Zawhna: Ka pu, nu kum 31 nau thla 9 pawm lai ka ni a, nimin atang khan ka hnute dinglam hi a rawn vung a, a mar tung mai a, enge a chhan ni ang? Tha na ka nei thin a, kutphah leh kephah leh chawn vel hi a na ngut ngut thin a, nerve tha lo vang ani thei em?

Chhanna: Nu in naute an neih hian an hnute hi hnutetui insiam vangin a rawn thang emaw vung thin a. Naute in hnute a hnek khan chumi vung chu a lo ziaawm ve leh mai thin. Thenkhat chu hnutetui insiam tam lutuk vangin leh, naute in a hnek hneh loh vangin hnutetui pe chung pawhin a vung na fo thei. Chutiangah chuan hnute sawr deuh te hian a ngeih duh phian bawk.

I fa hi thla 9 anih tawh chuan a ei in ah supplement i belh tawh ngeiin a rinawm a. Naute hi thla 6 an lo tlin hian nu hnutetui ringawt rin tir lovin an taksa mamawh nutrients pek belh turin thil dang an pe tel thin a, chutiang chu Weaning period an ti thin. |henkhat hian chu aia hma hret te pawhin an pe bawk. Kum khat an tlin thleng hian hnutetui leh ei tur dang chawhpawlh hi an pek dan tlangpui a ni thin.

Naute ei tur pek kawngah hian thianghlim (hygienic) a pawimawh hle mai a. A chhan pawh naute ka chhung hi a la no a, infection a awm hma a, chu mai bakah nu hnute an la hnek tel bawk avang hian hnute infection (mastitis) te pawh a awm awlsam thin bawk. Thenkhat chu hnutetui an la ngah si avangin naute in a hne phai hneh lo fo a, chu chuan a tham hma a, a vung ve thei thin bawk.

I insawi dan atang hian infection (mastitis) i nei palh ani thei a. A vung bakah hian a vun te a sen tel thin a, enkawl hma loh phei chuan hnai te pawh a la thei hial a ni. Enkawl fai bakah tuilum a deh te a ngeih a, a zual deuh chuan antibiotic ei te a ngai tel thei ang. Mahse i fa chu hnute hne lai a la nih chuan antibiotic ei mai mai loh kha a him a, ei a tul anih pawhin naute huat loh tur ei a ngai a, hmeichhe doctor lam rawn ngei la a tha ang.

Tha na i han sawi tel tak hi erawh a chhan hriat a tha viau mai. Nau i pai hma in i nei tawh thin em? Nge nau i neih hnua awm chauh? Nau pai leh neih hi hmeichhe tan stress nasa tak a ni a, ei in uluk tel a ngai a, taksa mamawh nutrients/vitamin tlakchham te pawh a awl a, chutiang avang chuan than a, tha kham te an nei duh bik. Nau an pai len tawh hnu phei chuan taksa awm dan posture a lo ti buai ve a, inherh, tha pawt tih ang reng hi an nei duh a. Chutiang avang chuan naupai laia chet tam, taksa sawizawi te hi a pawimawh hle reng ani. 

Nerve lam chak lo vang te chuan a awm thei tho a, chhan dang vang te pawh a ni thei bawk ang. Vitamin leh calcium supplements ei te a pawimawh a, taksa chet tam leh sawizawi te pawh a pawimawh hle. A reh mai thei lo anih chuan in check chian ni thei se. Nau neih hnua thau ta vak, rih belh vak te hian tha na an nei duh phian bawk. Ei in uluk a pawimawh rualin weight control ngaih pawimawh tel a tha hle.