationalism’ (supporter of hindutva) an kalpui anga puh tawk an awm mek. A chhan chu he sorkar hian Citizenship (Amendment) Bill, 2016 an thlawp tho si a, sorkara BJP thawhpui dang AGP hian an dodal nasa viau thung. Supreme Court thuchhuak angin sorkarin hma a la, 2016-a BJP sorkar a lo din hnu phei chuan hmalakna a chak zual a. NRC ennawn (update) tih hian ram dang mi ni a rin zawn chhuah a, khua leh tui dik tak hmuh chhuah a tum ber a, NRC 1951 a hming chuang te leh an thlah te emaw chumi hnu lam March 24,1971 thlenga electoral roll-a hming chuangte leh an thlahte chu khua leh tui dik taka pawm an ni a. Chutianga NRC dilna thehlut chu mi vaibelchhe 3.29 lai an tling. December 31,2017 khan Draft NRC hmasa ber chu tlangzarh a ni a, dilna thehlut zinga vaibelchhe 1.9 chu India khua leh tui dik tak an ni tarlan a ni a. Khua leh tui an nih chiang lo, document phawrh tur nei mumal lo, vote thlak theihna phalsak rih loh D-Voter (Dubious voter) an tih mai pawh nuai 2.48 lai an awm a. An zingah hian Special tribunal hmaa insawi fiah zo lo, khua leh tui an ni tih fiahna nei lo mi 91,206 chu foreiner-a puan an ni a. Dan bawhchhia an nih avangin an state chhunga jail hrang hranga detention camp 6 an siamah an tantir a, an rama thawn haw tura tih an ni. July 30, 2018 khan final draft NRC chu tlangzarh a ni leh ta a. Final draft-ah hian khua leh tui hmuhchhuah zat chu vaibelchhe 2.89 an ni a, ram dang mi hmuhchhua zat chu nuai 40 zet an tling. Chumi awmzia chu India mi an ni tih tarlanna nei lo, insawifiah zo lo mi nuai 40 Assam-ah an awm tihna a ni. Final draft tlangzarh hian India ram politics a nghawng nghal a. BJP lamin an thlawp viau laiin congress party hruaituten an sawisel a, Trinamool hruaitu Mamata phei chuan a sawisel nasa hle a, ‘civil war a chhuak ang’ ti hialin a sawi. Assam thenawm Meghalaya leh Nagaland-ah chuan heng Bangladeshi-ho hi an state an luh lohna turin sorkarin hma a la nghal bawk. Assam-a mihring pun dan (population growth rate) leh Mizorama mihring pun chak dan han khaikhin hian kan dinhmun a inang khawp mai. Bangladesh nena inri ve ve kan ni a, Pakistan hnuaia Bangladesh a awm tirh lai leh zalenna an sual lai, tualchhung buaina namen lo an tawh lai vel 1951 atanga 1971 inkarah khan Assam mihring punna (population growth rate) a sang hle a. 1951 leh 1961 chhunga mihring punna zat chu 34.98% a ni a (all India rate 21.51%); 1961 atanga 1971 inkarin 34.95% a tling bawk (all India rate 24.80%). Assam-a Bangladeshi ho an luh vanglai hi Mizoramah pawh Chakmate an lo luh tam hun lai a ni ve tho mai. Mi state chuan an chief minister hoin sorkarin ram dang mite dap chhuah leh thawn haw beihpui an thlak a. An awhawm bik khawp mai. Hman deuh khan home department report danin Mizoramah foreigner an awm lo, an ti a mi kha? MLA inthlan kan hmabak a, kan hnam himna tura tih takzet leh huaisen taka hmala ngam tur ram hruaitu thlan tur neih ve tawh a chakawm khawp mai. — Lalthlamuana Ralte