June 5 (Thawntanni) kha World Environment Day a ni a. Nungcha, thing leh mau, lei lung leh tui inkungkaih dan hian ngaihven a hlawh tial tial a. Environment han tih hian a huam zau hle a, khawvela awm zawng zawng hi a huap vek a, leilung, tui, boruak, nungcha te leh thing leh maute hi environment-ah chuan an tel vek a ni, tunhma sikul zirlaibua 'Min Hualveltu' tih khan a awmzia hi a phawk chhuak tha viau awm asin. Kum 40 vel kal ta atang khan kan chenna khawvel venhim duhna hi a lo awm tan a, sumdawnna lama hmasawnna chak tak avangin science leh technology lamah pawh hmasawnna nasa tak a lo thleng a, khawl hmanga thilsiam chhuah a pung thur thur a, chungte leh mihring pung chak zel avangin boruak a bawlhhlawh tial tial a, tui thianghlim a tlem hret hret a, sik leh sa inthlak hunbi a mumal hleithei ta lo a, khawvel vawng daitu chhim tawp leh hmar tawp bakah tlang sang pui puia tuan leh mang ata vur khang hlawmte an tui ral mek bawk a. Heng zawng zawng infawkkhawm hian harsatna a thlen nasat zel avangin environment siamthat hna hi mut mawh hnar mawha neih a hun ta hle a ni. Mizoram sorkar hmalaknain kumtin tun ang hunah hian thing phun beihpui thlak a ni thin a. Thil tangkai tak a nih rualin heng thing phunte hi a puitling an tlem lu lai thin em a, a uihawm thin. Engpawhnise, ramngaw chereu zel tur ven te, boruak leh tui bawlhhlawh zel tur ven te, tui hna tipung zel tura hmalak te hi mitin mawhphurhna a ni tih hre thar ila. World Environment Day tak hian Pachhunga University College-ah 'Nauban Huan' hawn a ni a, he college atanga zir chhuak Pu Lalmalsawma, Chief Secretary-in a hawng a. He nauban huanah hian zirtirtuten Mizoram nauban tualto chi hrang hrang 300 chuang an khawi nghal a. Kan ram tualto zinga hlu ber pakhat nauban huan siam a ni ta hi thil lawmawm tak a ni a, changtlung chho zel se, kan ram rohlu venhimna atana tangkai tak ni zel se a tha ang. Kum 2006 chho vel atang khan a ni awm e, mi thenkhatten Mizoram nauban to takin an lei a, khawchhak lamah an keng chho thin a. Zozam (weekly) kan enkawl lai kha a ni a, kum 2007/2008 chhoah khan nauban hralh ruk chu nasa takin a hluar a, titi leng vak a tam a, 'China-ah ruihhlo siam nan an hmang, mipat-hmeichhiatna lam damdawi siamna atan an hmang, perfume atan an hmang' tih te a ri nawk a. Theih ang tawkin ka ngaihven a, nauban zirbingtute leh E&F dept. lama mi te kan kawm a, thingtlang lama nauban hralhtute pawh ka be pawp a, internet lamah te kan chhui zui ve a. Vanneihthlak takin February,2009 khan Burma-Mizo pakhat, he sumdawnnaa inhnamhnawih ve chiah lo, mahse, hre thui tak ka tawng fuh hlauh mai a. A rintlak turah ngaiin ka kawm ta a, a sawi dan chuan (Burma lam miten) nauban an zawn thin chu chi thum a awm a, an duh ber chu a zung atanga to bawr lai hi a ni. A a sawi dan chuan, a tha ber leh a man to ber chi chu Kawl tawngin 'Suihchhawng' an ti a ni awm e. Chutiang chi chu (2009 khan) Kg 1 hi Rs 400 atanga Rs 500 inkar velin Mizoramah an lei thin a. Nauban bawr khatah hian lei atana an duh ang chi chu pava 20 vel a awm. Zozam (weekly) ah khan chipchiar takin, khatih laia sorkarin nauban veng tura hmalakna a neih miah loh thu te, state biodiversity board phalna la lo a kan ram nungcha/thing leh mau lak leh thawn chhuah phal ni lo mahse biodiversity board-in nauban veng tura hma a lak miah loh thu te pawh kan ziak ta nghe nghe a. Mahse, YMA lamin hma an la zui a, sorkar pawh a che ve ta a, nauban rem vek tur chi ven him a ni zui ta a, a lawmawm hle a ni. India hmarchhak hi nauban chi hrang hrang tamna hmun a ni a, Mizoram leh Arunachal Pradesh-ah te hian a tam zual niin an sawi a. Mahse, kan nauban te hi kan hlut tawk lo a, ven himna lam kan ngaihtuah lo a, kan hriat loh karin a riral hnem tawh ngawt ang. Dan hmang pawhin kan veng thei reng a. Wildlife (Protection) Act,1972 a Section VI ah chuan Senhri (a sen leh pawl - blue & red vanda) bakah Zawnga tuikhur (Lady's slipper) te hi ram pawna thawnchhuah hrim hrim a khap bur a. He danah bawk hian tualto nauban hrim hrim (any wild orchid) hi thawnchhuah khap a ni bawk. Hman deuha Forest department a officer pakhat chuan nauban an ngaihthah hi pawi an tihzia min hrilh a, "Min ruk zawhsak hma hian orchid reservation area/sanctuary siam vat a ngai a ni," a ti hial a. Pachhunga University College-in 'Nauban Huan' an siam ta hi kan hnam tan pawha ro hlu tling tur ni thei ngei se a duhawm khawp ang. He college-ah hian Botany department, Environment department leh Biotechnology department-te a awm sa a. Kan rama naubante hi a par mawina mai bakah a damdawi leh rimtui chi hrang siamna atana hlutna nei a awm nual tih a chiang a. Chutianga an hlutna leh tangkaina zir chianna atan pawh he nauban huan hi a tangkai chho viauin a rinawm. Pangpar a sumdawnna (cut-flower market) lamah pawh nauban par hi a hluin a hlawk ber pawl a ni a, chutianga sumdawnna atana khawi pawh an awm nual a, intihhmuh zel chi pawh niin a lang. Chutihlaiin, kan ram tualto nauban te hi khaw tur ang chi a hmun danga hralh chhuah erawh danin a phal lo tih hria ila. Thing leh hnim, nungcha hlu tak takte hi tunlaiin inruksak (bio-piracy) a hluar hle. Hnam dang mi pawimawh lo zin te pawh lo pek ngawt chi a ni lo a, scientist lo zin te pawhin an hawn ruk leh ruk loh dap chi zawk an ni ang. Kan ramah hian Pathianin rohlu tam tak a dah a, kan la hai chhuak lo mai mai a, a then chu a hlutna kan hre lo a, kan ngai ho viau bawk. Chung zingah chuan kan ram hmul chi hrang hrang - damdawi leh thil danga hman tangkai theih, hlu tak takte hi a ni. Nauban ngei pawh hi kan humhalh a, kan venhim loh chuan a hlutna kan hriat tak tak hmain a rem zo mai ang tih a hlauhawm a ni.